كارثة روز

چانت بمعمل ثاني بس ليل ونهار گامت تبقى بمعملنا، خلفت أكثر من مرة بس هي مهملة تفقد جهالها هواي

صار عندها تساقط بالشعر وتقريباً كل شعرها وگع، جبت الها صديقي دكتور (لان ما تقبل تطلع لاي مكان تتعارك وتخبص الدنيا) انطاها كنفيت بيوتين وبخاخ مال فطريات ورجع شعرها بس مو مثل قبل لأن لازم واحد يبقى يمشط الها

بس شي على شي مرتاحة هنا

روز نظيفة بشكل مو طبيعي رغم المعمل ما يساعد بس دائماً تمسح نفسها وجهالها وگال صديقي البيطري انه كثرة انها تلحس نفسها بالضرورة بس تنظيف يجوز توتر وقلق وهاي عوامل مال تساقط هم

مشكلة روز شرانية وي غيرها من البزازين، ما تقبل اي بزون يطب المعمل غريب وعمي صاحب المعمل يحب البزازين وكل يوم يجيب الهن أكل، بس اي بزون يطب تملخه من الكتل وتلحگة لبرة تكتلة وترجع

عندي احساس جاي يگول (هاي شبيهم هذولة المخابيل)

thank me later, bye

المشكلة هسه كل حچاية والثانية يگلك انت ليش خاضع لامريكا؟ يابة آني مو خاضع بس هي هاي المعادلة بالقوى السياسية لازم نتماشى وياها وجاي تشوفون دول الخليج بخير وسلام وفلوس وكهرباء ومستشفيات وخدمات كلشي بيها مفول، يرجع يگلك "هذولة مطبعين" عمي اذا التطبيع هيچ خلي انطبع ونخلص، يرجع يگلك "وتعيش بدون كرامة؟" يمعود هي وين الكرامة اللي مسلوبة من الإمارات مثلاً شو اول عشر دول بالسياحة واقتصادهم خير ومستقر ومواطنهم مرتاح ما يريد حتى الجنة من النعيم اللي عايشه

آني شخص ما اسأل على اي شخص ثاني الا ما ندر، ما بيه حيل أتصل على گرايب لان عائلتنا چبيرة، ما إلي خلگ مشاعر مزيفة وگلبي وحياتي هي حچايتين واطلع، ما اعتب على الشخص اللي ما مخابرني ولا احب ينعتب عليه، معزتك بگلبي وخلاص وتگدر تخابرني كل سنة وعلى مصلحتك عادي ما اضوج لذلك محد يكرهني

وكل شخص يعاتبني اگله حقك عليه وآني مقصر حتى لو آني ما مقصر، فـ والدتي تضوج تگلي انت ليش تنطي من نفسك؟ اگلها آني ما بية حيل آخذ وأنطي بهيچ مواضيع لا تغني ولاتسمن من جوع، گالت كرامتك وين؟ گلت الها محفوظة بدليل انتوا تگولون اللي يعاتب يحب، راح اعتبره اللي يعاتب يحبني، فتزعل مني

خالي أخو أمي طردني بسبب أفكاري وتوجهاتي (وهذا الوحيد اللي بحياتي اللي أخذ موقف من اختياراتي الفكرية) طلعت وما حچيت لأي شخص، ورة فترة ابوية وامي عرفوا وغسلوا الگاع بخالي، رجعوا غسلوا الگاع بيا وليش ما گلت النا وطيح الله حظك ومن هالامور، اگلهم يابة آني ما اهتم لهيچ سوالف ولا احب اموٮْْ ناقص عمر بـ هَم وتفكير بشغلة صارت بيوم واحد، الحدث اللي يصير باليوم لازم يخلص بنفس اليوم، هسه هم صايرة مشكلة وجر وعر وي أختي وبقية گرايبنا يريدوني لو اوگف وياهم لو آني اطلع ناقص، يابة آني رجال محايد لا تعتبروني موجود اعتبروني طرطور

لذلك من اشوف كم الحچي الرايح جاي بعائلتنا والعوائل البقية بسبب شغلات تافهة وآني اصلاً ضغطي الطبيعي معلگ وصاعد فـ ليش أغث نفسي؟ لذلك الكلام الكم هم، اي مغثة تصير عندك هو اليوم راح يخلص سواء ضجت او ما ضجت ما راح يوگف شي عليك، حاول تجامل وكل شخص تقابله انطيه كلمة حلوة، راح تنذكر وتنعاد يجوز احسن مما يركبكم هَم بمشاكل انتوا في غنى عنها

الحشد الشعبي اكو هواي يجهلون كم الفصائل اللي بيه

الحشد هو هيئة عسكرية رسمية تابعة للقائد العام للقوات المسلحة اللي بدوره هو رئيس الوزراء

ولكن هاي واجهة فقط، الحشد نگدر نقسمه لـ3 تصنيفات

- حشد العتبات (المديريات للأماكن المقدسة بالعراق) وهذولة منظمين وياخذون أوامرهم وينفذون أيضاً الأوامر الخارجية بعلم وموافقة الدولة

- حشد الفصائل "الولائيين" هذولة ياخذون شورهم من راسهم وارتباطهم بإيران ودعمهم الاستراتيجي هم مناك وعندهم اجنحة سياسية واقتصادية چبيرة اخذوها اغلبها بطرق ما نريد نحچي بيها لا ننشال لان النفوذ اللي عندهم بالبلد يگدرون يمدون إيدهم حتى على رئيس الدولة لانهم ما يعترفون بالعراق كوطن وأرض لهم، يعتبرون ان إيران تمتلك المشروع الإلهي لبسط الأرض تمهيداً لظهور المهدي لذلك مشروع إيران التوسعي هو جزء من خطة العدل الإلهية

- حشد سرايا السلام وهذولة عندهم خصوصية جغرافية وتمركزهم بسامراء حصراً وهسه هذا الخبر يعلن بي دمج القوات داخل القوات العسكرية الأمنية المؤسساتية، يعني صار تحت تصرف القيادة العامة حتى يندمج بأي وزارة أمنية رسمية، واكو بعد حشد عشائري بس هذولة وجودهم ونفوذهم عدد لا اكثر ما عندهم مصدر قوة بالقرار السيادي

وعليه، الحشد يتكون (حسب المعلن) حوالي 53 لواء ما عدا الألوية الغير معلنة يعني ممكن يوصل عدد الألوية الولائية اللي ممكن يوصل عددها حسب التقديرات 50 لواء، مقسمة هواي ما بين مثلاً 3 ألوية كتائب ح الله وما بين 3 للعصائب و2 للنجباء وكتائب سيد الشهداء وبدر و و و و و و...

حشد العتبات عندهم 4 ألوية أساسية ما عندهم اي تشكيلات ثانية، هذولة قرارهم بيد الدولة حصراً، سرايا السلام هم عندهم 3 ألوية وكلها بسامراء

لذلك العالم اجمع ما عدا إيران تسمي هاي الفصائل الولائية (وكلاء إيران) ولكن إيران ترفض التسمية وتسميهم (حلفاء فقط)، لان الحليف ما عليه حرج عليه اذا سوة چفصة، بس الوكيل كالنائب يتبع إلي وشكو غلطة يسويها راجعة إلي

العراق بمفترق طرق هسه، لو راح نگدر ننصاع للإرادة الدولية وننهي الفصائل بشكل تام وندمج الحشد بالدولة حتى نگدر نعيش، لو راح نبقى معندين ونصيح بالمقاومة وكرامة وهاي الشعارات الفارغة اللي راح تضيعنا كلنا وننزل جوة الصفر اللي احنا بعدنا ما واصلين أله

واحب ادوخكم مثل ما ادوخكم بالجرايد اللي اكتبها

من الشغلات اللي من زمان مدوختني هي هاي

النقطة الثانية اللي هي آية 260 البقرة، وإذ قال ابراهيم ارني كيف تحيي الموتى قال أولم تؤمن، الله هنا ليش جاي يحچي بضمير الغائب ليش مو بضمير المتكلم، يعني الله جاي يگول "وإذ قال ابراهيم كذا وكذا" يعني الله جاي يسولف النا، ليش ما يگول وراها "قلت أولم تؤمن" ليش گال "قال أولم تؤمن"؟ يعني منو اللي قال غير انت؟ هو اكو الله ثاني حچه وياه؟ انت مو جاي تسرد القصة ليش تگول قال بدلاً من قلت؟ مرة طرحتها فواحد عود متفقه يگول هذا سرد الوحي للنبي، گلت له يعني الوحي يسرد كلمات واحرف من كيفه وهاي الكلمات نزلن بالقرآن؟ صفن شوية وگال "اي بس بعلم الله وموافقته" فـ گلت له انطيني الدليل بعد عمك، گال "انتظرني وتدلل" وهذاك يوم وهذا يوم

بسورة النساء مثلاً آية 147 شفناه يگول "وكان الله شاكراً عليما" هم رجع استخدم ضمير غائب لأن الفعل "كانَ" مسند الى اسم ظاهر يُعامل معاملة المفرد المذكر الغائب بالقواعد، الأسلوب هنا هو أسلوب الغيبة ومو التكلم مثل كل مرة، رغم ان "كانَ" ماضي وهاي قضية لوحدها

مع ذلك، بسورة القمر آية 35 يگول "كذلك نجزي من شكر" هنانة فجأة الله گام يحچي بضمير المتكلم ويگول يابة احنا نجزي، بس هم صارت جمع بس يلا عادي هاي شغلة متداولة چانوا كبار قبائل قريش يگولوها للأحساس بالعظمة والكبرياء

اللي اريد اگوله، انت مرة تحچي بضمير الغائب، مرة متكلم، مرة جمع، مرة ماضي، مرة حاضر، ليش ما جاي تعرف تثبت على قاعدة؟ وحدة من المشاكل انه فعلاً قواعد اللغة الحالية اتشكلت إسلامياً كسنن، بس هاي كارثة بحد ذاتها، الفقيه ورجل الدين لازم يطلع هذا الكتاب أنزه ما في اللغة وهو أساس اللغة، واحنا بعينا جاي نشوف كمية الاخطاء الرياضية واللغوية والنحوية

اساساً اكو مشكلة مرة قريتها من تقرير لعالم مخطوطات مغربي أسمه محمد المسيّح يگول بيها ان المستشرقين الفرنسيين او الألمان داخوا بآية 1 من سورة المسد "تبت يدا أبي لهب" يگولون بعد شيوع اللحن والخطأ باللغة العربية القرآنية لانها كانت بدون نقاط او تشكيل وحدة عالمة مستشرقة تگول منو يگول ان الآية معناها "تبت" يمكن "ٮٮٮ" زين يابة هي بدون نقاط ما مفهومة شنو تقصدين، گالت يمكن الكلمة "بتت يدا أبي لهب" مو "تبت"، يعني مو معنى "خسر" بل معنى "قطع" والمستشرقة طلبت تشوف مخطوطة صنعاء حتى تعرف الرسم بالخط الحجازي شلون صاير بس المخطوطة باليمن ورفضوا لغاية اليوم يشوفوها لاحد، هاي المخطوطة بيها حوالي 40 الف قصاصة لگوها وأجو علماء وگدروا يعرفون عمر هاي الاوراق والمخطوطات بس اكو هواي منها ما قبلوا يشوفوها لاحد ومحد يعرف ليش، رغم السلطة الرقابية تگول بس العلماء مسموح الهم يشوفوها وهذا مجرد كذب هواي علماء آثار وأحفوريات تم منعهم من رؤية المخطوطة حسب كلام الباحث محمد المسيّح

هذا جزء بسيط من التبحوش اللي مبحوشة بهيچ سوالف، اللغة العربية لغة موسيقية او لحنية، يعني شتگدر تحچي احچي، وبيها ترهل لفظي وكثرة معاني ما الها فائدة او اسماء الاضداد اللي هي طلع معنى كلمة "قعد" ممكن يگعد وممكن يگوم، او النسخ ممكن كوپي ممكن حذف ممكن تثبيت، وبيها جمود صرفي مو طبيعي يعني كل كلمة اذا بيها كم مصدر لازم نغير كل وزنها، حرفين الـ ض والـ ظ اللي ما اعرف ليش صارن حرفين وهواي كلش هواي سوالف عندي هم وصف كامل للموضوع، فـ اللي يگول اللغة العربية مأخوذة من القرآن يا حبيبي هو كتابك بي أخطاء لغوية ونحوية بگد سليمة واللغة نفسها بيها مشاكل فـ لا تخبصنا رجاءاً

هو شلون انتوا كـ سعوديين متعايشين مع الوضع؟ يعني آني اعرف ان السعودية حالياً أمن وأمان واستقرار وحرية وللو كانت نسبية لكنها افضل من ذي قبل، هل فعلاً انت مراقبين؟ شلون ماخذين حريتكم هنا بالريديت؟

لان هناك بعض الاصدقاء من القطيف يجون كل فترة والثانية من السعودية للنجف لزيارة ضريح الامام علي (شيعة) بالعراق و اسألهم يقولون ان الوضع مو صحيح والكل مراقب واي كومنت او لايك او حتى بالسر اذا تفتح شي بتلفونك تسجن وتعذب واحتمال تختفي من الوجود، فـ اريد اعرف هل هذا الكلام واقعي؟

اتمنى الرد بتجرد وحياد، وتحياتنا الكم ولبلد شيخ الشك واليقين وإمام النص والتأويل وحكيم المنقول والمشكوك المفكر العظيم عبدالله القصيمي

Just updated to OneUI 8.5 and noticed something incredibly stupid. Samsung completely removed the option to hide the battery percentage. It’s just forced on the status bar now.

​Why mess with a basic feature like this? Removing customizability for no reason is just a joke

راح ابدي آني

هاي ورة سقوط بغداد بشهر تقريباً

ولا طير طالع والدنيا ظلمة هندس وماكو لا كهرباء ولا حتى أسم ضوة، بحيث اذا ترفع ايدك ما تگدر تشوفها، آني منهزم من البيت ميدرون بية وواگف بالشارع العام الساعة بـ12 ضبط، الناس كلها خايفة محد يگدر يطلع آني مثل الغبي وحدي بالشارع وشارعنه تقريباً طوله 800 متر

لگيت واحد جاي علية وجاي يمشي بخطوات بطيئة، هو رجال بس حسيته من بعيد لابس كوت وقبعة آني طبعاً خرط عندي السوگ بس ما اعرف ليش بقيت واگف، هو جاي عليه بس على كيفه تحس الجهاز العصبي عنده بطيء، وصل يمي وگف هيچ 10 ثواني يباوع علية وآني مرعوب وهو واگف ما محرك ساكن، فـ سألني "بـ بيش الساعة؟" وصوته چان مال شخص ضخم وملامحه ما مبينة نهائياً، آني طبعاً اريد احچي انبلع لساني فـ چنت لابس ساعة على شكل كرة قدم اللي بيها اضاءة خضرة ليلية من هاي مال اطفال، بقيت صافن عليه رافع راسي اريد أحدد ملامحه لو اشوف شي بيه، الشي الوحيد البارز هو القواطع الثنين الفوگ بسنونه يلمعن وواضحات كلش، المهم سألني مرة ثانية بنبرة أخشن "ساعتك بـ بيش؟" باوعت عليها گلت له بـ12 فـ عبرني وكمل طريقه راح، من راح المفروض ظهره عليه، الكارثة وهذا الشي اللي ما لگيت له تفسير انه سنونه بقن مبينات من ظهره عبالك ما عنده رگبة، بقن يلمعن وجاي اشوفهن، آني شفت السالفة هيچ وهي ركضة للبيت وحطيت راسي بسرعة ردت انام بأسرع وقت وما گعدت الا بالعشرة الصبح

ما اعرف شنو اللي صار يجوز چنت أهلوس او اشتبهت بس الموقف هذا أتذكره مثل أسمي بالضبط وبالساعة هم، اگدر اگول هاي من الشغلات اللي صارت بحياتي اللي لحد هسه ما لگيت الها تفسير بشكل قطعي مجرد انطي إحتمالات، والصورة اللي بالپوست هي صورة تقريبية للموضوع سويتها بالذكاء الاصطناعي قوي الاضاءة مال تلفونك حتى تشوف زين (مع اختلاف ان الدنيا ظلام دامس)، اكو موقف ثاني بعد اقوى من الشغلات اللي هم اعتقد الها سبب بس بعدنا ما نعرفه فـ بعدين احچيه مو هسه

وانتوا؟

بسبب جو الميتا والروك اند رول اللي هنا اريد منكم قنوات مال اغاني على التيلي تنشر اول بأول او او /https://itdmusics.com مواقع مثلاً نفس فكرة https://hiphopa.net/

مو بالضرورة تكون HipHop/Rap بس عالاقل تنشر كلشي

ف اللي عنده لا يقصر