خلي نبدي بالفلاش باك قبل بناء صومعات هيلين ودانيال وصلوا لخيط خطير عن شارلوت وعن منظمة سرية تسيطر على مؤسسات الدولة هاي المنظمة ما أرادت تقتلهم بل تشتري سكوتهم عرضوا على هيلين وظيفة أحسن ولوحوا لدانيال بحرمان أخته من العلاج إذا استمر بالتحقيق بالبداية هيلين كانت الأكثر إصراراً لكن بعد ما شافت نفوذهم خافت وتراجعت بينما دانيال صار تمسك اكثر بالحقيقة لذلك بدأ يعتمد على أجهزة قديمة (وأشرطة كاسيت، والدفع كاش، وسيارة ما إلها أي أثر إلكتروني) لأنه فهم أن كل شيء حديث ممكن يكون مراقب

روبرت سيمز بعد ماعنده ولاء تام لكاميل أو للسلطة عنده خطة ويحاول ينفذها (احتمال سلطة لانه يموت عليها)

من هربت جولييت هو اقنع كاميل انو تلتزم الهدوء وهو يتواى امرها هو بنفسه قال إنه رشح آيمي حتى تكون قريبة من جوليت، وآيمي بدل ما تخدر جوليت كانت تساعدها ترجع ذاكرتها يعني واضح ولاء آيمي لروب مو لكاميل وبعدها العنوان اللي عطته آيمي لجوليت طلع يوديها مباشرة إلى روب وإذا فعلاً كان يريد يقتلها ليش ينتظرها وحده ليش ما جاب جنود أو اعتقلها من أول ما وصلت هذا يعني أن روبرت كان يريد يحچي وياها ويساعدها او يستخدمها لصالحه

نجي لجزء من مسلسل هندي وهو برنارد طلع عايش 🐸فهذا يعني اما واحد انقذه وهاي مستحيل لان شفنا كيف اشرف روبرت على عملية ، ف روبرت ما نفذ القتل مثل ما انعرض إلنا أو على الأقل تعمد يخليه يعيش لأن برنارد يعرف أسرار السايلو كلها ويعرف عن الـ Legacy والـ Safeguardفوجوده حي يخدمه اكثر

الملكة تي جمال شعرها ولا متقصف ولا بي نفشة ولا شي يخبل بعيد عن تحنيط لان تحنيط حافظ عليها بس ، حسب تقريرات وتحليلات ان مصريين وحتى مغاربة كانوا يستخدمون خليط من شحم البقر زيت الخروع شمع العسل راتنج الصنوبر. زيت أو راتنج الفستق هالخلطة تساعد على سمك الشعرة و تقوية الشعر وتخليه يبين أكثر كثافة ولمعان أما ريحة الشحم فكانوا يخلون وياه الزيوت العطرية ومع حرارة الشمس كانت العطور تفوح أكثر لذلك ريحة الشحم ما كانت تبين

اريد اجربها بس شحم البقري 🤢 ما اطيقة

بصراحة ما حبيت موضوع فقدان ذاكرة جولييت. صارلنا سنة كاملة ننتظر نشوف شنو صار بعد ما طلعت تنظف، وشلون راح تتواصل ويه الصومعات الثانية أو شنو راح تكون خطوتها الجاية وبالنهاية طلعوا مسوين لها فقدان ذاكرة وحسيت هذا عطل الأحداث أكثر مما خدمها

أيضاً ما حبيت تداخل قصتين بنفس الوقت. بالنسبة إلي أفضل لو يركزون أكثر على الصومعات وأسرارها لأن هذا أكثر شيء احبه بالمسلسل

أما قصة شارلوت، فإلى الآن ما فهمت شنو أهميتها بالضبط شنو تسجيل اللي سمعه اخوها وليش هيج مهم وهم احسها تعرضت لتقنية محو الذاكرة حتى تنسى واي واحد يقترب من الحقيقة او يبحث شنو صار يبعدوه مثل هيلين أحس قصتها حالياً تشبه قصة جولييت تقريباً

لحد الآن ماحبيت موسم بي تمطيط اهواي

لمتى تموت هاي العادة تقليدية انو بنات ميصير يطلعن ويبقن بالبيت كأن جريمة مسوياتها ميصير يطلعن يتمشين أو يتجمعن بمتنزه أو مطعم؟ ليش لازم تبقى البنية بالبيت وهذا شي طبيعي مو من حقها تطلع برا تنافي ادب والاخلاق ويسمونها بمختلف تسميات(أتذكر بفترة جائحة كورونا، من الكل انحصر بالبيت، صارت ضجة. الناس ضايجة، ومنشورات بكل مكان ويطالبون بساعات رفع الحظر، وحتى ظهرت حالات تأثرت نفسيًا بسبب العزلة وقتها كنت أفكر هاي مو حياة كثير من البنات من سنين؟ )

الله خلق سبع قارات فوگ كل هذا محصورين بين أربع جدران🥲 ليش الولد عادي يطلع بأي وقت وإذا رجع الفجر محد يسأله بينما البنية إذا طلعت راسها من الحايط يصير تحقيق عليمن تباوعين؟ ويا منو؟ شتسوين؟ ومنو شافج؟ ويبقون شهر لازميها

واذا نريد نجتمع وي صاحباتنا ياويلي نتوسل وينتهي نقاش ب راسايهن نفس الشي واذا طالبينهم يوووه رد كأن مثقلين عليهم ويومية مطلعينا🙂‍↕️💔

ولما نشوف بالمسلسلات او حتى مجتمعات ثانية بالواقع نشوف البنية تطلع تدرس تتمشى تلتقي بصديقاتها وأهلها يشوفون هذا جزء طبيعي من حياتها مو شيء يستدعي كل هذا القلق

كون عيب وفشلة وهاي عادة المجتمع ليش مايسوون مكان خاص بينا نفس ايران عدهم حدائق خاصة بس للنساء يخبل بي فعاليات وحفلات وركوب دراجات وسباحة وغيرها يو هاي شغلة حلوة ماناخذها منهم 🐸

امنيتي بالحياة بكعدة بمتنزه وسماعات براسي وكتاب بيدي بس كعدت بالبت لمن صارت عندي متلازمة طلعة صارت تهديد بالنسبة اليه 🫠

هذا هو مستشار المحافظ هو المحافظ بيدهم محافظة المثنى كلها (حزب الفضيلة) ومگضيها صراعات بينهم ، احد مواطنين طالبهم بكهرباء لأن تنقطع نهار كله وتجهيز متقع زين اذا يبقى نص ساعة وبيومها الليل كله ماكو تجهيز ف هذا كان رد كلش غريب بغض النظر عن طرف اخر ليش يذب اللوم بغيره وهم بيدهم زمام الامور

وللعلم حزبهم أربع سنوات وزارة الكهرباء بيدهم والوضع نفسه

ذكرني برواية مزرعة حيوانات من نابليون كلما فشل بشي و الحيوانات بدأت تشك أو تتذمر كان يقنعهم أن سنوبول هو السبب حتى يبعد الأنظار عن مسؤوليته

أحبها لأن ما تحشر نفسها بحروب العالم وصارلها قرنين ماداخله حرب ماخذه حياد ومريحة راسها وما تحب تدخل بتحالفات عسكرية وي دول ثانية ماكو جرائم، وطبيعتها تخبل وافضل دول العالم بالمجال صحي وتعليمي ورواتبها عالية واقتصادها قوي ،وبيئتها نظيفة الشعب يشارك بشكل مباشر في اتخاذ القرارات. المواطنون يقدرون يصوتون باستفتاءات على قوانين أو حتى يقترحون تعديل الدستور إذا جمعوا العدد المطلوب من التواقيع وهم مشهورة بالاجبان والشكولاتة

گاعدة وي اهلي على مسلسل النبي يوسف وغرت منهم🙂‍↕️ اجه براسي سؤال ليش حضارتهم بقت واحنا تشوهت واندثرت

تشوف الأهرامات المصرية بعدهن واقفات وتقارنهن بمدن سومر اللي صارت مجرد تلال ترابية، ممكن يخطر ببالك إن مصر كانت أعظم من سومر و اذكى بس حسب العلماء الآثار يكولون إن السبب مو هيج بل يرجع الى اختلاف البيئة والجغرافية والسياسة انذاك وحتى بالعصر حديث🐸

أول فرق هو مواد البناء

مصر

الأهرامات والمعابد بنيت من الحجر الجيري والجرانيت و الحجر يستطيع الصمود آلاف السنين واضح

بينما سومر جنوب العراق يفتقر لهاي مواد ف بنوا بيوتهم وحتى كثيراً من معابدهم باللبن (طين مجفف بالشمس)

وها اذا انتركت بلا صيانة لعقود أو قرون تبدأ بالذوبان والعودة إلى طين😭

لهذا تشوف الأهرامات واقفة مثل جبال، بينما كثير من المدن السومرية أصبحت تلالًا ترابية (تسمى تل أثري عدنا بحيث. انصدم ليش ناس معجبة بهاي تل من تراب تالي طلع حضارة منهارة💔).

السبب الثاني الانهار و الفيضانات بمصر نهر النيل كان يفيض بانتظام وبوقت معروف، فيترك طمي خصب بدون ما يدمر المدن، وهذا وفر استقرار بالزراعة والاقتصاد وساعد على بناء دولة قوية. وفوك هذا مناخهم صحراء جافة.أمطار قليلة جدًا. الرطوبة منخفضة وهذا حفظ المومياوات.الاخشاب الألوان النقوش

أما بلاد الرافدين، من اسمها يعني بين نهري دجلة والفرات وهذا يعني رطوبة أعلى و اهواي فيضانات وكانت غير منتظمة مرات دمر الزراعة ومرات تدمر المدن. و الأنهار تغير مجراها فتدفن البيوت والشوارع بطبقات من الطمي ومع مرور مئات السنين مدن كاملة اختفت تحت الأرض، ولهذا علماء الآثار لحد اليوم يكتشفون مدن سومرية مدفونة

السبب ثالث الناحية السياسية، مصر توحدت على يد الملك نارمر (مينا) وبقت دولة موحدة لفترات طويلة، وهذا وفر استقرار وساعد على استمرار حضارتها. أما سومر فما كانت دولة وحدة وإنما مدن مستقلة مثل أور وأوروك ولكش ونفر، وكانت تدخل بحروب مستمرة فيما بينها وحتى لما وحدها سرجون الأكدي أو حمورابي ما استمرت الوحدة لفترة طويلة.

وفوك كل هذا ياعيني بلاد الرافدين كانت أرض مفتوحة من كل الجهات لذلك تعرضت لغزوات كثيرة من الأكديين والعيلاميين والبابليين والآشوريين والفرس والإسكندر المقدوني، وبعدهم الرومان والمغول. وكل حضارة كانت تبني فوق المدن القديمة أو تستخدم طابوقها حتى تبني مدن جديدة. بينما مصر كان موقعها الجغرافي يوفر إلها حماية أكبر لذلك تعرضت لغزوات أقل نسبياً البحر المتوسط شمال،والصحراء شرق وغرب

ولو نلاحظ الفن يبين الفرق بين الحضارتين

الفن في مصر صور المصريون نفسهم باجسام نحيفة وصحية وملابس خفيفة. ركزت الرسومات على الحياة اليومية مثل الزراعة والصيد والاحتفالات والعمل هذا يدل على ان المجتمع المصري كان مستقر ويعيش بحالة من الامان والرضا لذلك انعكس هذا الشي على فنهم.

الفن في بلاد الرافدي ركز الفن على الملوك والمحاربين الاقوياء وهم لابسين الدروع ويحملون الاسلحة لأن كثرت مشاهد الحروب والفتوحات والانتصارات العسكرية لذلك هذا يعكس طبيعة المجتمع اللي عاش حروب وغزوات مستمرة فصارت القوة والدفاع جزء اساسي من حياتهم مو مستقرين( حتى اجدادنا ممرتاحين سبحان الله تگلك عدم استقرار شي ملعونين بي )

بالعصر حديث ياعزيزي العراق انسرق اكثر من مصر من الولايات المتحدة وبريطانيا وإيطاليا وفرنسا وغيرها و2003 انسرق من المتحف العراقي حوالي 15 ألف قطعة أثرية صحيح رجعوا منهن

العراق بيه أكثر من 10 آلاف موقع أثري، وكثير منها ما كان محمي، فصار هدف للتنقيب غير الشرعي والتهريب. والحروب المتكررة، والعقوبات، وعدم الاستقرار الأمني سهلت عمليات سرقة الآثار. من ذاك زمن لدواعش

اضف آلاف القطع الأثرية تهربت إلى خارج العراق وانباعت بالسوق السوداء.(اتذكر مرة بابا قال اريد لفلان طلع من سجن صارله 15 مدري شكد فسألته عن سبب قال كان يسرق اثار ويبيع هو لزموه وجماعته طفروا)

ف تعب اجدادنا اندثر واتهدم وانسرق ومصر صمد 🫠

أحس القضية أكبر من شخص واحد من الصعب أصدق أن وكيل وزير وحده يگدر يدير شبكة بهالحجم من الرشاوى والفساد بدون ما تكون أكو جهات وأسماء ثانية وراه

لذلك ما أستبعد أن تنحصر الأضواء كلها على قضية الجميلي بينما تنحل أو تتسوى ملفات ثانية بهدوء بعيد عن الإعلام يعني ما دام هناك سفينة غارقة دعونا نلقي حمولة الفضائح فيها لتغرق معها واحد يستر على ثاني

وهو حسب المتداول الجميلي عنده كلية وحدة، فإذا صارله شيء باچر ما اتستغرب يطلعون بسبب جاهز مثل فشل كلوي أو غيره وتنغلق القضية وي صاحبها

احد اعضاء البرلمان الامريكي يگول ضيعت وقتي واني اسمع لرئيس افغانستان بالفيديو بدل رئيس عراقي بدون فائدة ،هو منو مصلحته يمنه غير مخزون نفط عدهم قلة وزير الحرب وترامب مطالبيين بمليارات للخزينتهم يردون يطلعونها بروؤس دول التحت استعمارهم فوگاها يستهزء

مليت من انو احنا مجرد تبعية وشعب واحد يلوم الثاني ويطعن بالثاني ،امريكا تستحقر بزيادة اللي ذال روحها والمعدوم الكرامة حادثة 1973 وحدها تكفي حتى نعرف شكد عدنا وزن من العرب وقفوا تصدير النفط الغرب كله ارتبك والأسعار طارت واقتصادات دول كبرى تأثرت يعني مو إحنا اللي محتاجينهم أكثر هم محتاجين مواردنا

حبيت التطبيق مابيه مشاهير واعلانات و سوالفهم البايخة

هل حملة ريس ستقف عند المدراء والوكلاء(الاسماك)؟

أم ستصل إلى الرؤوس السياسية(الحيتان) التي صنعت هذه المنظومة وحمتها طوال السنوات الماضية؟

شخصيات مثل مالكي عمار اللي اشترى قطعة ارض شكدها ب10 الالاف والخزعلي وووووغيره من حيتان من تأسست الحكومة هم داكين مسمار بيها

الزيدي وافق وباشر بتصدير ٥٠٠ الف برميل نفط يوميا الى أمريكا مقابل لا شيء!

في الوقت الذي حدثت تشرين مقابل ١٠٠ الف برميل للصين مقابل عقود وشراكات صينية لاعمار العراق!

هاي الجفصة شكبرها بس العجيب محد تكلم بيها ولا جابوا طاريها

احس هاي الحملة مجرد استعراض إعلامي

معقولة ما راح يستغلوا بتطبيق اجندة سياسية أمريكية إسرائيلية؟

معقولة ما راح يستغلوا بازالة حيتان شكلية وتصدير حيتان اخرى تبوك لصالح أمريكا؟

يعني فلوس تروح لأمريكا وامريكا ثقب اسود ما تشبع واضف هي واسرائيل جيب واحد ايعععع راح نصير نفس دول الخليج( البقر الحلوب) نكدر نگول ذولي عيشتهم فوق مقبولة بس احنا راح نبقى نفس الوضع ويزود يطبق علينا مثل مطرت والصحت شمحصل العاگول 🙂‍↕️💔