ايه افضل طريقه اشتري بيها سياره ؟
عايز أشتري عربية، وطبعًا كلنا عارفين إن أسعار العربيات في مصر غريبة جدًا، وخصوصًا المستعمل اللي ساعات بيبقى سعره مش منطقي مقارنة بالزيرو.
بعد تفكير قررت أجيب زيرو وأريح دماغي من قصة الكشف على المستعمل، والحوادث والدهانات والعداد والكلام ده كله، خصوصًا إنها أول عربية ليا ومش عندي خبرة كبيرة في الموضوع.
دلوقتي الحيرة عندي في طريقة الدفع.
أنا الحمد لله أقدر أدفع سعر العربية كاش، وفي نفس الوقت عندي استثمارات قائمة، فمش محتاج أقسط بسبب عدم توفر الفلوس.
المشكلة إني عمري ما اشتريت حاجة بالتقسيط، ومش بحب نفسيًا فكرة إن يبقى عليا أقساط أو ديون. لكن في نفس الوقت حاسس إن دفع تمن العربية كله كاش مرة واحدة معناه إني بضيع الـ opportunity cost بتاعة الفلوس دي، خصوصًا لو ممكن تفضل مستثمرة وتحقق عائد.
فالاختيارات اللي بفكر فيها:
- أدفع كاش بالكامل وخلاص، بس نفسيًا صعب شوية أدفع المبلغ كله مرة واحدة، وكمان هخسر فرصة استثمار الفلوس دي وعوائدها
- أدفع حوالي 50% مقدم وأقسط الباقي على سنة واحدة، بحيث القسط يتدفع من المرتب وعوائد الاستثمارات، وأسيب باقي رأس المال شغال.
وعارف إن شراء عربية زيرو ماليًا مش أحسن استثمار وإن قيمتها بتنزل بمجرد ما تخرج من المعرض، لكن بالنسبة لي هو تحقيق حلم من الصغر وانا بحب العربيات.
لو مكاني ومعاكم تمن العربية كاش، وفي نفس الوقت الفلوس مستثمرة، هتدفعوا كاش ولا تدفعوا مقدم كبير وتقسطوا الباقي لمدة سنة؟
وياريت اللي مر بتجربة مشابهة يقول عمل إيه وهل ندم على قرار الكاش أو التقسيط, ايه القرار الصحيح ماليا ؟