يوم النتيجة، يوم إنتهاء المسرحية
العيال طالعة من المدرسة بتقول الحمدلله نجحنا
وأنا طالع أقول آه من ديه مسرحية عايشينها
نجحنا إيه بس بالوهم الي إحنا عايشينه ده
في مدرستي النتيجة طلعت، وبتكون متعلقة على جدار المدرسة، راجعت كل درجات الطلاب وكان طلاب أولى وتانية ثانوي كلهم ناجحين باستثناء كام طالب لا يتعدوا الـ10 وهم الي غابوا ومحضروش امتحان محدد فقط
عندنا توزيع الدرجات بيكون 30٪ لامتحان الترم، واللجان بتكون أشبه بسوق أو قهوة، والغش فيها...
اما عن عبث أعمال السنة
30٪ درجات في امتحانات الشهر، والي كانت حل جماعي وبـGemini كذلك.
ومعتقدش كانوا بيصححوها، لأن مدرس المادة بتاع الفصل الي هيصحح الامتحان كان واقف علينا وشايف العبث الي بيحصل.
كله كان بيغش، وسايبنا عادي، فهل هيضيع وقت في تصحيح الورق بعدها؟
40٪ تقييمات وكراسة وسلوك وغياب، ولازم تروح المدرسة يوميا عشان تاخدهم، حتى لو مكنش في أي إفادة حقيقية من حضورك المدرسة، بس هو كده
كل يوم تقييم مادة شكل ولو غبت في يوم ممنوع تعوض التقييم وهتنقص درجة ونص
التقيمات بتنقلها اهم حاجة السؤال بالأربع اختيارات بالإجابة والكراسة احشيها اي كلام
مدارس كتير مش بتلتزم بالكلام ده والعيال مش بتحضر والمدرس بيحط الدرجة من دماغه او حسب المدرسة عايزة ايه
ومهما عملت من مجهود في كل الأحوال مش هتقدر تاخدهم كاملين، حتى لو بذلت مجهود جبار في الحضور
باستثناء طبعا لو قررت تاخد درس مع مدرس الفصل
في أولى وتانية معروف إن محدش بيسقط طالما حضرت الامتحان وكتبت اسمك هتنجح والموضوع بسيط
مش عاوزين حد يجي يقرفنا في الصيف فنجح كله
إدارة المدرسة وقت الامتحانات بتأكدلنا إن كلكم ناجحين بأعمال السنة، حتى الي مكنش بيحضر نهائي
أهم حاجة متعملش دوشة وقلق في الامتحانات
النهارده شايف عيال جابت أعلى الدرجات ومفتحتش كتاب بمعنى الكلمة
وطلاب بذلت جهد وذاكرت ومجابوش مجموع، وناقصين كتير.
مش مستريح نهائي للي أنا شايفه في النتائج.
مش حزين على نفسي أكتر ما أنا حزين على طلاب زي الورد تعبوا وبذلوا كل ما عندهم، وتساوت نتيجتهم بنتيجة من لم يفتح الكتاب وردود كتير تحطم وتُبذل من هذا النظام البائس الفاسد
جبت النتيجة... بس إيه الي استفدت منها ؟؟
فأنا عارف إني ناجح كده كده، وديه مش نتيجة مجهودي ونتيجتي في الورقة بل عبث أعمال السنة.
يعني إيه مقفل في ورقة الامتحان وناقص 15 درجة
و الي مكنش بيروح المدرسة أصلا بس بياخد درس عند مدرس الفصل، مش ناقص إلا درجتين
ولازم بعدها تبدأ تقنع والدك والدتك كل مرة بإنها اعمال سنة وان مستواك احسن من كده....
ايه مفهوم النجاح عندنا وايه فائدة الدرجات طالما تقدر بسهولة تاخدها بناء على الجهد الذي تبذله في التمثيل، لا التعلُّم
يوم النتيجة عندنا ليس يوم حصاد ما بذلته في العملية التعليمية
بل يوم حصاد نجاحك في التمثيل والضحك على نفسك
والآباء يصفقون للمسرحية في النهاية...
وده شوفته لما لقيت الآباء فرحانين بالنتائج وبيشكروا إدارة المدرسة
بينما المجتهد الذي حاول فعلا في سبيل التعلُّم ينتهي به الحال مكسورًا يطارده اللوم والعتاب
خرج الجميع من المسرح مبتسما وانا مازلت عالقا بداخله اتفكر في ما الذي كنا نفعله؟
وما هذا الذي كان يحدث...
سأتحسر قليلا على حالنا ثم أتابع المسير وأحاول وأسعى في سبيل التغيير، فليس هناك خيارات أخرى على أي حال.