🔱
સોમનાથ આવતા જતા રામમંદિર ની બરાબર સામે એક શિવાલય ને હું ઘણી વાર જોતો હતો પણ જ્યારે જોઉં ત્યારે ગેટ પર તાળુ! પુછપરછ કરતાં ખબર પડી કે ત્યાં ડેમોલેસન ની કામગીરી ચાલુ છે અને એ મંદિર સોમનાથ ટ્રસ્ટ અંતર્ગત આવે છે અને ત્યાં જવાની મનાઈ છે. એક દિવસ અચાનક મારા મિત્ર એ કીધું "કાલે સોમનાથ જવું છે" હું તૈયાર થઈ ગયો. મને ખબર ન હતી કે મારા મિત્ર ને પણ એ રામમંદિર સામે ના શિવાલય વિશે જોવા અને જાણવા ની ઋચિ છે ; અનાયાસે એ મિત્ર ને એવી બાતમી મળેલ હતી કે તે મંદિર સવારે શ્રુંગાર અને આરતી હેતુ મર્યાદિત સમય પુરતું ખુલે છે પણ ત્યાં જાવાની મનાઈ છે. સોમનાથ પહોંચતા જ મિત્ર એ ગાડી તરત રામ મંદિર ની સામે ના શિવાલય જેનુ નામ રૂદ્રેશ્વર છે તેના ગેટ પાસે જ સ્થિર કરી ને બંને ખુલ્લો ગેટ જોઈ મંદિર ના માર્ગે ત્રાટક્યા મંદિર ના મુખ્ય દરવાજે એક ભાઈ એ રોક્યા ને પાછા વાળ્યા પણ થોડીક દલીલ અને આજીજી બાદ અમને મંદિર માં પ્રવેશ મળ્યો. મંદિર ની અંદર ના સ્તંભો અને ગર્ભગૃહ ના દ્વાર ની ફરતે ની દિવાલ નું કોતરકામ અવર્ણનીય છે મેં મારા જીવન માં આટલુ સુંદર , જુનુ અને બારીક કોતરકામ વાળું શિવાલય નથી જોયું. મંદિર માં એ સમયે પુજારી શિવલિંગ નો શ્રુંગાર કરી રહ્યા હતા. માંડ માંડ દર્શન ની પરવાનગી મળ્યા છતાં પણ મેં નકટાઈ થી "ફોટો પાડવા દેશો?" એમ પુછી લીધું ને મારી આશા અનુસાર જ ઉત્તર નકારાત્મક આપ્યો. તેમ છતાં મંદિર ના ગર્ભગૃહ ની બરાબર પાછળ ની દિવાલ પર ની આ અદ્ભૂત શિવ પ્રતિમા જોઈ હું પોતાની જાત ને રોકી શક્યો નહી અને છાનોમાનો ફોટો પાડી લીધો. હાલ તો મૂર્તિ જર્જરિત અવસ્થા માં છે પણ જ્યારે મંદિર માં સ્થાપિત થઈ હશે ત્યારે કેટલી પ્રભાવશાળી લાગતી હશે એ વિચાર થાય છે