u/CalmCarrot1

آخر فترة عندنا وايد أعراس في العايلة وكلهم ورا بعض تبارك الله وأغلبهم بنات (يعني نحن اهل العروس)
لاحظت انه ابويه مب على بعضه جي موده تعبان، يوم فضفض قال لي احس انه شوي شوي بتسيرون عني🥺 يتني صييحه واقوله لا بابا مستحيل بنتم وياك، قال هاي سنة الحياة أنا صح ما بعطي بناتي لأي حد لكن ما اتخيل انكم تسيرون حتى لو كان ريال زين
والحين يالسه افكر واقول ف خاطري كيف يعنيي أنا بطلع من بيت ابوي وبسير بيت غريب؟؟ اعرف انه ريلي وجي لكن بعد احسه شعور غريب ويباله تعود
البنات الي معرسات شو كان شعوركم من هالناحية؟

قبل فترة صار لي موقف وايد غريب في الشوفة وللحين مب قادرة اطلعه من مخي.
اولاً أنا ما افكر بالزواج حالياً، ف يوم حد يرشحني لشخص نادر ما يوصل الموضوع للشوفة لاني ارفض من البداية. قبل فترة، تقدم لي شخص من المعارف من خلال الترشيحات، وامي وابويه سألوا عنه وعن اهله وكان ريال (ظاهرياً) ما ينعاب واهله ناس والنعم، ف امي أقنعتني ايلس وياه بس.
في الشوفة من ضمن السوالف قال انه يحب يوم علاقة الحرمة بريلها تكون علاقة صداقة وربع يعني يسيرون ويردون ويا بعض بعفوية ما يكون كل شي planned. قلت حلو أنا بعد جي احب.
عقب قال: "يعني مثلاً وحدة من اهلي جي مع ريلها. دوم يسافرون مع بعض ويسوون مغامرات وحتى تاخذ راحتها وايد فاللبس يعني عادي تلبس تنانير قصيرة ولو ساروا البحر تلبس لبس سباحة ويتمشون على البحر جنهم أجانب، صدق احسدهم جنهم ربع" وتم يضحك. البحر عام ع فكرة مب برايڤت.
أنا ويهي غدا جي😶
قلت له هيه زين، وفي مخي اقول انه يعني أنا ما لبست تنانير الحين تباني البس وانا معرسه؟ وشقا ما تغار؟ ووين سار العيب والحرام؟
قلت له انه أنا ماتوقع اني اقدر اكون جي، جان يقول اونه هيه عادي هي قناعات. قناعات تشل راسك حبيبي شو هالقناعات الزبالة؟؟؟
مسكت عمري بكل ما أوتيت من قوة، ومن طلعوا من الباب قلت حق ماما الي استوى وطبعا رفضنا
لكن الصراحة انصدمت انه في ناس جي. أنا الي أحيده انه الريال يقول حق حرمته تتحجب/تتنقب/تتستر، مب العكس!

مرحبا يا جماعة الخير
أنا اموت واعرف الي يتخقق ويشوف عمره على غيره لانه من القبيلة الفلانية على شو مشتط وذابح عمره ومن وين يايب حب الذات الماصخ هذا؟ ترانا كلنا من مكان واحد وشفنا واحتكينا بناس وأجناس لكن هالحركات الواطية مادري من وين تطلع، والي يرفع الضغط اكثر يوم نشوفها بين اليهال الي المفروض يكونون أبرياء ولا يعرفون في هاي الاشيا
اليوم اختي يايه من المدرسة تقول انه وحدة في الصف تتنمر على وحدة ثانية لانها من قبيلة معينة، والثانية حليلها تمت تصيح. هم في الصف الثامن!
اللوم الصراحة على الاهل لانه الياهل ما بييب هاي الأفكار من نفسه، اكيد شاف ولا سمع اهله يتكلمون ب هاي الطريقة. الي عيزان عن التربية ياخي لا يخلف مب لازم، ولا تبلون عيال الناس بعيالكم.
ولا ننسى كلام رسلونا الكريم: "كلكم لآدم وآدم من تراب"

غير بنادول نايت وبنادول زفت كلهم ما يسوون لي شي

تبارك الله لا تحاتون مب حاطين عيوننا عليكم

اغلب الوقت كلاساتي من ثمان لين اربع، ولين اوصل البيت ويا الزحمه توصل الساعة قرب الخمس وربع
اليوم اعتقونا لوجه الله، وصلت البيت الساعة ١١ ومريت على ماما وسرنا تريقنا وتسوقنا في المول وهو هادي واكتشفت انه اليوم فعلاً فيه 24 ساعة😌

عالعموم اللهم لك الحمد انه دواماتنا ودراستنا وخدمة بلادنا هي اكبر همومنا. الله يديمها من نعمة ويحفظها من الزوال

هاي الجملة كنت اسمع امي دايماً تقولها لعيال خالي واخوي وبشكل عام المقبلين على الزواج، وكنت اختلف معاها، لكن مرت الايام واقتنعت انه صدق البنت (اغلب الوقت) ما تسير بعيد عن امها، وهالشي شفته بعيني في كذا بنت.
الي امها ما تتعاشر وفيها طبايع سيئة بالعادة تطلع شراتها وتكون عشرتها صعبة، والي امها هادية وحبوبة بالعادة البنت تطلع عليها وريلها يكون مرتاح.
شو رايكم انتوا؟

النت شغال في البيت وعلى تلفونات كل اخواني إلا لابتوبي (يعني طالع انه connected لكن مب شغال)
سويت forget network لكن ما اشتغل وسكرت الراوتر ورديت شغلته والحين نفس الشي صار لكن على فوني أنا بس. شو الحل؟؟ ابغي ادرس مب عارفه كيف

آخر فترة اسمع وايدين من معارفنا واهلنا يدورون على عروس، وكل واحد يعطي مواصفاته والمواصفات الي يدور عليها في شريكة حياته والي تعرف وحدة تطابق هاي المواصفات ترشحها لأهل الريال.

الي لاحظته انه اغلب الشروط هي نفسها سواء كان الريال عشريني ولا ثلاثيني ولا أربعيني. تكون البنت صغيره، حلووووه موت، بيييضه، جسمها مرتب، و دارسة (مش دايماً) وخالاتي رشحوا كذا بنت لكن يوم الريال يشوف الصورة الشخصية او يسير بيت اهل البنت يرفض ويقول مب هاذي الي ادور عليها (يعني تكون في باله ملامح معينة).

طبعا مافي اي مشكلة في اختلاف الأذواق وكلٍ له ذوقه ولو كان ذوق صعب ودقيق، لكن مب معقولة الكل عنده type وستايل معين. إذا جي الوضع البنات العاديات متى اييهن نصيبهن؟ واحس لو أنا ريال الموضوع سهالات يعني بقول حق أهلي المواصفات الي اباها بالملي وهم بييبون لي وحدة مثل ما ابا، لكن البنت وضعها شوي أصعب ما تقدر تتشرط واييها فارس الاحلام مفصل لها

الموضوع اكيد كله نصيب وأقدار مكتوبة لكن بعد الواحد تيه هالتساؤلات لانه الشخص يوم بيي يخطب اول شي يشوف البنت نظرة عامة شكلياً، إذا اوكيه عقب يشوف الشخصية والطبايع والكفت.

(مب غلط انه الشخص يكون عنده ستايل يحبه وهالبوست نيته مب هجوميه أبدا وشكرا)

السالفة ومافيها انه عندنا شخص من المعارف شروطه جداً دقيقة وصعبه، باختصار يبغي وحده تكون ملكة جمال نازلة من السماء، وتقريبا لف على كل بيوت دبي وما لقى وحده تستوفي معاييره.

السلطان هامان هذا رشحناله وحده نعرفها أنا وامي، وحدة كلمة جميلة شوية عليها تبارك الرحمن كاملة والكامل الله من مواصفات وشكل جسم وملامحها مرسومة رسم، غير انها من عايلة والنعم فيهم وجداً محترمين والبنت حشيم. البنت قريب تدخل الثلاثين وللحين مب معرسه (ونحن أصلا مستغربين لانه بنت بهالجمال مستحييل تتطوف وتيلس لين هذا العمر)

سار الاخ ويا اهله بيت البنت، واهله تخبلوا عليها وعلى جمالها ونعومتها وأمه بالذات على طوول خذت راحتها لانها كانت متأكده انه هاي البنت الي ولدها يدور عليها، لكن يوم دخل الريال ويلس حذال البنت وحط عينه في عينها فز من مكانه من الزيغة وسار يلس في ابعد كرسي عنها عند الباب، وما قال لها ولا كلمة طوول الوقت وطلع.

يوم ركبوا السياره امه قالت له اخيرا لقينا لك البنت الي تدورها. قال نعم؟؟ كيف هاي الي ادورها؟؟ هاي تخوف ما شفتوا ويهها كيف؟؟ طبعا هم انصدموا من كلامه.

عقب قال لاهله بنت بالمواصفات الي انتوا تقولون عنها مستحيل توصل لهالعمر وما تكون معرسه، اكيد حد مسولها شي عشان تكون قبيحة في عين الخطاب. قال البنت الي توصفونها انتوا مب نفسها الي شفتها، أنا شفت وحده خشمها عود وويها منتفخ والبنت ويهها نتفه وخشمها سلة سيف أنا شايفتنها ب عيني! ف امي تحس انه في ذمتها انه توصل هالكلام لام البنت (بس بطريقة اوكيه) عشان تتلاحق على بنتها وتقرى عليها وجي.

خلاصة الكلام انه هالدنيا تخوف وفي ناس صدق قلوبهم سوده عافان الله واياكم، الواحد لازم يتحصن ويتحذر

شفت بوست في حساب على الانستا انه كيف تخلين ريلج يحبج وما يرد لج طلب، وكللل التعليقات يقولون سوي عمرج هبله وماتعرفين تسوين شي بدونه حتى لو شي بسيط قولي لا انته علمني انته تعرف احسن عني محد يسوي الشي الفلاني شراتك + يقولون سوي عمرج ياهل which I found so creepy بس اوكيه

صدق جي الموضوع؟🤣 I feel like I’ll cringe so hard at myself if I ever did that

شو الشي الي يخليكم تقولون في خاطركم في نص الطلعة "هاي آخر مره اطلع مع هالانسان"

أنا صغيره في العمر (ما وصلت العشرين) وبعدني في ثالث سنه جامعة وما أفكر في الزواج نهائياً حالياً. لكن قبل يومين ملجت بنت خالي الي اعتبرها اختي، نسوي كل شي ويا بعض ونتجابل كل يوم من نحن صغار، وهي اكبر عني ب سنتين فقط، ويشهد الله اني اتمنى لها كل خير، لكن هل طبيعي اني حسيت اني متأخره؟
ادري I might sound stupid لكن أنا ادرس طب يعني مشواري في الدراسه طويل ف احس غيري بيخلص وبيعرس وانا بعدني، لو دارسه اي شي ثاني جان مخلصه السنه اليايه مثلاً، ويوم شفت الي في عمري (حتى لو بعدهم صغار) يعرسون، بديت احس اني متأخره وصدق يلست اهوجس واقول في خاطري اني لو تأخرت الفرق بيني وبين عيالي ف العمر بيكون كبير وانا مابا هالشي (وايد تعمقت ف الموضوع😂)
المهم زغت شويه يعني

العنوان^^

كنت أتناقش ويا ريل خالتي قبل اسبوع. هو ماشاءلله عليه تعريف كلمة family man من كل النواحي ومب مقصر في بيته ولا عيال ولا حرمته، لكن قال كلام وصدمني

قال من الي أشوفه واعرفه ٩٠٪؜ من الرياييل الود ودهم ياخذون الثانية لكن الي ميودنهم هو انهم مفاليس او مالهم خلق المشاكل وصدعة الراس (اتوقع قال ٩٠٪؜ عشان يوضح حق حرمته انه من ال١٠٪؜ 😂)

والي خلاني أفكر اكثر هو انه سمعت سالفة وحده ريلها عرس عليها عقب خمس عيال و اكثر عن عشرين سنة زواج! بحجة انه أنا خلاص وفرت لج بيت والعيال كبروا ومن هالكلام

لكن هل هالكلام صحيح؟ والأغلب حتى لو مرتاح في بيته لو تيه الفرصه انه يعدد بيعدد؟

بما انه يبنا طاري البخل، خبرونا من وجهة نظركم شو الفرق بين البخل والحرص، وهل ممكن تتزوجون شخص حريص؟

أنا عندي سؤال، سليط اللسان هل يتلذذ بإحراج الناس وكسر قلوبهم ولا هي عادة تعود عليها وما يقدر يتركها؟؟
امس كنت أتدرب في مستشفى في دبي، والمستشفى هاي بالذات دايمااً زحمة. موظفة الاستقبال دكتورة من جنسية عربية، ما قدرت تتوظف كدكتورة لانها ما تخصصت ف رضت بالوظيفة، وهي حرمة في قمة الاحترام.
شفت ريال مواطن يايب امه وهي على كرسي متحرك. سار صوب الاستقبال والظاهر انه الموظفة ما فهمت على سؤاله او جاوبته جواب غلط، لكن الأكيد انها ما كانت قاصدة. تخيلوا قال ب صوت عالي حق امه: امي خل نروح عنها هاذيل ميلسين بقرة ف الاستقبال. والصوت كان مسموع وكل حد سمعه وصد على الموظفة. والله حسيت لو اني مكانها جان صحت في مكاني!
اعوذ بالله من قسوة القلب

مرحبا يا جماعة الخير

أنا اكبر اخواني وعندي اخوان في مختلف الأعمار، من المراهقة الى الطفولة وأصغرنا عمره سنتين، ونحن عايلة لا متشددين وايد دينياً ولا راخين، يعني وسط.
لتقريب الصورة، نحن نحط ميكب (بالمعقول) ونلبس عبي ملونة وكذا، لكن ابويه جداً مهم عنده انه ولا شعرة تطلع من الشيلة، وما يداني سوالف تركيب اظافر ورموش وفلر وهالسوالف.
احيد يوم كنت صغيرة وبديت البس الشيلة والعباه، كان وايد ينبه علي من هالناحية، ويهزبني لو نبهني كم مره وتم شعري طالع، وصح ابويه كان ولازال صديقي الصدوق لكن ما كنت اتجرأ أرادد. وقتها عقب الهزاب كنت ازعل لكن الحمدلله الحين عرفت قدر هذا الشي ويوم ارد بالذاكرة ورا أشوف انه أسلوبه في التربية وياي و ويا اخوي كان ممتاز.
الحين عندي اختي في بداية سن المراهقة، وأبداً ماشوف انها يالسة تحصل نفس المعاملة. هي اختي ف اكيد اني مابا أشوفها تنهزب ولا ارضى عليها، لكنها ملسونه وايد وايد وفيها جرأة فضيعة، يعني شعرها يطلع من الشيله وعباتها مبطلة ولو ابويه ولا امي قالولها شي تتأفف وتعدل الشيلة من ورا خاطرها عشان تسكتهم لكن ترد تطلع شعرها يوم يلهون عنها، وعلى اي طلعة تسير تركب أظافر الساحرات (ع قولة بابا🤣)، وميكبها جداً مبالغ فيه بالذات انها بعدها صغيره! وكذا مرة شفتها تعلي صوتها على امي وأبويه وقلبي يعورني عليهم
حاولت اكلمها بالزين مره مرتين لكن ماشي فايدة، وامي وأبويه تعبوا ف ما قاموا ينصحون بس يون عندي ويتحرطمون عليها من وراها او يقولون لي انتي رمسيها لانج اختها العودة، قلت لهم ترا أنا اختها مب امها، لو قلت اي شي بتقول والله ماما وبابا راضين شدخلج؟ وفعلاً هذا الي يصير
وانا انسانه ابدااااا ما اتحمل قلة الادب، اذبحيني لكن لا ترمسيني بأسلوب زق، وهي كل ما أنبهها عن موضوع شعرها ولا مكياجها ولا كذا ترمسيني بأسلوب جداً وتصارخ علي وهالحركات تكرهني فيها، ف قمت ما أتدخل وايد إلا لو صدق شفتها مبالغة، لكن في نفس الوقت ما ارضى انه الناس يشوفون شعرها ولا يشوفونها متزينة بهاي الطريقة.
لو عندكم نصايح ولا تعاملتوا مع بنات في هالعمر الخايس فيدونا يزاكم الله خير🙏🏻 تعبنا ونحن ننصح بدون فايده

ما قدرت ألقى الفيديو للأسف، لكن اتوقع الاغلب شافوه. د. مايا الهواري قالت في مقابلة: التعدد للمرأة صحي لانه الريال يباله مجابل وعقب ثاني وثالث ياهل الحرمة يصعب عليها انها توازن وتعطي الريال حقه، ف يوم يكون معدد يكون عند الحرمة فجة شوي انها توازن.
شو رايكم فالكلام؟ عن نفسي ارتفع ضغطي لكن نشوف آرائكم🙂

اليوم كنت اسولف ويا خالاتي (كلهن معرسات ومعيلات)، وهم ب شكل عام قلوبهم رهيفه جدااااا يعني بشكل مبالغ فيه، يتلومون في كل حد دايماً وحساسات ويجلدون ذاتهم وايد هم من هالنوع يعني. المهم كنا نتكلم عن هالموضوع وانه كيف كلهم من الأمهات للبنات فيهم نفس الطبع، ف اصغر خالة عندي قالت كلام للحين أفكر فيه وودي اعرف لو في ناس نفسها.
قالت أنا وايد اتلوم في عيالي، دايماً احس اني مقصره واني ما سويت لهم شي ولا اني ما عطيتهم حقهم ولا ما سولفت وياهم، لدرجة انه يوم ايي الليل عقب ما أرقدهم ايلس اتلوم وعادي ما اييني رقاد لاني احس اني مقصرة في حقهم، وكثر ما اسويلهم بعد احس اني مقصرة في حقهم.
للعلم خالتي هاي اكثر وحده تدلع عيالها وتسويلهم وتعطيهم الي تقدر عليه وزيادة، دوم اقولها خالوه انتي تدلعينهم وايد من جي مستقويين عليج (وفعلاً بنتها ياهل لكن لسانها شطوله🤣). انصدمت انه بالرغم من كل الي تسويه بعد تحس بتأنيب الضمير! هل هالشعور طبيعي تحس فيه الام من باب انها تحب عيالها يعني؟

جربتوا تطلبونهم؟ وهل صدق يثبتون الشعر؟ اشوفه يرابع من مكان لمكان ولا شعره تتحرك تبارك الله