u/Key-Firefighter-2163

وزير الدفاع الدبيبة ووكيله الزوبي هما الوحيدين الي عندهم المسيرات الأوكرانية، ومش أول مرة يستخدموها، وفي مقر مليشيا 111 طاحت مسيرة اوكرانية في فيلا سكنية بالقرب منها. كل الأدلة هذه تشير أنه الدبيية هو المسؤول عن هذا الهجوم.

الدبيية وعائلته لعند وين يبوا يوصلوا؟ كل مرة ينبطح أكثر وكل مرة يثبت أنه بيدير أي شيء من أجل أنه يقعد في السلطة أكثر.

معقولة يا رجال تضرب رزق بلادك ؟! تي شن قعدله هذا؟

نتمنى معاش أنشوف حد يدافع عليه، لأي سبب كان،،سواء جهوي/قبلي/سياسي. لأنه أول ما راح يصير الجد، هو بيمشي لبريطانيا، وأنت بتقعد تعاني أهني

وهذا الرابط لوطا، الي يبي يقرا (كله بالفرنسي، ترجمته وقريته باش نتأكد من الخبر) رابط الخبر

الزاوية يومياً حرب وقتل وإجرام، ما بين المليشيات المتحكمة في المدينة، لا يعرفوا فجر، لا جمعة، لا رمضان، لا عيد، واليوم في هالمسلسل من الإجرام استهداف خزانات النفط في المصفاة، مع وجود سوابق، بالأمس استهدفت خزانات الماء في المدينة. والمتدوال أنها أوكرانية

بهذا الشكل بيستمروا لعند ما تنهرد كل المنشآت الي قعدوا في البلاد!

نسأل الله لهم السلامة، وأن يحفظ اللهم المدنيين والأبرياء.

بكوني أحد الناس الي كانت تكتب بالعربي في الصب الخاص بدولتها، أشعر بالفخر❤️

حرفيا قبل 3 سنين اللغة العربية كانت قليل في صبات المفروض مخصصة للعرب، ولكن اليوم صارت السائدة، الحمدلله.

عارف أنه البعض كان يفضل الإنجليزي بسبب كيبورده ما يدعمش في العربي ، أو لأنه عايش البرا وعربيته ضعيفة أو ما يعرفهاش أساساً، أو بسبب أنه أجواء الصب تبدو له أحسن بالإنجليزي، أو أنه يبي يوصل رسالته للأجانب والعرب، وغيرها من الأسباب.

ولكن مش معقولة أنه العربية تكون اللغة الثانية في صبات مخصصة لناس تتكلم عربي، مواضيع وأسئلة وتجارب يومية التعبير عنها بالعربي أتكون أحسن بمئة مرة، بس مع ذلك الإنجليزي كان السائد.

سبحان الله، الآن صار العكس، الإنجليزي أقلية، والعربي هو الأكثرية، عارف أنها حاجة بسيطة، ولكن إثبات أنه قادرين نغيروا حاجات كانت في وقتها شيء صعب ولكن مع الوقت تغيرت، عقبال تدريس المواد في الجامعات باللغة العربية 🥳

أني نبي بس نعرف ليش الكيل بمكيالين عند البعض؟ هل لأسباب قبلية؟ أو من أجل المصالح ؟

لأنه مش منطقي، وتناقض، أنه ليك سنوات تنتقد في الجهة المقابلة (حفتر) وتسب في الإمارات، واليوم عندك عادي لأنه مواتي ليك.

تجار قضايا ودماء.

ديما أنكرر فيها، الإعلام كله أمتاع مصالح، راهو ماهمش زيك وزيي، أحني ننتقدوا في الحاجات لأنه غلط، وهما على خاطر مصالحهم.

الحق الوحيد الي معجب فيه وفي خدمته، وأنه يرد في أراضي الناس المسلوبة والمغتصبة، وحاجة ثانية أنه ولد الوزارة الي يخدم فيها ومش متسلق وبراني.

كل ما أنشوف رد المظالم واسترجاع أملاك الناس وكيف يحاول بقدر الإمكان أنه يحارب الفساد الموجود في البلاد،ومش قاعد في مكتبته زي غيره، يثلج الصدر والله، وتتمنى كل المسؤولين زيه.

المنطقة تضم لـ4000 آثر (واو! رقم خيالي هذا) وجزء كبير منها مهمل، خُرب، أو هُدم.

في مباني معاش موجودة زي قلعة بني وليد والي كان قلب المدينة ( زي المدينة القديمة في طرابلس )

وفي الي مهمل زي مدينة قرزة الي موجودة في عملة النصف دينار، والي أجزء منها موجود في المتحف، ومرشحة أنها تكون في قائمة اليونسكو أمتاع ليبيا مع هوا فطيح وطلميثة

وأيضاً فيها مدينة بن تليس، وقصر البنات، وقصر العيساوي، والقصور في وادي بني وليد، ومسلات المردوم، ووادي سوف الجين أكبر وأخصب أودية ليبيا

فيها كنائس من العهد البيزنطي في منطقة بزرة، ونقوشات من العهد الإسلامي، ومباني رومانية زي المزارع المحصنة

ما عمري مشيت لها المناطق هذه، ومتأكد أنه في الواقع المناظر بتكون خيالية، ومتاكد أنه في غيرها مش مذكورة اعلاميا

بحكم أنه خش الصيف، وبيكثر الجيلاطي في السوق،وأشهر جيلاطي محلي هو النسيم.

نبي أنوه على نقطة، أنه منتجات الشركة هذه اصطناعية وفي الي مضر، وفي الي حتى السام! وغيرها من الشركات المحلية والاجنبية

خوذ أي منتج لهذه الشركة واقرا عليه من التالي، وتو تكتشف المواد المستخدمة أنها رديئة، وفي الي سامة ، مش ضارة، سامة! يعني ها في منتجات مش صحية وتمشيها ولكن هذه سامة

الجيلاطي بكل أنواعه فسطه زيوت مهدرجة كليا ( الزيوت هذه سامة، وتسبب في مشاكل صحية،وبجديات نتكلم ) ومش هو وبس، هلبا شركات ثانية تحطلك في الزيوت هذه في الجيلاطي

الحليب (الأحمر ) فسطته زيت نباتي الحليب (الأزرق الجديد ) امتاع بودرة وحاط أنه طبيعي الجبنة ماهيش طبيعية ومعبية زيوت ومواد حافظة الياغورت امتاع بودرة هو واللبن

مفيش ولا منتج عنده صحي أو طبيعي نهائي! وهذه أنها من أكبر الشركات الغذائية في ليبيا!

قصدي توا الأكل هذا على المدى البعيد يضرك،،فما بالك بالكبير والي عنده أمراض.

أني مش من جماعة الاكل الصحي ولا واحد، ولكن قبل سنتين اخذيت العادة أني نقرا في مكونات المنتجات من التالي،واكتشفت وتعلمت كم حاجة عن المنتجات

نصيحة ديما اقرا مكونات أي منتج بتشريه بشكل عام، ومش بس في ليبيا او دول المنطقة،

نهائي يحبس الأنفس، تمنيناه للنصر، نادي الشعب، ولكن الحظ لم يكن حليفه. شق طريقه للنهائي بجدارة وبشرف، ورأسه فوق، على عكس المنافس.

عائلة الدبيية بمالها الحرام، والرشاوي، و"التكوليص" على قولتهم، أحذت الدوري، بشكل مستفز عديم "البنة"، وتنضم للساعدي وطليش وغيرهم. غير مستحقة بتاتاً

هارد لك لنادي النصر، من مشجع للمدينة.

مانبيش نفتح جروح قديمة، لكن مش هذه ظاهرة عجيبة ؟ قصدي الأخوان وشلتهم في مصراتة وطرابلس، كانوا يدعموا في الجماعات الإرهابية هذه ضد حفتر في بنغازي ( مانيش مع حفتر ) واليوم يبيعوا فيهم للامريكان في طرابلس ومصراتة ومعاش يبوهم ويلزوا فيهم. قصدي مش كانوا هذوا أمورهم لوز و100٪ ليش ما تبيهمش في منطقتك ولكن في بنغازي ايه؟

في البداية كانوا يدعموا فيهم لأنهم بنفس الايدلوجية وبعدها نكاية في حفتر بغض النظر أنها كويسة أو لا أو أنها أتسبب في ضرر أو لا، هذا الشيء خلى الناس مع حفتر غادي بسبب الي عاشوا معاهم ولأنه أهون بالنسبة ليهم من هالمليشيات المتطرفة والدواعش وغيرهم.

ولازم أنكم تعرفوا أنه مؤيدي هذه الجماعات تمثل في نفسها وما تمثلش في أي مدينة

والله يفرج وخلاص