Let’s debate!
أول** حاجة نهضرو على الحريات ديال كل **شخص :
كيفما كولشي عارف المونديال راه ملعوب و حنا كمغاربة راه كنشجعو المغرب عادي بحال أي دولة مشاركة.
المشكل لي لقيت فالبوسط هو أنه تدخل فحريات الغير بحيت أنه انتقد أن بنادم يخرج فرحان بالمنتخب و زاد انتقد الناس اصحاب الدخل المنخفض بأن ماعندهم الحق يحتفلو و يفرحو.
ماعرفتش واش بغا يقول بلي ماعندكش الحق تحتفل ايلا كان الدخل ديالك ناقص ولا ماتحتافلش أصلا.
كورة** مارابحين منها **والو :
اخويا حنا عارفين ماكانديو منها والو غير جلدة منفوخة بالصح حنا كيعجبنا نتفرجو عادي حنا بغينا نتفرجو ماشي سوقك نتا مابغيتش تتفرج ماتفرجش غير ماتقلبلناش راسنا تا واحد ماجا حط عليك السلاح و قالك تفرج و شجع بزز.
أش** دخل قطاع الصحة و قطاع التعليم فالجامعة و **الكورة :
واحد من المغالطات الكبار لي كيطيحو فيهم الناس هي أنه كيصحابلهم ميزانية المغرب كاملة كاتمشي فالكورة و هادا غلط، حيت الصحة و التعليم قطاعات تابعة للوزارة أما الجامعة الملكية لكرة القدم ماعندهاش دخل فالوزارة هي فقط كاتمثل المغرب بحالها بحال اللجنة الوطنية الأولمبية المغربية.
الجامعة الملكية كاتاخد من ميزانية الدولة 1,2 مليار سنتيم، عدد لي نتا غادي يبانلك كبير بزاف بالصح راه لا يقارن بالميزانية لي مخصصة لقطاع الصحة لي كيوصل تال 42 مليار و قطاع التعليم لي واصل ل 97 مليار.
اوا** و التيرانات و البنيات التحتية لي كيضيعو فيهم الفلوس ****؟**
هادي بالنسبة ليا أنا متافق أن الصحة والتعليم أولويات، ولكن ماشي أي درهم مشات للرياضة يعني راه تحيد من السبيطار. التيرانات تبناو من أجل تنظيم تظاهرات بحال كأس إفريقيا وكأس العالم و ممكن يكون استثمار اقتصادي وسياحي إلا كان مخطط ليه مزيان. المشكل الحقيقي ماشي واش نبنيو ملعب ولا سبيطار، المشكل** هو جودة التسيير والمراقبة فالقطاعات كاملة.**
باش مايمشيوش الناس غلط القطاع ديال الصحة و التعليم قطاعات لي ضرورية، حنا بالصح فالترتيب ديالهم عالميا طايحين بجوج بالصح هادو مواضيع ماشي ديال تدخلهم فالكورة حيت بجوجهم لا علاقة مع بعضياتهم. لا شاداك الحرقة لهاد الدرجة اخويا مرحبا دخل انخرط فالجمعيات و الاحزاب السياسية و هاهما الانتخابات جايين شوف الحزب لي كيمثل التطلعات ديالك و عطي الصوت ديالك و كن عضو فعال فالمجتمع و عطي حلول. أما الانتقاد من أجل الإنتقاد راه لا معنى له.
النقد** حق أي واحد، ولكن خاصو يكون مبني على معلومات صحيحة وماشي على فكرة أن أي فرحة شعبية هي سبب المشاكل.**
أنا** فالأول و الآخير كل واحد يحترم حرية الآخر، بغيتي تتفرج و تفرح مرحبا، بغيتي ماتتفرجش شغلك هاداك غير ماتتدخلش فشغالات تانتا الناس.**