u/Blackhorselover

بستغرب فشخ من الناس اللي هنا اللي بتطلع و تقول و تفتخر انهم منعزلين إجتماعيا و مش بيتعاملوا مع ناس و انهم في الحقيقة بيكرهوا الناس إلخ

حضرتك دي مش حاجة تفتخر بها، العزلة الاجتماعية بتحول الإنسان بطريقة مش كويسة

مبدئيا كده بسم الله الرحمن الرحيم

١- زيادة القلق و الاكتئاب

٢- زيادة التفكير المشوه و السلبي

٣- التخدر العاطفي و اللامبالاة

٤- مشاكل في النوم

٥- زيادة في التوتر

٦- مشاكل في التركيز و في الذاكرة

إلخ

ده غير كمان ان الناس بتعمل حاجة كده زي ضبط عندنا، الناس اللي حواليك بيعملوا ضبط و تنظيم لنفسك و تفكيرك

الوحدة و عدم التعامل مع الناس بيعمل حاجة زي feedback loop (دورة ردود فعل) تفكيرك المشوه كل شوية بيتعمله validation من نفسك لأن مفيش اي حد بيتحدى طريقة تفكيرك لكن لما يكون في حد و يجادل معاك أو يتحدى تفكيرك فا ده بيجبرك انك تفكر بطريقة ثانية و تطلع من القوقعة و الكهف بتاعك الفكري

و في حاجات كثيرة ثانية بس هنكتفي بده

بجد مفيش شيء بشمئز منه أكثر من اني أشوف إنسان وصلت له الدونية انه يحتقر أصله و يتعامل مع أصله انه عار على سبيل انه يكسب ثقة و تعاطف الأجنبي و في الغالب بياخذ على قفاه لأن الأجنبي بيقل منه و هو كمان مش بيحترمه، ما هو طبيعي، إذا كان أنت مش محترم نفسك و بتقلل من أصلك، أحترمك أنا ليه؟

المشكلة هي ان الناس مهما حاولت تهرب و تتبرئ من جنسيتها و أصلها فهي هتفضل كده لحد مماتها

عمري ما هنسى لما جه رجل هنا و كتب في تعليق بوست انه في مديرين اثنين أوروبين اتهموه انه حرامي و نصاب و قلوا منه بدون سبب و هو برر فعلهم و قال "ما احنا نستحق احنا فعلا شعب نصاب"

ساب نفسه يتم إهانته و التقليل و التحقير منه علشان عقدة الدونية و الخواجة اللي عنده

المرة الجاية أبقى انزل على أطرافك الأربعة و ألحس جزمة الأوروبي السامي المتفوق علشان أنت مجرد مصري دنيء و حقير بطبعك و بالتالي لا تستحق ان تكون في وجود السادات الاوروبين المتحضرين بل واجب عليك انك تشكرهم انهم شرفوك لدرجة انهم سابوك عايش و سابوك تلحس أجزامهم

حاجة تكسف

ممكن مكونش أكثر شخص لبق فا مش عارف أوصل نقطتي لكن حاجة أنا بستغرب منها جدا لما بشوف مثلا ملحدين أو لا إنجابيين أو غيرهم من الناس اللي بيقعدوا يشتكوا من شر هذا العالم و يقعدوا يعاتبوا الله عز و جل على وجودهم أو على وجود الشر في العموم

لكن نفس الشخص عمره في حياته ما حاسب ربنا (استغفر الله فهو لا يحاسب) على الخير، يعني أنا عمري ما شوفت ملحد أو لا إنجابي عاوز مبرر للصحة، اللغة، العين، العقل، القلب، اللذة، الحب ، السعادة إلخ كل ده خير جاي ناحيتك لكنك عمرك ما تسألت "هو أنا ليه عندي كل الخير ده؟" بل بتتعامل معاه انه حق مكتسب

طب ليه بتتعامل مع الخير اللي ربنا أداهولك انه حق مكتسب لكن الشر محتاج مبرر؟ ده مش منطق، ده انحياز عندك لأن لو احنا هنقيس الموضوع من ناحية علمية فا أنت ملكش حق لأي خير، الكون مش مهتم بك ولا أنت حاجة له، كل خير بيحصلك هو مجرد صدف لا أكثر لا أقل، مش استحقاق لك

حقا صدق الله العظيم عندما قال "وَإِذا أَذَقنَا الإِنسانَ مِنّا رَحمَةً فَرِحَ بِها وَإِن تُصِبهُم سَيِّئَةٌ بِما قَدَّمَت أَيديهِم فَإِنَّ الإِنسانَ كَفورٌ"

و ده مش رأي شخصي، ده حقيقة موضوعية

و أنا هنا بتكلم عن العاطفة العادية، مش التهور، التهور هو ان الواحد يكون عاطفي جدا و ميمسكش المنطق

أنا بتكلم بمنتهى الجدية

أنا بكره جدا جدا جدا الناس بتوع المحتوى النسوي أو محتوى الحباية الحمراء اللي أغلبه عبارة عن شحن و عداوة بين الجنسين

ده يقولك النسوان كلها شمال و ان مفيش حاجة اسمها ان الست تحب أو ان حبها بيبقى مادي بحت و يعلمك ازاي تكون رجل قاسي القلب و مستبد و معقد و زاني

دي تقولك ان الرجالة كلهم ولاد كلب و معندهمش مشاعر و استغلالين و مش بيحبك أو حبه مبني على جسدك فقط و تعلمك ازاي تكون بنت معقدة و ظالمة و قاسية

أنا صراحة شايف ان الناس دي من ضمن المفسدون في الأرض اللي ربنا أتكلم عنهم لأنهم فعلا ناس فاسدة و بيفسدوا الشباب و الناس في العموم و بيخلوا في عداوة و كراهية بين الجنسين و بعضهم و في الأخر الكل بيطلع خسران لأن لا الرجل يقدر يعيش من غير الست ولا الست تقدر تعيش من غير رجل

فا بجد حسبنا الله و نعم الوكيل

عمري ما هفهم ليه الناس المتشائمة عندهم إحساس وهمي انهم بسبب تشاؤمهم و سوداويتهم انهم كده أذكياء و واعيين أكثر من بقية الناس

حتى تلاقيه يقعد يحقر على الشخص الفرحان أو المتفائل الراجي انه "بسيط" ، "غبي" ، "مش مثقف" ، "دماغه أبيض" اي كلام علشان يبين انه إنسان متخلف و معندهوش عقل زي بقية البشر بينما المتشائم هو اللي ذكي و اللي بيفكر و عنده وعي