u/Existing_Sky_776

https://reddit.com/link/1tv3m6e/video/o0ai7utikx4h1/player

وبس للمعلومة
الطبيب المقيم الدوري في فلسطين يستلم ٢٠ ورقة
بالسعودية ٢٩ ورقة وبالعراق ورقتين وهم ما مستلمهن ههههه

اهلا شباب، اريد اطرح موضوع يقهرني ويغثني كلش بخصوص واقعنا التعليمي والثقافي، والتناقض العجيب اللي عايشين بيه.

المدارس عدنه تعاني من مشاكل أساسية بالبنية التحتية؛ عطل متكررة، صفوف كرفانية وطينية غير مؤهلة، ومختبرات شبه معدومة. والمواد العلمية ما جاي تاخذ حقها بشكل حقيقي، والطالب يطلع منها غالباً بفهم نظري ضعيف او اساسا بلا فهم بسبب هذا الإهمال وضعف المناهج والبيئة الطاردة للابداع العلمي.

بالمقابل، الجانب الإبداعي والفني شبه مُلغى وصارت المدارس مليانة بالأموات تحسها مجرد سجن روتيني. عندك مثلا مادة الفنية موجودة شكلياً بس عملياً ميتة، ومدرس الفنية ماله أي حضور أو وجود حقيقي ويستلم راتب كبطالة مقنعة، والحصص تروح لبقية المواد. ماكو مساحة حقيقية للتجربة أو تطوير مهارات أو حتى اهتمام جدي من المنظومة التعليمية بالامر. بالمقابل، يتم التركيز على مادة الإسلامية بكتب بمئات الصفحات على طول سنين الدراسة و اللي مليانة تأويلات وتفسيرات تختلف من مذهب لثاني، وتفرض برؤية أحادية من جهة واحدة دون السماح لأي طالب بالاعتراض أو النقاش أو التفكير النقدي، وهذا يعمّق فكرة الامتثال والتلقين بدل الفهم. المشكلة هنا مو “دين أو لا دين”، المشكلة هي تحويل التعليم إلى مساحة طاعة فقط، مع إلغاء أي منافذ للتعبير كالرسم والموسيقى وارهاق الطالب بمادة لا تغني ولا تسمن.

فيعني ليش ما يكون عدنه مساحة حقيقية للموسيقى أو أدوات العزف كجزء من التعليم؟ الموسيقى والفن مو “ترف”، هي أدوات نفسية وتربوية لتفريغ الضغط وبناء حس إبداعي للانسان. غيابها يخلي طاقة الشباب تتحول لمسارات ثانية أقل صحة وتطلع على شكل عنف وكبت. حرمان الشباب منها بالمدارس هو أول خطوة لخنقهم.

النتيجة اللي نشوفها هي انفصال واضح وتناقض ثقافي بوجهين؛ فتلاقي نفس الشخص يستهلك الموسيقى والفن بشكل يومي ويسمعها بموبايله عبر الريلز والتيك توك، بس بالعلن يرفض وجودها كجزء طبيعي من الحياة العامة أو التعليم بحجة الدين والعادات! والتناقض الأكبر ان محلات بيع الآلات الموسيقية موجودة وتشتغل عادي بكل مكان، حتى بالمدن اللي تعتبر مقدسة، بس ممنوع تطلع للعلن كفن وثقافة! وصلنا لمرحلة صار القتل والجرائم كشربة العسل، بس الموسيقى لا حرااااام ولا يجوز وتقوم عليها القيامة . بسبب هذا التشدد والقيود، صرنا نحس اننا ما نفرق عن أفغانستان بشيء أو على بعد خطوة قريبة جداً من ان نصبح مثلها واتعس وهو البلد اصلا رايح للهاوية. بينما هالفن ممكن يحرر هواي من الكبت والطاقة السلبية عند الشباب ويدفعوهم للتميز والإبداع.

القصد مو جلد ذات، لكن توصيف لواقع بيئة تعليمية غير متوازنة تنتج جيل عنده معرفة ناقصة وكبت تعبيري ينعكس على سلوك المجتمع. يمكن هذا البوست ما راح يغير شي بالواقع، بس على الأقل حبيت أقول اللي بخاطري وأفرغ هالشحنة من القهر.

الرسامين ومؤدي الاصوات والمغنين والكتاب والمبدعين بشكل عام، ليش ماكو توجه حقيقي حتى يتجمعون تحت قناة او استوديو واحد باسم مثل Mesopotamia Animation او MIQ Animation ويبدون ينتجون اعمال Indie؟

مو شرط تكون البداية مشروع ضخم. حتى سلسلة قصيرة من 6 حلقات، كل حلقة دقيقتين فقط، مقتبسة من رواية عراقية او مبنية على قصة اصلية، ممكن تبني جمهور اذا كانت الفكرة والتنفيذ جيدين.

اكو مشاريع اجنبية هواي بدت من فرق صغيرة تشتغل بوقت فراغها. مثال على هذا Sunny Side Down (موجود بشكل مجاني على اليوتيوب، انصحكم تشوفوه)، وهي سلسلة قصيرة من 6 حلقات، كل حلقة بحدود دقيقتين. الفريق اللي اشتغل عليها صغير، وقضوا تقريبا 3 سنوات يشتغلون عليها قبل لا يبدون ينشرونها. هسة العمل بدا يحقق مشاهدات عالية نسبيا، واتوقع اذا استمر بهذا الشكل ممكن يحصل مستثمر او جهة تدعمه مستقبلا، خصوصا ان فكرته مختلفة واسلوب الرسم مميز.

اللي يقهر ان المواهب موجودة. اكو هواي رسامين ممتازين وكتاب ومؤدي اصوات ومغنين والخ، لكن كل واحد يشتغل وحده او يترك المجال بعد فترة. احس لو اجتمع عدد كافي من المبدعين على مشروع واحد حتى لو كان بسيط، ممكن يطلعلنا عمل عراقي عنده هوية خاصة ويجذب جمهور داخل العراق وخارجه، خصوصا اذا توفر له ترجمة او دبلجة بالانكليزي.

اشوف المشكلة مو بنقص المواهب، المشكلة انه ماكو مشروع يجمعها تحت رؤية واحدة للأسف...

وبصراحة هذا اللي مستغرب منه، شنو فائدة تجمع كل هالمواهب بهذا المجتمع وعرض الاعمال والمهارات اذا بالنهاية ما يطلع منه مشروع فعلي؟ ليش ما يتحول من مكان لعرض الاعمال وجمع اللايكات الى مكان يخلق تعاون حقيقي وينتج عمل عراقي مستقل؟

السلام عليكم

اني خريج مجموعة طبية ومثل ما تعرفون تعييناتنه انتهى زمنها.

فحابب اتعلم برمجة وأنشأ تطبيقات موبايل او اي شيء اخر مدمج بالذكاء الاصطناعي او شلون استخدم الذكاء الاصطناعي لإنشاء هيج تطبيقات.

اريد roadmap بس حرفيا معرفتي بسيطة بهاي الامور واني انسان غبي صراحة احس حياتي ضاعت بمجال مابي مستقبل فاحاول هسة على الاقل اتعلم شيء يضيفلي ولو جزء بسيط من المعنى وبلكت افيد نفسي واهلي بي.

وشكرا لحسن استماعكم.

بعد مشاهدتي للحقلة المسربة للسرك الرقمي المدهش هذا الملخص:

حقيقة الشخصيات (الصدمة الكبرى):

بالنهاية نكتشف أن كل الشخصيات مو بشر لابسين خوذات VR مثل ماكنا متوقعين . بل مجرد نسخ رقمية (Brain Scans) تم عملها من عقول البشر الحقيقيين. البشر الأصليين من زمان شالوا الخوذ ورجعوا يكملون حياتهم الطبيعية… أما النسخ فبقت محبوسة داخل السيرك وما عندها طريق للخروج للواقع.

بعدها يختفي كين، الذكاء الاصطناعي اللي كان يدير السيرك ويملأ الفراغ بالمغامرات واللعب. وفجأة يصير المكان مظلم وفارغ، والشخصيات تنجبر تواجه نفسها وصدماتها بدون أي شيء يشتتها.

وأثناء محاولتهم يصلحون الفجوة بالسيرك، يصير شيء مؤلم أكثر: كل واحد يذكر اسمه الحقيقي قبل النسخ.
بومني = أبيجيل
راغاتا = سوزي
غانغل = زوي
زوبل = رايلي
كينجر = غرانت
جاكس = ليروي
وكأنه آخر بقايا الإنسان الأصلي داخلهم.

بعدين ينهار جاكس. الشخصية اللي طول الوقت كانت تسخر وتتصرف وكأن ما يهمها شيء. تحت الضغط وفقدان السيطرة يتحول إلى Abstracted، وحينما تدخل بومني لعقله ترى أن كل السخرية كانت مجرد قناع يغطي غضب هائل وعقدة نقص وخوف.

أقسى مشهد بالنسبة إلي كان موقف الحافلات:
نشوف البشر الحقيقيين خارج السيرك… عايشين حياتهم، ناجحين، طبيعيين. يلتقون صدفة ويمرون بجانب بعض كغرباء وما يعرفون بعض نهائياً.

كل الذكريات، العلاقات، الصداقات، وحتى المعاناة… كانت تخص النسخ الرقمية فقط.

واللقطة الأخيرة (Bittersweet):
بومني الرقمية تمشي وحدها داخل السيرك المظلم، تقف، تلتفت للكاميرا وتلوّح للمشاهد وهي واعية تماماً أن هذا عالمها للأبد.

بالنهاية أكثر فكرة عجبتني مو الصدمة نفسها، بقدر ما هي:
أن النسخ الرقمية يمكن تكون أكثر إنسانية من الإنسان الأصلي.
إذا البشر بالخارج نسوا بعضهم ومشوا بحياتهم، والنسخ داخل السيرك صنعت صداقات وضحت وفهمت نفسها… فمنو الحقيقي أكثر؟

وبرأيي، ما كانت نهاية عن الهروب… بقدر ما كانت عن تقبل المصير، مهما كان

رابط المشاهدة (يتطلب تسجيل دخول):
The Amazing Digital Circus: The Last Act | Svetanimaku.online

https://preview.redd.it/kqlcootksp2h1.jpg?width=640&format=pjpg&auto=webp&s=90f7e043f684ecbbfdfbf6c44f91712ccfe79292

صارلي سنة متخرج من كلية الطب بالعراق، ولحد هسه لا تعيين ولا شغل.

دورت بكل محافظتي، حتى بالمستشفيات الأهلية، أغلبهم ما يقبلون خريجين أو يريدون واحد عنده واسطة وخبرة ببلاش. حتى الشغل العادي دورت عليه، كاشير و عامل خدمة بمطعم وعمالة وغيرها، وما حصلت. مشكلة حتى ما عندي سيارة علمود اشتغل تكسي .

حرفياً ما أعرف شنو قيمة شهادة الطب هسه إذا صاحبها قاعد بالبيت وحتى جاي ينسى اللي درسه خلال هاي ال 6 سنين.

والمشكلة مو بس هاي، عندي مريض سرطان بالبيت، وأهلي متقاعدين وعايشين إيجار، واني الجبير اللي كلهم كانوا متأملين بي يتخرج ويغير وضعهم.

تالي وصلت مرحلة أقصى طموحي ألكه أي شغل حتى لو عمالة مع احترامي لليشتغلها، بس لا أكو فرصة ولا أكو طريق واضح.

حتى فكرة الهجرة والمعادلة طلعت مو سهلة، وتحتاج فلوس وخبرة وسنين إضافية من العمر ما امتلكها، واني أصلاً دا أضيع يوم بعد يوم.

أحس الطب بالعراق صار وعد كاذب لجيل كامل.