u/Additional-Action353

سمعتها اكثر من مرة، للشخص الي توه بادي او مايروح النادي اصلا قد تكون هذي العباره مالها معنى، لكن بالنسبة للشخص الملتزم الجمله صعبه جداً.

ولو بنكون واقعيين محد بيهفهم سبب التزامك، محد مهتم باهدافك، مافيه شخص قاعد على الدكة ويشجعك طول الوقت.

اغلب الشغل بتكون انت، انت بروحك.
اذا عندك تصور دقيق للشي الي تبي توصله والشي الي تبي تسويه ماراح يكون مطلوب منك غير انك تسوي الشي وبس.

المشكلة انه هذا الطريق بياخذ وقت، العضلات ماتطلع بيوم وليلة، راح تنزعج بالسوشل ميديا لما تقرا كومنت واحد وزنه ١٤٠ ويقولك انه الشغل الي انت وصلتله بسنتين اهو يقدر يوصله بشهرين، وراح تنزعج لما تسمع كلام من ناس عمرهم ماكملو يومين ورا بعض يتفلسفون عليك وعلى نتايجك.

الهدف الي تبي توصله بياخذ سنين، ولما اقولك سنين اقصد عادي ٥، لان الهدف عمره ماراح يثبت وكل ما تتطور تبي توصل لمستوى اعلى، فبالواقع عمرك ماراح توصل للهدف لانه دايماً بيتغير وبيصير اصعب.

انا اشوف هذا اجمل جزء من اللعبه، مهما شرحت لشخص اهدافك وشلون كل سنه تتطور او تتغير، عمره ماراح يهتم ولا راح يفهم بالدرجة الي انت مهتم فيها، الموضوع مو بس جسدي بل هو نفسي، انك دايما تسعى للهدف الي تبيه بينك وبين نفسك حتى لو تمر شهور وماتشوف تطور ملحوظ، هذا الوقت الي المفروض تستمر فيه لان الاغلب يوقف عند ابسط عائق.

ورجائاً اسكت، مو لازم تتكلم عن كل شي تبي تسويه قبل لا تسوي الشي، حرفيا اسكت، سو الشغل المطلوب، لما تطلع النتيجة روح حطها اعلان بالشارع، لكن لما انت تقعد تقول بسوي وبسوي انت بس قاعد تسوي هذا الشي عشان توهم نفسك انك انسان قاعد يحقق طموحه وبالواقع مجرد كلام وانا وانت عارف انك عمرك ماسويت شي قلت "تبي تسويه".

-باتمان

لو خيروك انك تاخذ مليون دولار حالياً، او ترجع عمرك ٦ سنين لكن مع كل الخبرة والمعلومات الي عندك وكل شي تعرفه، شنو بتختار؟

السلام عليكم، قبل جم يوم شفت اكثر من فيديو عن ناس تطور العاب روبلكس وتسوي العاب من الصفر باستخدام claude، والموضوع فعلا مربح بشكل مو طبيعي اذا اللعبه اشتهرت، هل فيه احد عنده تجارب مع هالموضوع لان عمري مابرمجت شي بروبلكس واخر مرة لعبتها قبل ٥ سنين.

بقولكم موقف صار معاي امس بتمرين الصدر، انا من النوع الي ملتزم بنفس الاجهزة ونفس الترتيب صارلي شهور ماغيرت شي واذا فيه احد بالجهاز عادي ادخل معاه او انتظره يخلص اذا باقيله شوي.
المهم شفت واحد على جهاز الصدر فراشه قاعد وهو واضح مبتدئ جداً جداً، قلتله كبتن كم باقيلك؟ قالي ٥ جولات، طبعاً ماقدر اقول شي انا يعني كيفه هو وجدوله، قلتله عادي ادخل معاك؟ قالي لا.
انا هني حاشتني صدمة وبنفس الوقت مبهور من ثقة النفس الي عنده فقلت اتركه وامشي احسنلي عشان ما اخرب مزاجي خصوصاً انه يوم صدر.
بس بعدين تذكرت انه هذا الموقف كان يصير معاي بشكل مستمر ودايما يكونون مستجدين، فقلت اعلمه شوي اتكيت النادي، ومنها هم بقول للمستجدين بعض النصايح بالتعامل، لان النادي مو بس مكان تبني فيه عضلات وفيه اسلوب تعامل تتعلمه.
شوف يا عزيزي المستجد، انا لما اسالك انت جم جولة باقيلك، هذا مو فضولاً مني بعرف جدولك الخيالي، يعني انا ماقررت اليوم بروح عند هذا الجهاز وبعرف الي قاعدين عله بالعاده جم جولة يلعبون، انا قاعد اسالك عشان ادخل معاك مو اكثر ولا اقل، فمن الاحترام انه لما اسالك جم جولة باقيلك تقولي جم وتسالني تبي تدخل؟ هذي اساسيات التعامل بالنادي وشي بديهي.
والشغله الثانيه، لما تكونون قروب ٣ واكثر، تصرف جدا طفولي انكم تحاولون تدخلون مع واحد بالتمرين،
انا وانت عارفين انه بتقعدون ساعه تسولفون بين الجولات، بالتالي الراحه عنده بتصير ٤ دقايق وفوق وتكون انت خربت تمرينه.
فمعلش هدو اعصابكم وعادي اذا فيه احد بيدخل معاك، انت وقت الراحه عندك بين الجولات اصلا دقيقة ونص عالاقل، فمن البديهي انه هالدقيقة ونص ممكن يلعب فيها عادي، وانا اذا شفت انه اهو مستعجل، قوله يدخل جوله ثانية، حركه ماحب اسويها بس بتخليه انا ينطر بين الجولات على ما تاخذ وقت راحتك، او انه يدخل على طول جولة ثانية، بالتالي انت حرفيا تمرينك ماتغير ووقت الراحه نفسه.
-باتمان

بما انه بوست السوارة عجبكم فبتكلم عن موضوع مشابه، استخدام الساعات بالنادي عشان تحسب السعرات الي حرقتها غير دقيق نهاىياً لأن كثير ناس يعتمدون على رقم الساعة كأنه شيء دقيق جدًا، مع إن أغلب الساعات والساعات بالأجهزة الرياضية تحسب السعرات بناءً على معادلات تقديرية فقط، مو على قياس فعلي لكمية الطاقة اللي جسمك صرفها.

حتى الدراسات غالبًا تلقى فرق كبير بين الرقم الحقيقي والرقم اللي تعطيه الساعة، خصوصًا بتمارين الحديد، لأن الساعة تعتمد أكثر على نبض القلب والحركة، بينما تمارين المقاومة فيها عوامل كثيرة ما تنقاس بهالطريقة.

فإذا ساعتك قالت إنك حرقت ٨٠٠ سعرة، مو معناته فعلًا حرقت ٨٠٠، أحيانًا يكون الفرق كبير جدًا.

انا انصح انه تستخدمها لحساب الخطوات بس مو حرق السعرات لان حاله حال الinbody غير دقيق نهائياً وممكن اسوي بوست عنه بعدين.

بس حاب انبه الناس الي تحط اكاونتها برايفت، ترا كل شي مكشوف وفيه اكثر من طريقه انه تطلع بوستاتك وكومنتاتك وكل تفاعلك حتى لو كان اكاونتك خاص، رسالتي موجهة للي يتناقشون والاقيه مناقض نفسه بمكان ثاني، مثل الي ينصح بشي وبصب ثاني يشجع نفس الشي الي كان ينتقده، حتى لو اكاونتك برايفت الي يبي يقدر يشوف.

صارلي اسابيع قاعد اعاني مع النوم لان المطرح الي طلبته طلع وايد صلب، ابيكم تعطوني من تجاربكم مطارح صج مريحه وميزانيتي مفتوحة عادي مهما كان السعر، هم اذا عندكم اقتراحات حق مخدات اكون شاكر جداً.

جيم شارك فتح بالكويت ونفس المتوقع، الاسعار مبالغ فيها، ليش تيشيرت ب١٨ يعني ماعتقد انه منطقي خصوصاً انه تيشيرت حق نادي، وحتى ماعليه شي مجرد لوقو جيم شارك.
ولما نقارنه بمحلات نفس الجودة مثل pull&bear تلاقي الاوفر سايز ب٦-٨، انا مو من النوع الي ابخل بالملابس وعادي اشتري بس جذي الوضع اوفر يعني صار بس عشان اللوقو ادفع دبل سعر التيشيرت مو معقول..

السلام عليكم، فيه احد منكم جرب يطلب مكملات من برا الكويت؟ اتكلم بروتين كرياتين الخ مو سوالف اي هيرب، ماوي اطلب من شركة RAW جم شغلة نفس الي تنباع بهيلث هاوس بس انه براندات ثانية، وابي اسمع تجاربكم اذا وصلتكم المنتجات خربانه او شي، لان رفيجي مرة طلب من امريكا والبودر وصل حرفيا مطبوخ من الحر ومتكتل مع انه شركة معروفة فمستحيل يكون منهم،
+هل في اشياء لازم انتبه منها عشان الجمارك؟