r/arbDREam

محدا لحدا

هلو كايز أنا ممكن أكون أكثر شخص شاطر بمواضيع تخص الأحلام لأني شخص أربعة وعشرين ساعة نايم ومهووس بالنوم ويحب يجرب كلشي يخص النوم فممكن أكون أهل ثقة وتجربون كلامي إذا تردون.

هواي صار انتشار بالفترة الأخيرة عن الأحلام الواعية وكيف تصحى بنص حلمك وتستوعب أنك بحلم، بدايةً أنا قبل سنوات هواي صرت اجربه وتطلع أكثر من نتيجة مرة اسوي إلي يعجبني والجودة مال الحلم تصير أحسن شوي وأكثر اتحكم أكثر شوي من قبل ومرة طرت بسجادة علاء الدين للدولة المجاورة السعودية ولعبت وي طفل😁، ومرة سويت سباق دراجات نارية بنص الليل وي سواق الدراجات بالبصرة وشارع فارغ ومطر خرب يجنن مستحيل أنسى هالحلم خصوصا الشعور جربته كامل، بس مو بس الجانب الإيجابي اكو، اكو جانب سلبي هم فدوم جنت من استوعب أنا بحلم وأكول للي وياي يهجمون عليه ضرب وعض وأغرب شي جان من هاجموني بدغدغات رغم أنها دغدغات إلا إني تألمت وحتى بجسمي الحقيقي أحس بألم ووجع مال نغزات أحس بجسمي وهو نايم وأعرف بنفسي أحاول اكعد واعاني على ما اكعد ومن حلم لحلم اروح وتستمر المعاناة وأنا أحاول اكعد أحس جسمي يحترگ ويعاني متألم يحاول النجاة ونفسي بيه ضيق وكأنو گلبي يريد يخرج من جسمي، ومرة من استوعبت أنا بحلم جانوا الجن يهاجموني بالحلم وأنا ببيتي وصعدت لجربايتي اسوي روحي نايمة وفجأة استوعبت كلشي وكلت ترا ما أخاف اعرف هذا حلم فجأة الجو تحول وصار غريب وبومة صارت على السبلت إلي كدامي كل التفاصيل والجو يبين أنه مو حلم أول مرة باحلامي يكون بهاي الجودة أنا جنت متأكدة اني كاعدة وهذا واقع مو حلم وكلساع البومة تطير عليه وأنا نايمة وأرجع اكعد بالكوة قبل لا توصل لوجهي أنا اكعد وعيوني تغمض غصباً ما عليها وأرجع لنفس المكان ونفس النقطة والبومة ترجع تطير عليه وهيج على نفس الحال لمدة خمس ساعات والحلم ما يكثر عن دقيقة تخيلوا كم مرة انعاد وأنا جسمي يحس بكلشي وشعور الخوف والرعب وجسمي متشنج ما يتحرك.

طيب كل هاي القصص إلي حجيتها هي جزء بسيط عن أحلامي واللي استنتجت عنها بعض الاشياء، أولا إذا تريد تجرب هاي التجربة ما تروح تنام گبل وأنت تفكر بيها ترا ما تصير وهي مو بسيطة مو بس إذا تنام وتكول أنا بحلم يعني أنت سويتها يمكن حتى ما تحلم، أول شي ممكن تصيرلك نادرا وأنت ما مفكر بيها حتى ولا مفكر راح تحلم أو لا جسمك يريد بس ينام وعقلك منهك من التعب(أكثر الأحيان تصير للتعبان ويريد ينام مو للمرتاح وجاهز لوقت النوم) ثانيا الحلم يكون واقعي جدا لدرجة ما تدري بروحك أنت بحلم أنت كل إلي تعرفه هذا واقع ويلا شسوي هسة ثالثاً ترا أنت بالحلم ما تتذكر أي شي ولا تتذكر أنت نمت ولا شنو أكلت و شنو صار قبل نومك حتى منو أنت وشسمك و شنو مسوي بحياتك واقاربك ما تدركهم رابعاً أنت مو بحالة مستقرة أنت مستعجل دوم عبالك تريد تخلص من شي وعليك مهام تريد تنفذها حتى لو ما تعرف شنو هي خامساً اكو اشياء عشوائية ومالها دخل وربط حواليك وتصير وأنت تحاول تتأقلم وياها وكلساع تدخل بشي جديد وحلم جديد

طيب يمتى يجيك الإدراك أنك بحلم؟ فجأة يجيك فجأة أنت تحس بجسمك وأحيانا تتذكر أنت شوكت و شلون نمت ومرات حتى تتذكر جسمك من المنظور الثالث المهم بهالحالة تصير مسؤول عن جسمك وتتحكم بيه ما يكون بحالة حركة دائمة وأنت تريد تتأقلم وياه وتحاول تسوي حركة وحدة المهم من تستوعب هالشي أنت تدريجياً راح تستوعب هذا حلم راح تستوعب اللي حولك وهنا نجي لطريقين

١_ يا اما إلي حولك يگلبون عليك ويحاولون يكعدونك أو يأذونك وأنت تحاول تكعد

٢_ يا أما أنت تصير متحكم بكلشي وتحلم باللي تريده وتسوي إلي تريده وتحجي وتتناقش عدل وتروح لأي مكان تريده

شنو الي يتحكم بهاي الاشياء وحسب شنو يصير إلك رقم واحد أو رقم اثنين؟ أولاً حسب جسمك تعبان من اليوم الطويل أو لا ثانياً حسب عقلك الباطن شنو محمل من أفكار ثالثاً حسب أفكارك أنت الي تعرف عنها و شنو عبالك رابعاً حسب الي مريت بيه واخر شي حسب الأمراض الي عندك أي نعم إذا تحس بألم بجسمك من الضرب اذا ضربوك ف بالواقع محد جاي يضربك حتى بالحلم بس أنت عندك مرض معين أو جسمك تعبان من العمل وتصير بيه نغزات أو حتى شخص من اهلك أو إلي حواليك جاي يكعدك لذلك جسمك إذاك وانت نايم ووصل هذا الشي لعقلك إلي حوله لتصرفات داخل الحلم أي نعم ما تتحكم للأسف بعد كل هذا اللغو أنا ما جاي اخدعك والعب على عقلك أنا جاي اكلك الحقائق بالتدريج حتى تفتهمها وحدة وحدة

بالتالي تكدر هسة أنت تجرب أي شي من إلي كلته أنا وتتأكد منه بنفسك، وأتمنى تشاركوني تجاربكم لأن عندي فضول هل بس أنا استوعبت فكرة الأحلام واليتها أو كل شخص وعنده شي مختلف