فيلم الخروج من القاهرة
قبل عبده موته والألماني، محمد رمضان عمل فيلم من بطولته اشك ان فيه 18 واحد على بعض شافوه... وانت مكن هتسمع اسمه لأول مرة.. الفيلم اسمه "الخروج من القاهرة"
الفيلم بيحكي عن فتاة مسيحية اسمها (أمل - كوكي اخت روبي) بتحب شاب مسلم (طارق - محمد رمضان)، ولكن طارق بيحلم بالسفر للخارج لتحقيق طموحاته التي يفشل في تحقيقها في مصر.
أولا الرقابة اعترضت على الاسم، وقالت مفيش حاجة اسمها الخروج من القاهرة... سموه الخروج بس.. واللبيب بالإشارة بقى... ثانيا الفيلم بعد ما اتعرض في مهرجان دبي... اختاروه يمثل مصر في مهرجان الأقصر للسينما الافريقية... لكن فجأة الفيلم ما اتعرضش...
إدارة المهرجان قالت الرقابة رافضة عرض الفيلم، الرقابة قالت إدارة المهرجان لم تتقدم أصلا بطلب لعرض الفيلم ولم يصلنا شىء رسمي... حلو يعني لو وصلك عرض رسمي لعرض الفيلم هتوافق.. فالراجل قال: "نحن لسنا ضد عرض الفيلم، رغم أن عرضه في هذه الظروف ليس مناسبا"... طيب يعني ما انت مش موافق أصلا اهو...
الفيلم حب يناقش علاقة المسلمين والمسحيين والحريات الدينية، والبطالة، والفقر، وحلم الهجرة للخارج، والهجرة غير الشرعية.. وحب يناقش كل حاجة... فالسيناريو تحسه متروس.. كل ما تمشي فيه شوية تتكعبل قي مشكلة...
عيلة امل بقى، أولا أمها اتجوزت راجل مدمن فمات اوف ردوز... اخت امل الكبيرة جوزها سابها وطفش... فاشتغلت فتاة ليل، وامل بتحب طارق، اخو امل بيحب واحدة مسلمة، وسابها وهرب...
الرقابة رفضت عرض الفيلم وقالت انه ممكن يؤدي لفتنة طائفية.. ثم صرحت بعرضه.. ثم الفيلم نفسه مبقاش ليه وجود... ولا بيتعرض في التلفزيون.. ولا حد بيتكلم عنه..
الفيلم من بطولة محمد رمضان وكوكي، واحمد بدير، نبيل الهجرسي محمد الصاوي، من تأليف هشام عيسوي وأمل عفيفي وإخراج هشام عيسوي، ومن إخراج سنة 2011..
الفيلم قريب في فكرته العامة من فيلم لحسين صدقي اسمه "الشيخ حسن"، الفيلم دا ليه قصة اغرب من الغرابة.. نبقى نحكيها بكرا...
هل لمحت الفيلم دا قبل كدا في أي حتة؟