u/Pitiful-Trainer-6195

اهلين
بختصر عليكم لان الحديث بذا الموضوع بيطول جدا
أنا تعرضت للتحرش و اعتداء سطحي جدا لما كان عمري ٨ من قبل اشخاص بالعايله كبار ، عمري حاليا ٢١ و لاحظت اني لما أفكر في طبيعة العلاقة الحميمية بين الزوجين عادي ما اخاف ولا يجيني نوبة هلع يعني الأفكار براسي تكون طبيعية جدا واحس اني اكيد ابي هالشي بافضل طريقة مع زوجي لكن أنا قاعده اتسال هل اثار الصدمات ممكن ما تطلع إلا بذيك اللحظه ؟ واقعد ابكي واخاف ؟ لان احيانا لما افكر فيها بشكل جدي جدا وش بيصير بعيدا عن الرومانسيه و الخيال احس اني اخاف لدرجة قلبي يضرب وبعدين اقول انه طبيعي الناس تتوتر
بس برضوا لاحظت ان عندي قرف من ذكر الأعضاء وبكل مره احد يذكرها اسكر اذاني لان الشخص الي تحرش فيني كان يقولها
بطريقة مقرفة
وخايفه انه ماتطلع صدمتي النفسيه إلا بوقتها و ينصدم هو شفيني ؟ ليه ابكي
هالشي محد يعرف عنه أبدا لان الشخص الي سوا كذا عمي مهما تكلمت محد بيصدقني لانه ملاك بعيونهم وانا خلاص وكلت امري لله وربي بياخذ حقي لكن الموضوع هو أنا كيف اعرف لو كنت فعلا طبيعيه وبتقبل العلاقه زي ما أنا أتصور او صدماتي مارح تطلع إلا بذيك اللحظه ؟ مع ان احس ان ماعندي صدمه من كثر ما حاولت اساعد نفسي اتخطى
و خيار الدكتور النفسي غير متاح حاليا
و فكرة اني اعلم زوجي ما اعرف هل هو بيكون شخص متقبل ؟ يمكن يفهم غلط وووووو واحس طالما ان مافيه اثر جسدي صريح ( فهمتوا قصدي ) ماله داعي يعرف
لكن لو كان متفهم كيف بقوله
الناس المتفهمين قليلين

اخوي جاه راتبه ( اكثر من ٦ الالاف ) و عطى اختي عشره قامت امي وقالت عط فلانه بعد ( لان نبي نروح البقاله ) وقال لا مارح أعطيها ماعطتني من المكافاه ( مكافأتي تروح كلها اقساط أشياء) واحس انكسر خاطري او شي لان وجهي صار احمر مدري

سلام عليكم ، مساء الخير ان شاءالله تكونون بخير
ممكن تكونون مليتو وأنتم تقرون موضوع كذا في ريديت
لكن موضوعي غير تماما و لو انه عن الزواج لكن وضعي غير ، وبما أن هذا صب زواج والي موجودين فيه كلهم سعوديين ف ان شاءالله هذا هو المكان الي بلقى فيه حلول ، وصدقوني ما كتبت هنا إلا اني فعلا أحتاج اسمع حل و أحتاج لاحد ممكن يقولي كلام أحتاج اسمعه ، و معليش لو بطول عليكم أعذروني 🌸

أنا بنت عمري ٢١ ، شكلا أنا جميلة ولا امدح نفسي لكن من تعليقات الناس الي حولي من خالاتي و صديقاتي وأمهات صديقاتي و برضوا الناس الي ما يعرفوني لما يشوفوني اول مره ، ادرس بتخصص ممتاز و درجاتي كويسه مره وعندي أهداف لنفسي ، طولي و وزني ممتازين ، طولي ١٥١ و أنا أقصر وحده بأهلي وهذا شي من عند ربي أنا مقدر أغيره ف اساسا ما كنت إشوف هالشي مشكله ، اهلي زمان قبل لا انولد كانت بينهم مشاكل والمشاكل ذي كانت عنف و شرب ، و كان الكل من أقاربنا يعرفون عن مشاكل اهلي لدرجة صاروا يأخذون الموضوع طقطقه علينا ، اخوي الكبير كان بداية حياته وضعه ممتاز متوظف عسكري و عنده سياره و راتب لين انقلبت حياته وصار يشرب و ترك الوظيفه وصار مدمن وهالشي يعرفونه كل أقاربنا ، أنا عندي اخوان غيره وكلهم مالهم حتى بالدخان ومتوظفين و وضعهم تمام ، اهلي للحين بينهم مشاكل من قبل ما انولد لين هذا اليوم وهم يتهاوشون و يتضاربون و يسبون بعض ، لدرجة عادي بيوم عشوائي الشرطة تكون برا عند بيتنا بسبب هواشهم و انهم مو راضين يفكون بعض ، تعودت على هذا الوضع ، طيب بتسألوني وين المشكله ، المشكله هي ان محد يحب اهلي من أقاربنا و اساسا هم خلقة انطوائيين ، ابوي يمنعنا نروح اي زواج و لما ننعزم يتهاوش معنا ويسب ويحلف ما نطلع من البيت ، لدرجة امي صارت تقول خلاص ليه نروح دام بكل روحه بيقعد يسوي فينا كذا ، و أنا ما كتبت كل هذا إلا اني متاكده ان له دخل ولو ٥٠٪؜ ، أنا ولا مره انخطبت ( رسميا ) ، ادري والله ان بعضكم بيقول شفيك مستعجله لسا صغيره و هو كلامكم صح أنا بذا العمر فعلا صغيره ، لكن أنا اتكلم لاني شايفه واقع حياتي ، و الواقع يقول لي اني تقريبا مارح انخطب من أقاربنا أبدا ، لانهم يكرهون اهلي ، حتى خالاتي ما يعزمون امي بالمناسبات أبدا ، و عماني يكرهون ابوي ، والاقارب البعيدين يكرهوننا بسبب كم موقف صار تاكدت من هالشي ، و نظرا لحياتي مع اهلي ف أنا فعلا ادعي واتمنى اتزوج لان بيتنا مو امن ، أنا خنقني اخوي وانا اكل لانه سكران وماقدرت اتنفس وبالله فكوني من يده ، بدون مقدمات بدون سبب خنقني ،

و تدرون ايش الي يقهر فعلا ، ان اي احد يبي يتقدم لي فجاه يتراجع و يروح يخطب وحده تقرب لي ، قبل سنه كانت في مراه ما تقرب لنا تبي تخطبني لولدها وكانت تقول لأختي الكبيره وتسال عني ، هي اساسا كانت شايفتني و ولدها اكبر مني بكم سنه و إنسان مشاء الله عليه ، راحت لها وحده من أقاربنا و قالت لها كل شي و فجاه طلع خبر خطوبة ولدها من بنت ثانيه ): ، ولما جت وحده ثانيه بتخطبني راحت لها زوجة عمي وقالت يع قصيره يع فيها وفيها ، عشان كذا ذكرت الطول

الموضوع وما فيه هو إذا حياتي كذا ومحيطي كذا وين بلقى نصيبي وبأي عمر ؟ ، أنا وحده مره تحب الأطفال و العائلة و هذي المشاعر ، ودي أعيشها ودي بأطفال ودي بزوج يحبني و يفهمني ويحتويني ، لكن من وين بيجي ؟ حتى من برا مجتمعي لما جاء صار كذا ):

انا الحمدلله اجتماعية و عندي صداقات و علاقات و بعيدا عن مجتمع أقاربنا واهلي سمعتي مره حلوه عندي بزنس و امير منطقتنا مكرمني ، بعيدا عن بيتنا الكل يعرفني باحسن سمعة ويشهد لي بالأدب و الأخلاق و دايم انمدح و ماعندي أعداء ، ودايما احب اساعد الناس و ادعي ربي و متدينه و اصلي صلواتي بوقتها و محافظه واختم القران
ودايما أسعى اني اصلح نفسي وادعي ربي

و دايم يقولون لي عادي من مجتمع صديقاتك او من برا أقاربك بس وين بيجي هالشخص ؟ أنا صح عندي علاقات والحمدلله لكن مو عشان اتزوج وغيره عرفتوا

لكن يبقى هالسوال ببالي هل بيمشي العمر ومحد خطبني ؟ امي دايما تقول الناس يبون الاهل حتى لو البنت عاديه و مافيها زود ، وبنفس الوقت امي دايما تعايرني ان محد بياخذني غير شايب وزين يقبل فيني ، حتى الحريم يقولون عني فلانه بتقعد عند امها 😕

اسفه لو طولت عليكم و دامكم وصلتوا هنا الله يسعدكم وشكرا على وقتكم ، احتاج حل او كلام يواسيني

سلام عليكم
من لما عرفت ان خالي فيه سرطان وانا عايشه بتوتر نفسي وعلى أعصابي افكر فيه وأفكر في امي
امي اخوانها ثلاث توفوا في حادث سياره وهم بالعشرينات
وواحد توفى وهو راجع من دوامه وعنده أطفال و الثاني توفى بحادث وهو راجع من دوامه بالليل و الثالث توفى بحادث سيارة وعمره ٢١ وهو راجع من دوامه وكان متملك و اخوها الرابع كان عمره ٢٧ و متلازمة داون وتحبه مره توفى بسبب قلبه و الحين خالي عمره ٢٦ وفيه سرطان و ياخد كيماوي أنا ما اتفاول بفكره لكن فكرة ان امي للحين تتكلم عن اخوانها ولا نستهم و لسا جرحها مفتوح ولسا تتذكر حتى تفاصيلهم و وتروح تزور غرفهم وتشوف شهاداتهم و ملابسهم و فرشهم وهو مار ١٤ سنه على هالشي ادري ان الجرح مايسكر وانها مارح تنسى أبدا بس فكرة انها ترجع تنجرح من جديد وتفقد شخص ثاني غالي على قلبها و اخوها الصغير تخليني ابكي كل يوم

سلام عليكم
فيه موضوع مضايقني وأفكر فيه من فتره و ما لقيت صب مناسب الا ذا لاني مابي إلا راي السعوديين غالبا بيفهمون الموضوع ذا اكثر من غيرهم وليه هو مضايقني
أنا بنت عمري بالعشرينات في بدايتها ، ابوي الله يهديه مدري شفيه عليه حركات تحرجني و تصدمني دايما ودايما تكون بدون مقدمات مقدر اتنبأ فيها ، مره من المرات رحت لموعدي بالمستشفى تعبانه و هو معي و مدير المستشفى صديقه ف جاء يسلم عليه وقعدوا يسولفون وانا ما احب اكون قريبه او بمكان مع رجال ما اعرفه ف بعدت عنهم و رحت بعيد لين يخلصون بس جو عندي و ابوي قعد يعزمه ويصر عليه و لف علي يقولي ابوك لاجزم لازم المهم اني أنا مره انحرجت لان الله يهديه قرب مره مافيه مسافه وهو اكيد يحسبني صغيره او طفله لان أنا مو طويله بس منقبه مع ذلك واضح يعني اني مو مبزر عشان تقرب تكلمني وتضحك معي ف أنا سكتت ما رديت وقعد يضحك و بعدها قاله ابوي بزوج ولدك فلان بنتي 🤯 بنص الاستقبال والاستقبال زحمه ، طيب بتقولون لي وش مضايقك اكيد انه مزح ، بقولكم ذي مو اول مره يسويها ابوي كل ما شاف احد قاله بزوجك بنتي ولا مره ارسل لعمي يقوله زوج ولدج فلان بنتي ، والمشكله بينه و بين عمي مشاكل ، والله ما امزح اني مره متضايقه لان هالشي يمسني و يمس شخصيتي ولا ارتاح لذي السوالف ولا احبها فكرة ان كل من هب و دب قاله بزوجك بنتي ماهي حلوه في حقي ولا أرضاها لنفسي لدرجة لما قالها عطيته نظره لا شعوري وانقهرت ، أنا ان شاءالله بتزوج مو سالفة اني رافضة الزواج أبدا ، لكن هذا نصيب ربي يجيبه مو اتزوج واحد أنا انعرضت عليه ، لدرجة مره دق صديقه شايب ومتزوج وعنده بنات بعمري يقول زوجني بنتك ( أنا ) قسم بالله أنا انهرت وهم قاعدين يضحكون 😐
وأنا هالشيء قاهرني لانه زوج اختي الكبيرة بنفس الطريقة راح لولد عمتي وقال بزوجك بنتي و ولد عمتي عادي عنده لانه هو واختي كبرانين مع بعض و تزوجوا بس اختي للحين وهي منقهره من الحركه لان تقول ام زوجها تقول كنت بزوج ولدي فلانه ( وحده ثانيه ) و كانها تدق بالكلام انه ماتبيها

تكفون افهموني والله يقهر ، يعني تخيل يجيك واحد يقولك بزوجك بنتي ، يمكن انت تكون شخص عادي عندك بس يمكن شخص ثاني ياخذها بنظرة غير ، وحتى لو ما أتوقع ان فيه شخص يبي كذا ، المتعارف الرجال إذا بغى راح يخطب ، شسوي بنفسي والله مقهوره على هالسالفه

سلام عليكم أنا طالبة قانون معدلي جدا ممتاز و افهم بالأنظمة و اعرف استعمل برامج الحاسب و لغتي الإنجليزية ممتازه و بختبر ايلتس و قاعده أتعلم على ال POWER BI لكن مشكلتي ان منطقتي ( القصيم ) مافيها فرص توظيف متنوعه كل الي لقيته مكاتب محاماه وأنا ودي اول شي ادخل سوق العمل واخد خبره سنتين بوظيفه ثابته مثل شركات و اخصائي قانوني لكن ما لقيت عندنا أبدا أبدا فرص بمسمى اخصائي

ف سوالي مع المعدل و المهارات الي عندي و اللغة وش اقدر أتوظف بالقصيم لو ما لقيت تخصص يخصص القانون ؟

مدري وين اكتب بس مره متضايقه ليه كذا مستشفياتنا ليه ليه
جايتهم انزف بسبب هرمون مرتفع و دمي مخلص و دايخه واخرتها طلعت ما عطوني ولا شي وهو طوارئ والدكتوره تزبد لي لما سألتني انتي مجهضه ؟ قلت اساسا أنا مو متزوجه وصرفتني وطلعت بدون شي وانا انزف ولا وقف للحين وبرجع البيت كذا

وقبلها كنت انزف و ابكي و بطني مو قادره أوقف ماسكه يد ابوي و الدكتوره و كانت تخوف يا ناس تهاوشني وتقولي انتي مو متزوجه وفي بيتك ابوكي شلون تنزفين دم شلون ؟؟؟ وانا خايفه من هواشها و تسحبني للغرفه وتدخلني وتقولي نزلي ملابسك بشوف وانا خايفه خوف من النزيف و منها شلون نزلي ملابسك بشوفك !!! وسوت لي سونار تفغص بطني و تقولي انتي في بيتك ابوك مو بيت زوجك كيف تنزفين كذا هاه كيف !

كيف تدخل عندكم وحده تنزف وانتم طوارئ وتطلع وأساسا ما سويتوا شي ):