u/Impressive-Ant3787

بداية هذي اول مشاركة لي في هذا المجتمع وحبيت كيف الاراء متباينة ومختلفة عن بعض بدون اي مشاكل و هجوم مثل بعض الاخلاقيات الي تهاجمك بمجرد ما تسأل سؤال عادي بدون ما نذكر اسماء او شيء

انا شخص تخرجت وبتخصص مطلوب في السوق في عام 2016 وزي اي شاب نشيط قمت بالتقديم كالعادة في كل مكان وطبعاً المحصلة الطبيعية هي عدم التوفيق في الحصول على وظيفة بعدها كملت وفتحت لي مشروع بتمويل واستمر معي سنتين الى ان جاءت ازمة كورونا وخسرت وقفلت حالي حال المشاريع الصغيرة ورجعت الى نقطة الصفر وبديت اقدم من جديد لعل وعسى احصل وظيفة تخليني اسدد الديون ولكن للاسف ما لقيت الى ان مرت سنتين وبعدها جائني اتصال من جهة مرموقة لمقابلة وظيفية ومشت اموري لكن وصلت لشرط غريب وهو ان الوزن او كتلة الجسم تكون اقل من 30 قلت تمام واعطوني مهلة وحاولت بكل استطاعتي اني انزل هالوزن لكنه للاسف ما نزل ابداً ومرت المهلة وفشلت في الفحص واعتذروا مني ودخلت في حالة اكتئاب شديد وظليت في هذه الحالة فترة من الزمن وشاءت الاقدار ان وزني ينزل والقى فرصة ثانية لنفس الجهة وبمكان قريب وقدمت عليها واجريت مقابلة ثانية وبعدها ما سمعت منهم شي الى ما يقارب السنة ويرجعون لي يقولون تعال كمل اوراقك ومن هنا وهناك واوراقي تكتمل واباشر بالعمل بعدها بشهر

قصتي فيها يمكن امل ومعاناة لكن هذه المعاناة عشتها على مدى تسع سنوات وكتابتها واختصارها في اسطر ممكن تعطي انطباع للقارئ ان الامر بسيط لكن في الحقيقة كان جحيم بمعنى الكلمة تمنيت امنية اني اموت تسع سنوات عشت كل يوم فيها وانا اتعذب داخلياً احس بروحي من الداخل تنحرق

لو كتبت هذي القصة في مكان ثاني متأكد بشوف ردود انها خيرة وحكمة والتأخير هذا لشيء عظيم واجر ومغفرة وابتلاء !

تسع سنوات كان ممكن فيها انهي حياتي وين الخيرة؟
كل يوم احس بطعنات في صدري وين الحكمة في الموضوع؟
كل يوم اتقطع من القهر وعيوني تحرقني من كثر البكاء مو لحزن بل لغضب على نفسي وكرهي لها والتفسير الوحيد الي بسمعه هو خيرة وحكمة وابتلاء او "تعطيل" كمحاولة لوصف الوضع على انه مرض او علة فيني

ابي بس جواب شافي لاصحاب الحكمة والخيرة

وين الحكمة والخيرة في ضياع نصف شبابي كذا؟
ولا وين الحكمة والخيرة في اني اعيش حياتي متأذي من الناس وفوقها امي تتوفى وانا في عمر صغير جداً؟

الان ما اشوف في الامور حكمة وخيرة بل لابد ان فيه منطق و تفسير واقعي يرضي العقل

جات على بالي اكتب هالقصة لعل فيه احد عنده من المنطق والتحليل ما يرضي تساؤلاتي على الرغم من اني حاليا اعاني من جديد عشان اخلص موضوع شراء سيارة

تقبلوا تحياتي

السلام عليكم

انا اعزب عمري 34 وقريب ادخل 35 وحاب اسأل هل انا بمرحلة عمرية يعتبر فيها ان الوقت فاتني وما عاد اعتبر عريس جديد او شاب بمقتبل العمر؟
انا انسان تأخرت بسبب اني اعاني من اكتئاب مستعصي ماله علاج غير التعايش معه فقلت بنفسي اني ما ابي اضر احد معي وفضلت اعيش وحيد عشان ما اظلم احد وبصراحة انا انسان مو ملتزم بالصلاة ولا اعتقد اني بقدر التزم وسمعت كثير زواجات تنتهي بسبب هالشي الي ابي اعرفه هل فاتني الوقت وهل انا لحالي اعاني من مثل هالظروف ام فيه غيري كثير

حاب اعرف ايش افضل حل لشراء سيارة بالاقساط هل اخذ قرض من البنك واشتري فيه سيارة ولا اخذ السيارة بالاقساط مباشرة من الوكالة او فيه حل ثالث ؟