u/unicorn_779

بجد ساعات بحس إن ريديت المصري بقى نسخة مصغرة من المجتمع اللي احنا اصلا المفروض هربانين منه يعني لو حد قال راي مختلف بدل ما نتناقش معاه عادي لازم شتيمة وهجوم وتقليل منه وممكن الموضوع يوصل ان ناس تكرهه لمجرد ان هو مش متفق معاهم وفيه صبات كمان بقت مبنية على كراهية ناس او فئات معينة وكأن فكرة انك تكره حد عشان مختلف عنك بقت عادية طب ما احنا جايين ريديت ليه أصلا؟ مش المفروض هنا تقدر تقول رايك براحتك وتختلف مع غيرك من غير ما يتحول الموضوع لخناقة مش بقول انك لازم تحب راي الشخص التاني ومش لازم حتى تتفق معاه بس على الأقل سيبه يقول رأيه

احنا كده بنعمل نفس الحاجة اللي بنشتكي منها في مصر بس على ريديت

المودز في ريديت المصري بقوا بيستغلوا السلطة اللي عندهم بدل ما يستخدموها لتحسين الصب المود المفروض يحافظ على الصب مش ان هو يستخدم السلطة اللي عندة عشان يفرض راية او يسكت حد لمجرد ان هو مختلف معاه او يعامل الأعضاء كانهم أقل منه وطبعا مش معنى ان شخص بقى مود انه بقى فوق باقي الميمبرز او ان قراراته كلها دايما صح المود في الاول والاخر هو ميمبر عنده صلاحيات زيادة، مش عضو فوق باقي الاعضاء او احسن ياريت نفهم ان المودريشن مسؤولية مش سلطة بجد

في ناس بتحب تظهر بصورة معينة قدام الناس اكتر ما بتحب تكون كده فعلا يدعي ان هو مثقف وهو مش بيقرأ عشان دي هوايه او عشان عايز يتعلم لكن عشان يبان مثقف يدعي إنه هو واعي لكن مش بيتقبل راي مختلف عنه

يدعي المثالية وهو نفسه مش بيطبق المبادئ اللي بيتكلم عنها المشكلة ان احنا ساعات بنهتم ان الناس تشوفنا ازاي اكتر من اننا نهتم احنا مين فعلا مفيش مشكلة انك تكون مش مثالي او مش مثقف او مش فاهم كل حاجة المشكلة انك تحاول تثبت للناس انك حاجة مش انت يمكن احسن حاجة انك تبقى على طبيعتك بدل ما تقضي وقتك كله و مجهودك بتحاول تبان شخص معين

مينفعش تقول أنا ضد الحاجة دي طول ما هي بتحصل لحد مش بتحبه واول ما تحصل لحد بتحبه تبدا تبرر وتدور على استثناءات لو المبدأ صح يبقى صح حتى لما يكون ضد مصلحتك وضد الشخص اللي بتحبه وضد رأيك الشخصي انك تتمسك بمبدأك وقت ما يكون في صالحك مش اختبار حقيقي الاختبار الحقيقي لما المبدأ يبقى ضدك وساعتها تشوف هتتمسك بيه ولا هتغيره عشان يناسبك، المبدأ اللي بيتغير حسب الشخص والموقف مش مبدأ ده مجرد تبرير