u/RecoverNext5889

ماريك

بيفكرني بحاجا

طبعا مش محتاج أقول أن المتدينين على طول بيتهمونا، نحن معشر الملحدين والأجنوستيك والعلمانيين في العموم، بموالاة الغرب وبلا بلا بلا.

أنا بقى عايز أعرف مين الكذاب الأشر اللي فهمهم كدا؟ هو أنا عشان خرجت من دين الإذلال وتحقير الذات بتاعهم دا أبقى موالي للغرب؟ ولا أنا عشان عايز ديمقراطية وليبرالية وأبسط حقوق الإنسان أبقى موالي له؟ إيش جاب لجاب؟؟!!!

أود أن أمنح المتدينين صدمة مستحقة، وهي أني مبطيقش سحنة الغرب أصلا… صحيح أنا معجب بحاجات كتيرة في الغرب وعايز مصر تعمل زيها (شبه الديمقراطية والليبرالية والقوانين والحقوق وحماية المرأة والأقليات والاقتصاد القوي والبحث العلمي ووو…) بس في نفس الوقت أنا كاره بالمطلق حرفيا لسياسات الغرب الخارجية، من أيام الاحتلالات الأوروبية القديمة التي ارتكبت الفظائع بحق أجدادنا، لحد البلطجة والمسخرة الأمريكية حاليا، والقرف اللي صدعونا بيه هنا، في المنطقة اللي هم نفسهم سموها باسم غبي زيهم، واللي هو "الشرق الأوسط"… ومستني اليوم اللي فيه أمريكا تغور بلا رجعة من المنطقة، عشان أعمله عيد حرفيا.

ليه؟ لأن المفاجأة اللي مش مفاجأة هي أن المتدينين عموما، والإسلامجية خصوصا، دايما بيصوروا نفسهم على أنه "حماة حمى الهوية والثقافة المحلية والإقليمية ضد التغريب" بينما الواقع بيقول أنهم، هم وأيديولوجياتهم الرجعية البغيضة التي لا تصلح للحياة الحديثة، كلهم عايشين على جهاز تنفس صناعي اسمه الدعم الغربي نفسه، وبدونه هيختفوا حرفيا… بينما الناس "المتغربين" فعلا في المنطقة هم أكتر ناس الغرب المنافق دا بيكرههم، والتاريخ كله بيقول كدا.

- زمان خالص في القرن الـ19، محمد علي باشا مسك مصر وعمل فيها تحديثات شاملة على النسق الغربي، وفي نفس الوقت كان في طاعون إرهابي في شبه الجزيرة العربية اسمه الوهابيين… وطبعا زي ما احنا عارفين، محمد علي بعت ابنه إبراهيم باشا يمسح بيهم البلاط، ويدفن الوهابيين دول في رمال نجد لفترة طويلة جدا… لحد القرن التالي لما بريطانيا احتلت المنطقة، وطلعت الوهابيين دول من مزبلة التاريخ عمدا، ومنحتهم مملكة ما زالت حليفة لبريطانيا وأمريكا والغرب كله لحد دلوقتي… دا بجانب شوية "ممالك" تانية صغيرة اتعملت بنفس الطريقة.

- في 1882 لما الاحتلال البريطاني دخل مصر، كان هدفه الرئيسي هو حماية عرش الخديوي الديكتاتور توفيق وملكيته شبه المطلقة، وتخليصه من عدوه أحمد عرابي، اللي ثار وطالب بحقوق الشعب وبرلمان على النسق الأوروبي (حرفيا).

- لاحقا، الحركة الوطنية المصرية اللي قاومت ضد الاحتلال، كانت حركة علمانية بامتياز، وعايزة "تطرد الاحتلال البريطاني وفي نفس الوقت تعمل دولة مستقلة نظام حكمها يشبه النظام البريطاني"… فالاحتلال عمل إيه؟ راح جاب واحد معتوه محدش يعرفه برا منطقته، عنده أيديولوجيا رجعية إرهابية، وموله لحد ما مكنه من تأسيس جماعة ضخمة (جماعة الخرفان) بهدف أنها تبقى عدو للحركة الوطنية.

- في فترة ما بعد الاحتلال، عبد الناصر حارب الجماعة الإرهابية المذكورة أعلاه، والعديد من عناصرها هربوا إلى مملكة الوهابيين… في نفس الوقت، بريطانيا كانت بتدعمهم نكاية في عبد الناصر ومصر عموما.

- لاحقا، بعد ما أمريكا استلمت دور "الهيمنة" الإقليمية من بريطانيا، عملت اتفاقية البترودولار مع الممالك المذكورة أعلاه، واتفقت معاهم على نشر الوهابية والأصولية الإسلامية عموما في الدول ذات الغالبية المسلمة، بحجة محاربة المد الشيوعي السوفيتي… مع أن كان بإمكان أمريكا دي تحاول تنشر نموذج الديمقراطية الليبرالية مثلا، لكنها قررت عمدا أن تنشر نموذج أحقر من الشيوعية نفسها حرفيا، لأن صاحبه معاه بترول وبترودولارات… وكلنا عارفين النتيجة: شوارع بلادنا اللي كانت "عادية" حرفيا والستات فيها بيمشوا بشعرهم زي بقية العالم، تحولت إلى نسخة من شوارع القرن السابع، مع فرق أن القرن السابع مكانش فيه حاجة اسمها أمريكا.

- في إيران، كان عندهم في الخمسينات حكومة ديمقراطية بقيادة رئيس الوزراء محمد مصدق، ولما هو أمم البترول أمريكا وبريطانيا الـ2 اتقمصوا وعملوا عليه انقلاب ورجعوا السلطة للشاه الديكتاتور… ولما الشيوعيين، المدعومين من الاتحاد السوفيتي المتاخم، انتشروا في البلد، الغرب كله رد بدعم الإسلاميين بقيادة المجرم الهارب خميني… ولما هو مسك الحكم وغفل الغرب وانقلب ضده على طريقة عبد الناصر كدا (وحاول إسقاط الممالك شبهه بردو)، الغرب رد بتقوية تحالفه مع الممالك والوهابية، رغم أنه عارف أن الوهابية أشد تطرفا من خميني دا نفسه.

- الممالك، مجددا، مولت تنظيم القاعدة (اللي عمل 11 سبتمبر) وأمثاله من التنظيمات الإرهابية، ورغم ذلك أمريكا مقالتش حاجة عشان بيدفعوا بترودولارات كتير، وراحت احتلت العراق اللي ملهاش علاقة أصلا، عشان خاطر الممالك نفسها دفعت لها بردو.

- حاليا، الممالك مولت المرتزق البرتقاني الحاكم لأمريكا عشان يعمل حرب شاملة ضد إيران ويحتلها شبه العراق… وبيدفعوا له تريليونات حرفيا عشان "يحميهم" لأنهم عارفين أن بدون أمريكا فإن ممالكهم كلها هتختفي أصلا، وطبعا الوهابيين وبقية الشلة كلهم هيحصلوها… وأمريكا كلها (مش بس المرتزق البرتقاني) فاهمين كدا كويس، وعارفين هم بيحموا مين، ومع ذلك مش في دماغهم… المهم الفلوس.

يعني طول الوقت حرفيا، الغرب اللي بيتم اتهامنا احنا بموالاته هو نفسه الغرب اللي بيحمي الإسلامجية نفسهم هم والممالك الممولة لهم، ومديلهم مطلق الحرية يقطعوا علينا احنا النفس، مقابل أنهم يشتغلوا كأدوات في إيد حكوماته المرتزقة شكلهم هم نفسهم، ومقابل أن ممالكهم تدفع لهم فلوس… وبعد كدا مستنييني أبقى موالي للغرب دا؟ أواليه ازاي وهو بيعمل كل حاجة عشان يمنعني من أني أبقى **شبهه**، وبيدعم كل اللي عايزين يمنعوني من كدا؟؟!!!

نأمل أن حرب إيران الحالية تخلص بأن أمريكا تغور من المنطقة كلها بلا رجعة، عشان بعدها نتخلص من ممالك البترودولار وأتباعها اللي حرموا علينا العيشة دول… وبعدها مش عايز أسمع حاجة عن أمريكا دي أصلا غير الأغاني، وعلى راسها أغاني الفنانة تايلور سويفت طبعا.