إيش وصلني لذا المستوى ؟
السلام عليكم ورحمة الله وبركاته،
مساكم الله بالخير ✨️
هذي مشكلتي وبحكيها ومحتاج مساعداكم.
أنا شخص عندي أهداف بالحياة لكن لاحظت الأونة الأخيرة خف الحماس لتحقيق هذي الأهداف بشكل كبير جدا، كل يوم تسويف كل بوم تأجيل لليوم اللي بعده، صرت إنسان عايش على الخيالات الجميلة اتخيل نفسي حققت أهدافي واستمتع واندمج في هذي الخيالات بالساعات الطوال بينما الواقع لا شيء .
لاحظت إني زمان ما كنت كذا - صحيح ما كنت الأحسن لكن على الأقل كنت أسعى - أما بعد دخولي الجامعه رغم إني داخل التخصص اللي ابغاه و الجامعه اللي ابغاه وعندي هدف معين من التخصص إلا إنه برضو تشتت عن الهدف اللي وضعته لنفسي.
صرت أندمج مع الفعاليات الطلابية رغم إني ما أحس نفسي فيها لأنها أمور شكلية فقط وغير كذا لا تخدم اهدافي اللي أنا حطيتها ، بس دخلت عشان احس اني مقبول و الناس تحبني - رغم إنه ما كان هذا طبعي زمان - صرت بس ابغى أملىء احتياج الانتماء بس.
يمكن يعود سبب حاجتي للإنتماء بعد ما الوالدة قالت اني ما تمنيت اني انجبتك وانا اصلا مجبورة على الزواج الخ الخ ☹️💔 ، هذي كانت زي الصاعقة خصوصا لأن من اهدافي اني اسعد امي - انا ما اكرهها او زعلان منها او حاقد لكني صدمت الصراحه - كنت اقول في نفسي لو إنها خيرت بيني وبين اني ما اكون موجود فراح تختار الخيار الثاني.
علاقاتي مع الناس صارت سيئة، الكل يسلك لي، الكل ما يحترم حدودي اي طلعه انا اخر واحد يدري واخر واحد يعزمونه واكثر الوقت ما يكلموني، اذا طلعوا، اذا زعلت يراضوني بالكلام بس.
ملاحظ انه دايما العب دور الطيب اللي ما يزعل و الكريم اللي دايم يسامح ودايم اكلها على راسي فلا انا اللي حصلت احترام ولا أنا اللي حققت مبتغاي.
اخوياي صاروا يعاملوني كمزبلة فضفضة لا كشخص خويي نتستانس معه . حتى اللي اتعرف عليه جديد فجأة يستهين فيني ويسلك لي وينسحب
وقت النشاطات و الأعمال بالجامعه الكل يسحبني سيفون لدرجه قدمت على منصب في مجلس طلابي وكان ماسكه واحد من اخوياي وقلت له بدخل معكم في المجلس قال لي تمام ونكلمك وبنسوي معك انترفيو الخ الخ وفجأة لقيته مدخل واحد من اخوياي بدالي بدون لا مفاضلة ولا شي، رحت واجهته بالموضوع وبدا يصرف. أضف على ذلك كنت ماسك نادي معين في احد تخصصات الادارة وبعدها بفترة قام أحد الطلاب بالتآمر ضدي مع احد الكادر التعليمي عشان يشيلوني من منصبي 😕 وفعلا من يوم ما دريت عن الطبخة انسحبت بكرامتي .
اللي مزعلني كثير من اخوياي كاموا يعرفون عن الطبخه اني راح انطرد لكن محد علمني مع اني انا اللي اخترتهم معي بالنادي ☹️
و الكلام يطول الصراحه لكن سؤالي " ايش العيوب في شخصيتي اللي وصلتني لكذا ؟ ووصلت الناس لأنهم يتعاملون معي زي كذا لدرجه محد يحسب حساب كلامه معي هل يزعلني ولا لا ؟ وهل أنا عندي نقاط عمياء ؟ بمعنى سلبيات تنفر الناس مني وانا ما ادري ؟
وهل أنا مصاب بالوهن ؟ وقبل لا أحد يعلمني ايش الحل ابغى احد يعلمني ايش السبب إللي خلاني أدخل في هذي الدوامه؟ وأيش هي الحلول الجذرية للمشكلة ؟