العلمانية يعني امك تقلع الحجاب ؟
كنت شفت بوست لواحد بيتريق على المؤمنين، وإنهم مش عارفين معنى العلمانية، وكان حابب يصحح مفهومهم عنها.
الراجل بدأ تصحيحه بتعريف العلمانية إنها فصل الدين عن الدولة واحترام جميع البشر وأديانهم! ولكن للمفارقة، رغم تنظيره على المؤمنين وإنهم مش فاهمين يعني إيه علمانية، فهو نفسه تعريفه ناقص، أو على الأقل مش بيعبر عن كل أشكال العلمانية.
العلمانية جاية من كلمة saeculum، واللي معناها "هذا العصر" أو "العالم الدنيوي"، وده لأن العلمانية هي نظام بيهتم بالشؤون الدنيوية بدلًا من الشؤون الدينية أو الأبدية. أو زي ما عرفها مراد وهبة، دكتور الفلسفة، بأنها: "التفكير في النسبي بما هو نسبي، وليس بما هو مطلق."
يعني ببساطة، العلمانية معناها التفكير في الشؤون العامة بشكل غير قائم على المرجعية الدينية، فالعلمانية مش بالضرورة معناها احترام جميع الأديان أو جميع المتدينين.
أما بقى أنواع العلمانية، ففيه تلاتة من أشهر النماذج:
State Atheism
نظام الدولة الملحدة، وده نظام علماني كان موجود في دول شيوعية زي الاتحاد السوفيتي وألبانيا ويوغوسلافيا... وده نظام كان بيعتبر الدين مجرد خرافات لازم محاربتها، فكان بيضطهد المؤمنين، ويقفل دور العبادة، ويعلم الأطفال من صغرهم احتقار الأديان.
---
Laicism
وده نظام علماني أقل عنفًا من نظام الدولة الملحدة، وكان موجود في فرنسا، وتركيا في عهد أتاتورك. النظام ده مش بيهاجم الدين بشكل مباشر، لكنه بيحاول يبعده عن الحياة العامة، فمثلًا يمنع ارتداء الحجاب أو الصلبان في بعض المؤسسات الحكومية والجامعات.
---
Liberal Secularism
وده النظام الليبرالي الرأسمالي، واللي بياخد موقفًا محايدًا من الأديان طالما مفيش صدام بينها وبين قوانين الدولة أو النظام السياسي والاقتصادي.
لكن أول ما الدين يتحول لحركة سياسية أو اقتصادية بتعارض النظام، بتبدأ المواجهة. وده مثلًا اللي حصل مع لاهوت التحرير في أمريكا الجنوبية، لما اصطدم بمصالح أنظمة ليبرالية بسبب موقفه من الرأسمالية. ونفس الفكرة حصلت مع بعض الحركات الإسلامية اللي كانت رافضة للنظام الليبرالي.
يعني هو نظام بيتسامح مع الأديان طول ما الأديان مش بتحاول تغير قواعد النظام نفسه.
---
الخاتمة
نيجي بقى للسؤال أبو مليون جنيه: هل فعلًا العلمانية معناها إن أمك تقلع الحجاب، ولا ده مجرد جهل من المؤمنين؟
الإجابة: آه ولأ.
آه، لأن فيه أنظمة علمانية أجبرت ملايين الستات على خلع الحجاب، زي نظام أتاتورك، ونظام رضا شاه في إيران، وسياسات الاتحاد السوفيتي في بعض الفترات.
ولأ، لأن فيه أنظمة علمانية تانية معملتش كده، زي كندا وأستراليا.
فمينفعش يا عزيزي العلماني تختار نموذج كندا، وتتجاهل نموذج ألبانيا أو الاتحاد السوفيتي، عشان تتهم المؤمن إنه جاهل. انت كل اللي بتعمله كده هو اثبات انحيازك وانتقائك للكرز
بمعنى آخر، الخوف من بعض النماذج العلمانية له أساس تاريخي وهو شئ مبرر مش بسبب جهل المؤمن بمعني العلمانية زي ما الميمز بتحاول تصور 🤷🏻