u/KiRo_1i

صلو الوتر بارك الله فيكم وادعو لانفسكم

والله الاسئلة كثيرة بس حاليا على بالي
لو شخص وده يبدا بداية جديدة من غير مدرب وش الاشياء الي لازم يسويها
وكيف يقدر ينضبط بالنادي والاكل وترتيب تكاليفه
واخيرا كيف تتعاملون مع الشد الي بعد يوم التمرين لانه سبب انقطاع كبير
واي نصيحة اضافية يا جماعة الخير

احتاج منكم شيئين بسيطة لاهنتم
وش صار عليكم بعد التخرج من ناحية الوظايف وسوق العمل والرواتب
ووش نصيحتكم الذهبية لشخص بالسنة الخامسة وقبل عشان نجهز للجاي للفايدة
ان شاء الله البوست بمكانه الصحيح لان التشتت باعلى مراحله حاليا

الله يجعلكم شاهدين لي لا علي مع قلة المشاركات احترم كل من قدر وجودي بهالمنصة تحياتي لكم جميع من شباب وبنات 💐

ياه السبب الحقيقي لسحبتي الاخيرة كانت لتجربة مهمة لي الا وهي ان اسوي اول عمليتين لي بنفس الوقت …..

1.septoplasty: تصحيح الحاجز بين الجيوب الانفية بقطع العظمة المنحرفة وخياطة المكان او تركيب دعامة كما وصل الحال معي لكن تزال بعد فترة ،وكانت الاصعب لان على قولة الجراح عندك انحراف تاريخي احسبه يطقطق طلع صادق طولت العمليات
حتى دكتور العظام الي كنت اراجع معه شطفني قبل الغرفة قاعد يقول هلا بمريضي حلبني الكبتن

2.turbinectomy: لها ثلاث طرق كلها تهدف بالاساس لتخفيف لحمية الانف اما بقطع جزء من الاثنتين او يدخلون اداة مثل الدريل ويفرمون الداخل من عظام وكاترلج وعضلات لين تخف او بكهربائيات العضلة يدخل رود وينشر فيه موجات تطابق الي يستخدمها الدماغ لتخفيف حجم العضلة
على كل حال كانت هذي اول تجربة لي كضيف في غرفة العمليات على اني كنت شخص دايم يتابع من برى

بعد ما حطو قناع التخدير ما حسيت بشيء الا اني في غرفة وخشمي مورم مع اني كنت شايل هم يصيرلي زي المقاطع ذيك الي يفضحون نفسهم بس من قوة التعب الشيء الوحيد الي طلبته هناك ماء واخذت غفوة طول ساعة الافاقة لين طلعوني
للتنويم الفكرة الي حصلت الان ان اول يومين متعبة شوي الشرب والاكل صارو مهمات صعبة غير موضوع تغيير الشاش احيانا اغيره بنفسي
الي استفدته الصدق يعتمد على الاسبوعين الجاية من الاستشفاء اما الان فالصبر اكيد وثقة بالله ان النتيجة تسوى

صح وباخر ساعة بالجمعة لا تنسوني من صالح دعواتكم وانفسكم استغلوها بخير ما تملكون

جملة اكيد بتشوفها بتقول وش يقول ذا بديهيات
لكن فعلا وقت العصاب تبان المعادن،حتى الي حولك تظهرلك حقيقتهم سواء الي بيوقف معك وقت الشدة او الي بيتركك ،وتبدا تراجع قرارتك وتبدا تفكر بكل خطوة كل تعامل عشان لاسمح الله ما ترجع تكرر اخطاء كان يمكن تجاوزها او تحسن خطوات معينة
الامور طيبة بس قلت بهبدلكم عالسريع حكمة اخذتها من فترة متواضعة بهالدنيا

كنت محتاج فترة فعلا ارتاح فيها وافكر بعمري وخططي القادمة وكم شيء ابيه يصير دعواتكم بظهر الغيب يالربع ،مدري حتى يمكن محد لاحظ غيابي
على كل حال اكيد ريديت نايم بدوني لذالك بحاول ارجع على خفيف باذن الله الايام القادمة
والي بيحط منهو ذيه بسامحه لان ما ينلام الصدق اهم شيء دعواتكم 😂

كالعادة لازم اشطحلكم بالصب بشيء عشواىي جديد سويته ولازم اعوضكم بعد اليوم بتجربتين
التجربة الاولى فشختها ايضا من تعليقات البوست الماضي ( من مؤسس ريديت بس الحين معرف امنشن تحياتي )
فكرة المشي بعد صلاة الفجر مع هرولة خفيفة لان لازلت اضرار امس علي
على كل حال المشي بعد الفجر الى شروق الشمس شيء يستاهل فعلا صح الاستثقال بالنوم والكسل لكن مشي الفجر بهدف رياضي بيخليك تستفيد من اجواء ما قبل الشروق هدوء وهواء نظيف وراحة كملت شوي الى قبل الشروق ولعل كبس النوم بعدها
الي استفدته : تجربة جديدة شيء ما توقعت اسويه بس قلت يالله تستاهل اعطيها فرصة
التجربة الثانية : هنا قررت اجرب اتعلم على موضوع التداول الرقمي اخذت فكرة عن الموضوع جربت وتابعت مقاطع يوتيوب وتابعت شخص كويس بالشغلة بس ما ودي اسويله اعلان ببلاش 😂
على كل الفكرة توني بديت فيها اليوم وخسرت شيء بسيط بس فدا يمكن لا عطيتها وقت اكبر وتعلمت بيصير مصدر دخل فعلا
الي استفدته : اخذت نظرة عن المجال وكيف السوق ماشي معهم بس لازلت اشوف ان شيء زي ذا ما يكفي له يوم يحتاج مدة اطول فعليا
بشوف ان كان جتني افكار اكثر كملت السلسلة ذي اهم شيء رضى الجمهور والفايدة صدق

طبعا قررت بهالاجازة اسوي مجموعة تجارب على مدى اسبوع كل يوم تجربة عشوائية عن شيء ما افهم فيه وانقلكم التجربة من منظوري
اليوم الثاني قلت بشوف اخواني وش افكارهم قالولي سو ماب روبلوكس ، الفكرة الشاطحة الي ما توقعت ابدا اسويها خصوصا بهالوقت بس قلت ليش لا.
اول شيء سويته دخلت يوتيوب ما شاء الله تبارك الله كمية المقاطع انواع واشكال حتى مراهقين وصغار سن يعلمون الناس كيف يسوون وهذا المثير للعجب
على كل دخلت مقطع اجنبي وبديت من الصفر الخطوات بسيطة وهو يشرح قاعد اطبق معه خطوة خطوة
النتيجة كانت بسيطة جدا بحكم اني سويتلهم شيء سريع بنص ساعة بس البروسس شوي ممل وحتى جربت احطلهم شيء جاهز معه
الي استفدته من هالتجربة : اخذت فكرة عن الشغلة وكيف ان حتى طفل صغير بالعمر يقدر يصنع تحفة فنية اذا اعطاها الوقت والتركيز الكافي ، طبعا انا مستثنى من هالتجربة لاني جاي مستعجل ابي استنبط فكرة سريعة
ممكن اجرب هالشيء بعدين بجهد اكبر ؟ ليش لا بس غالبا مب شيء لي
بحاول اشطح عن سياق التقنية بكرة وادور شيء جديد

طبعا قررت بهالاجازة اسوي مجموعة تجارب على مدى اسبوع كل يوم تجربة عشوائية عن شيء ما افهم فيه وانقلكم التجربة من منظوري

مبدايا اليوم قررت من الصباح اجرب اعدل جهاز نينتيندو سوتش حق اخواني القديم ،قعدت اقلب فيه تابعت مقاطع لدخول النظام وكم شيء ثاني
من الي اكتشفته نظامه جد غريب
بحثت في الموضوع شوي المتطلبات بسيطة لكن والف لكن اي خطا ممكن يسبب ان الجهاز يودع ويضيع فانهيت الفكرة باني ما اخاطر واذا احتجت صدق اهكره بوديه لمكان زي الحراج
الي*** استفدته من هالتجربة : ***اخذت فكرة عن نظام السوتش واستغربت ان فيه عدد كبير تضرر كما عدد كبير استفاد
بكرة بجرب شيء جديد عشوائي ارمولي افكاركم ضمن المعقول

قعد اقلب راسي ادور شيء جديد اتحفوني بارك الله فيكم

جملة ترددت على بالي الحين وقعدت افكر فيها قلت اشوف الناس هنا وش بتعبر عن نفسها بجملة

استغلوها بارك الله فيكم بالدعاء الي بخاطره شيء والي الدنيا مقفلة بوجهه فرصتك

جت الفكرة ببالي وقلت ليش ما اقول للناس عنها لعل احد يستفيد
اولا فكرة تدريبنا عبارة عن ١٠ ايام نكون بصيدلية مجتمع نشوف فيها كيفية تعامل الصيادلة هناك مع الزباين ووش الادوية الي ماشية بالسوق
الهدف الاساسي كان اننا ندخل بجو السوق من بدري ونعرف وش الي صاير بسوق العمل
شخصيا استفدت من اول اسبوع بهالتجربة شفت انواع مختلفة من المجتمع يمنع علينا التعامل مع الناس لكن يكفي اننا نتابع معهم او بمرحلة ما محاكاة اوshadowing
جتنا حالات غريبة زي شخص جاء عنده الم بكتفه ويبغى تشخيص بمحله وطلع عنده اصلا تكلس بكتفه وهالشيء غريب علي شخصيا
غيره ايضا للي يجي بدون وصفة ويبغى مضاد حيوي اذا جاك شخص كذا لازم توعيه بهالموضوع وخطورته وان لازم وصفة لها
باختصار اول اسبوع كان جيد اخذت نظرة على شيء كنت اشوفه بالورق بس لشيء موجود بالعالم الحقيقي وحتى اخذت واعطيت مع الصيادلة هناك والموظفين والزايرين واستفدت من علمهم وخبراتهم وباذن الله الاسبوع الي بعده يكون افضل بعد
اذا حسيت الفكرة جيدة ممكن بعد انزل للاسبوع الي بعده