شلون و اني انزل ميمزات على موضوع اليوم ؟ ☝️

لو تلاحضون هذا سلطعون حقيقي مو كاذب لان عنده 8 رجلينات واضحه

معلومة اليوم راح تكون عن السلطعون و ليش يعتبر كائن مثالي؟

×××××××××××××××××××××××××××××××××

معلومات غريبه عن السلطعون

السلطون اذا انگص من طرف يگدر يرجع يكونه من جديد و هالشي يصير عن طريق عمليه اسمها مولتنگ و هيه مثل تذبديل الجلد عند الزواحف بس السلطعون يبدل القرش مالته كامل

و ببداية هاي العمليه يكون السلطعون قشرته طريه كلش و سهل تنشگ و يكون تعبان كلش لان تستهلك منه هالحركه هواي طاقه و هالشي ممكن يسبب موت السلطعون اذا سوه هالعمليه و هوه چبير بالعمر و ما عنده طاقه كافيه

×××××××××××××××××××××××××××××××××

اصول السلطعونات

قبل 400 مليون سنه انفصل السلطعونات عن الروبيان و اقاربه و تطوروا بشكل مختلف السلطعون عنده 8 ارجل و كماشتين و الاستكوزا الي هيه من السلاله الثانيه عدها 6 ارجل و كماشتين

الشي الي لاحضوا العلماء و درسوا على مدار 100 عام چان انو هواي سلطعونات بالبحر اصلا ما جاي من السلطعونات و متطور من غير كائن!!

و اكتشفوا العلماء انو بعد انفصالهم قبل مئات ملايين السنين سلالة الاستكوزا و الروبيانات بدت تطور و شكلها صار نفس السلطعون بس ليش؟

هاي الانواع بطنها متمركزه بذيلها و هذ الشي يعتبر نقطة ضعف لان اذا المفترسي عضوا هذا الجزء ما راح يگدر يدافع عن نفسه

ف ذيله بده ينطوي و يصغر و يدخل بالجزء السفلي من جسمه

و جسمه الطولي يساعده عالحركه للامام بس ما يگدر يمشي لليمين و اليسار مثل السلطعونات و هذا الشي الي يميز السلطعونات

ف اجسامهم بدت تصير مسطحه اكثر و عريضه تساعدهم على الحركه لليمين و اليسار

جسم السلطعون و توزيع الوزن بجسمه يخلي ثابت بقاع البحار و المحيطات و التيارات المائيه ما تأثر على توازنه و ثباته

لهذا السبب السلطعون يعتبر الدبابه المثاليه لقاع البحر

اصلا حته اول كائن انقسموا منه و صاروا سلطعونات و روبيانات قبل 400 مليون سنه شكله و مواصفاته اقرب للروبيان من السلطعون

هاي الضاهره سموها العلماء (Carcinization) يعني التسلطع

(لحد يركز عالاسم ترجمته من يمي لان ما اعرف شنو ترجمته)

×××××××××××××××××××××××××××××××××

اكثر 3 انواع سلطعونات

سلطعون العنكبوت الياباني : سلطعون يعيش باعماق المحيط شكله مهيب جدا بسبب حجمه و طوله بحيث الطول من طرف رجله للطرف الثاني 4 امتار!!!!

السلطعود المُزيت (decorator crab) : من اذكى السلطعونات بسبب طريقة تخفي ، يروح على الطحالب و النعمان و المرجان و اسفنج البحر يگص منهم قطع و يلزگها على جسي و على ضهره حته يتخفى من المفترسين

السلطعون عازم الكمان (fiddler crab) : الذكر عنده مخلب عملاق مقارنه بمخلبه الثاني الصغير ، يستخدم المخلب الچبير حته يدافع بي عن نفسه و يقاتل الذكور و يستخدمه حته يبهر الانثى لاغراض التزاوج، و مخلبه الثاني يستخدمه للاكل لا اكثر

×××××××××××××××××××××××××××××××××

اfun fact : الking crab هوه احد اغلى و اكبر انواع السلطعونات و ينباع باسعار خياليه بالمطاعم الفخمه و اسمه السلطعون الملك

و هوه اصلا مو سلطعون هوه بالحقيقه false crab يعني من سلالة الروبيان و الاستكوزا الي تطورت حته تصير تشبه السلطعون

×××××××××××××××××××××××××××××××××

بس والله هاي چانت معلومة تليوم تريدون ادخل معلومات عن الارض و الفضاء بهالسلسله لو ابقيها كائنات حيه؟

حطوا ابفوت اذا عجبكم البوست و تعلمتوا شي جديد راح احط صور للسلطعونات الي انذكرن بالبوست بالترتيب

عود اكو في بي ان اسمه 1.1.1.1 مشهور والله اسف اسف اسف

اني عرفتها حتگب بس ما عبالي هسه گلت فد بالليل لو الفجر

شهالاسئله شباب cmon

اجيب اعضاء و اسئلهم 10 اسئله لو خيروك من اختياركم و جوابه يكون ويه السبب ، و نقلد هذاك البودكاست ..

موضوع اليوم راح يكون عن العناكب لان هيه من اغرب و اكثر الكائنات المميزه عالارض

اولا العناكب مو حشرات صنفها اسمه العنكبيات و تختلف عن الحشرات من ناحيه اجزاء الجسم و الارجل لان العنكبوت عنده 8 ارجل عكس الحشرات الي عدها 6 و ما عنده قرون استشعار مثل الحشرات

×××××××××××××××××××××××××××××××××

انواع العناكب

من ناحية النوع ف اكو 2

العناكب الحديثه : هاي الاغلبيه العظمى و الي نشوفها دائما بحياتنه انيابها تتحرك بشكل متقاطع مثل الكماشه

العناكب البدائيه : هاي تشمل اكبرانواع العناكب و انيابها تتحرك بشكل عامودي مو متقاطع

اما من ناحية العيش

العناكب الناسجه : تنسج شباك علمود تحمي بيضها و تصيد بي الفرائس

العناكب الصياده/القافزه : عناكب ما تبني شباك حته تصيد الفرائس لا تلاحقها و تصيدها بنفسها

×××××××××××××××××××××××××××××××××

منين اجت اصول العناكب ؟

قبل 400 مليون سنه چانت اكو كائنات مفصليه تسبح بالبحر هيه الي تطورت بعد ملايين السنين و صارت العنكبوت

و اول عنكبوت حقيقي و ينتج شباك اكتشفوله حفريه عاش قبل 300 مليون سنه

×××××××××××××××××××××××××××××××××

شنو اكبر عنكبوت؟

من ناحية الكتله و الوزن عنكبوت اسمه (Goliath Birdeater) و اسمها يعني اكلة الطيور مع العلم انهو نادرا نا تاكل طيور تاكل اكثر شي حشرات كبيره و ضفادع و تعيش بالغابات مال امريكا الجنوبيه وزنها يوصل 175 غرام و حجمها بگد ماعون تقريبا

من ناحية الطول (Giant Huntsman Spider) يعيش بالكهوف كتلته مو چبيره بس رجليناته يوصل طولهن لحد ال30 سانتيم !!!!

×××××××××××××××××××××××××××××××××

اكثر انواع العناكب المميزه

الارمله السوداء : موجوده بهواي اساطير و اساس اسمها انو الانثى من هذا النوع حجمها 3 اضعاف الذكر ، بعد التزاوج الانثى تاكل الذكر لان بعد التزاوج ما تشوفه غير وجبه مليانه بروتين تساعدها بالبيض

لونها اسود لامع و على ضهرها اكو نقشه حمره فايدتها تحذير المفترسين و حجمها بالحقيقه مو چبير تقريبا 1.5 سانتيم بكبر اضفر الابهام تقريبا

سمها جدا قوي و قاتل العلماء يگولون اقوى من سم (rattle snake) الافعى الي عدها خرخاشه بذيلا ب 15 مره !!! لدغتها تسبب الم قوي و تشنج قوي بعضلات الضهر و البطن و تسبب صعوبه بالتنفس و تعتبر قاتله للاطفال و الشياب بس الانسان البالغ الصحي مو خطره علي لان السم الي تفرزه اقل من قطره وحده لان حجمها صغير جدا

عنبوت الجرس الغاطس : العنكبوت الوحيد الي يقضي كل حياته بالمي تقريبا و هوه بالاصل بري مو مائي ، بس شلون يگدر يعيش جوه المي؟

بالبدايه ينزل جوه المي و يبني شبكه بين النباتات

بعدين يطلع للسطح و بما انو جسمه مليان شعيرات يعني يگدر يجمع هوه بيهن و يطبب للمي

يروح جوه الشبكه و يوخر الهوه من شعيراته و يخلي يعلق بالشبكه

يعنيد هالحركه اكثر من مره لحد ما تصير عنده فقاعة هوه چبيره جوه المي يگدر يعيش بيها و يتنفس !!!!

و الفقاعه حرفيا تصير بيته ياكل بيها و يتزاوج بيها و يبيض بيها و فوگاها ما تهلص اوكسجين لان تسحب الاوكسجين الذايب بالمي

×××××××××××××××××××××××××××××××××

بس والله هاي چانت معلومة اليوم و الدعم قل جدا للاسف خطوا ابفوتات حته استمر و اكمل بالمعلومات 🌷🌷

طبعا اني استغليت العنوان و كتبت عن الكائنات الحيه حته انشر عن ناس تاريخيين و نباتات مو بس حيوانات

ف البارحه صار موضوع و ذكرني بحاكم روما يوليوس قيصر ف اليوم راح نتكلم عنه بالتفصيل

×××××××××××××××××××××××××××××××××

منو هوه يوليوس قيصر و شلون وصل للحكم

يوليوس قيصر چان قائد عسكري و سياسي ينتمي الى عائله ارستقراطيه ذكيه گدر يوصل لمنصبه عن طريق التحالفات و الانتصارات العسكريه

سوه تحالف سياسي ثلاثي سري ويه اقوه رجلين بروما القائد العسكري بومبي و كراسوس اغنى رجل بروما

غزى بلاد الغال : و الي هيه فرنسا حاليا غزاها بجيشه بعبقريه عسكريه و دهاء مو طبيعي و هاي الغزوه كسبته ثروات هائله و حب الجنود و ولائهم اله و صار معروف بين ةل الناس بروما

مجلس الشيوخ بروما خافوا من قوة القيصر و شعبيته ف اتفقوا ويه بومبي و الي هوه حليفه و امروا القيصر بانو يتخلى عن جيشه و يرجع لروما كمواطن عادي ، قيصر هنا عرف اذا رجع راح يتحاكم و يستعبدوا ف اخذ قرار تاريخي بسنة 49 قبل الميلاد

اخذ جيشه و عبر النهر عائدا الى روما رغم امر مجلس الشيوخ، و هاي الشغله بقانون قبل چان عباره عن اعلان حرب ف دخل قيصر و جيشه بحرب اهليه ضد بومبي و انتهت بانتصار يوليوس قيصر و صار هوه الحاكم الوحيد و الفعلي لروما

×××××××××××××××××××××××××××××××××

شلون انغدر يولويوس قيصر ؟

الموضوع مچانت بس عداوه شخصيه لا چانت منافسه عالسلطه و المنصب و مجلس الشيوخ كرهوا يوليوس قيصر لاسباب محدده

اعلن يوليوس قيصر عن نفسه دكتاتور مدى الحياة، و روما اصلا دوله جمهوريه تتميز بانوا ما عدها ملك او حاكم يحكمها مدى الحياة ، يوليوس قيصر بالتدريج جمع كل سلطاته و اعلن عن نفسه دكتاتور مدى الحياة ، بوكتها مجلس الشيوخ تورطوا لان حسوا انو الجمهوريه انتهت و قيصر صار مثل الملك الغير متوج

يوليوس قيصر گام يضعف مجلس الشيوخ و گام ياخذ قراراته بنفسه و كبر عددهم بحيث ضافلهم ناس من اقاليم ثانيه حته يضعف العوائل الارستقراطيه بروما

و يوليوس قيصر چان محبوب الشعب كل الشعب چان يحبه لان چان سياسي ذكي صلح النضام المالي و وزع اراضي للناس و سوه التقويم اليوليوسي و الي هوه اساس لنضام التقويم الميلادي ، هذا الشي خلا يكون محبوب من القبل الشعب و خله مجلس الشيوخ يخافون منه لان ما يگدرون يوصلون لشعبيته

×××××××××××××××××××××××××××××××××

يوم الاغتيال و التخطيط اله

60 عضو من مجلس الشيوخ بقياده كاسيوس و بروتوس

يوم 15 مارس چان اكو اجتماع للشيوخ بيومها زوجة القيصر حلمت بكابوس و گالت لقيصر انو راح يصير شي مو زين لا تطلع و المنجمين گالوله نفس الشي بس اصر انو يطلع بدون حراسه شخصيه

دخل مجلس الشيوخ و التفوا حوله بحجة طلب العفو عن شخص قريب منهم

فجأه واحد منهم لزم رداء قيصر و سحبه و هاي چانت اشاره لبدء الاغتيال!!

طلعوا خناجرهم و بدو يطعنون بي و حاول يدافع عن نفسه بس چانوا هواي ، بالاخير شاف بروتوس شايل خنجر و خايف ، ف يلويوس قيصر گال جملته الشهيره " حتى انت يا بروتوس؟" و طعنه بروتوس بحجة الولاء لروما و انقاذ جمهوريتها

غطى قيصر وجهة كعلامه على الاستسلام و سقط على الارض مطعونا ب 23 طعنه بجسمه بس التقارير الطبيه وضحت انو الطعنه الوحيده القاتله هيه چانت طعنه بالصدر من قبل بروتوس

×××××××××××××××××××××××××××××××××

ليش طعنة بروتوس چانت الاكثر الما من الناحيه النفسيه؟

بروتوس چان مقرب جدا لقيصر و چان يعتبره قيصر صديقه و ابنه الروحي و عفا عنه بالحرب الاهليه و قربه من المناصب العليا من حبه اله ، بس بروتوس چان يعتبر الغدر تحرير لروما و ولاء الها

×××××××××××××××××××××××××××××××××

شنو الي صار بعد الغدر؟

القتله طلعوا لشوارع روما يصيحون و يگولون انو همه حرروا روما من حكم القيصر

المفاجأه : الناس و الجيش عصبوا و ثاروا عليهم و اعتبروهم مجرمين خائنين و قتلوا بطل روما ، و صارت حرب اهليه ضد القتله و خسروا القتله بالحرب و القتله و من ضمنهم بروتوس انتحروا بعد الخساره

ولادة الامبراطوريه : ابن القيصر اوكتافيوس و الي صار اسمه بعدين اغسطس استغل الحرب الاهليه القائمه و الاحداث و اخذ السلطه اله و اسس الامبراطوريه الرومانيه رسمياً

×××××××××××××××××××××××××××××××××

الصوره الثانيه هي صوره لتمثال حقيقي منحوت بالزمن الي چان يوليوس قيصر عايش بي يعني حرفيا هذا شكله لگوا بسنه 1825 و هسه موجود بمتحف الاثار بمدينة تورينو بايطاليا

×××××××××××××××××××××××××××××××××

هاي چانت معلومة اليوم و راح استمر لحد ما تجي الوطني 12 ساعه متواصله

حطوا ابفوت اذا عجبتكم القصه و ما سامعيها قبل لان البوست الي فات جاب ابفوتات اقل بهواي من الايام الي قبله ف شدوا حيلكم اليوم 🙏🌷🌷🌷

و هذول يصورون سكتشات عود يضحكون خربنه منو الطحش الي انطاهم تلفون خربنههههههه

بويه مارينيت ذلتني بالدعسوقه مذله فاليوم راح يكون عن الدعسوقه حته افتك 🙏😭😭😭

×××××××××××××××××××××××××××××××××

مبدئيا الدعسوقه تعتبر صديقه للمزارعين لفايدتها القويه بالزراعه و بالتوازن البيئي بشكل عام ( مو بطله خارقه تقاتل الاشرار و مدري شنو )

تركيب جسمها

الدعسوقه تنتمي لعائلة الخنافس جسمها يكون بيضوي محدب من فوگ و مسطح من جوه و حجمها بين ال 0.8 ملم - 18 ملم (تقريبا سانتيمين)

تجي بهواي الوان مو بس حمره اكو صفره و برتقاليه و غيرها من الالوان و النقوشات

اللون الاحمر الي بضهرها هذا مو جناحها هذا مجرد واقي صلب للجناح لان جناحها رقيق و شفاف و هش جدا يحتاج محافظه حته ما ينكسر

×××××××××××××××××××××××××××××××××

مميزات الدعسوقه

الوانها بيها ميزه حلوه و هيه مو بس شكل بعالم الحيوان اي كائن الوانه فاقعه كلش يعتبر تهديد للحيوامات و تحذير انو طعمه مو طيب و ممكن يكون سام و هذا الشي يحميها من المفترسين

عدها شي اسمه النزيف العكسي من تحس بخطر تفرز سائل اصفر سام ريحته مطيبه و طعمه مر جدا من مفاصل ارجلها

و اذا هذني التحذيرين ما بعدن الخطر راح تسوي روحها ميته و ما تتحرك و هذا الشي حيخلي الخطر يبتعد

السبب؟ الطيور المفترسه و الزواحف ما تصطاد شي واگف لان ما يحفز غريزة الافتراس عند الكائن + الكائنات اغلبها عدها غريزه تخليها تخاف تاكل اشياء ميته لان ممكن تكون متعفنه و تسممهم

لهذا السبب الي يربون زواحف ينطوهم حشرات عايشه لان اذا جانت ميته ما راح يكونون مهتمين ياكلوها

×××××××××××××××××××××××××××××××××

فائدتها للبشر

المزارعين يستفادون منها بشكل مو طبيعي لان اكو حشرات صغيره كلللش تتغذها على عصارة النباتات و تنقللها الامراض و هاي الحسرات تعتبر الغذاء الرئيسي للدعسوقه

الدعسوقه الوحده تاكل من 50 الى 100 من هاي الحشره كل يوم !!!

×××××××××××××××××××××××××××××××××

دورة حياتها

تبدي من دوده صغيره و تاكل الما تتحول شرنقه بعدها تقضي ايام بالشرنقه بعدين تتحول دعسوقه كامله

الدعسوقه عدها حالة سبات شتوي بالشتاء يجتمعون الاف الدعاسيق جوه لحاء الشجر او بين الصخور او بالاماكن المغلقه حته يقللون من استحلاك السوائل و تجمعهم يدفيهم ف هم يقلل من استهلاك الطاقه

×××××××××××××××××××××××××××××××××

هاي چانت معلومة اليوم السابع و راح استمر لحد ما تجي الوطنيه 12 ساعه متواصله

شكرا على دعمكم و تعليقاتكم الحلوه على هالسلسله اكتبولي عن يا مائن تريدون تسمعون معلومات و ذكروني اذا نسيت شي عن الدعسوقه

هاكم ورود 🌷🌷🌷🌷🌷🌷🌷🌷🌷🌷

نسيت كلشي بدين استكشف البيت من جديد رجعت تعلمت مشي من الصفر نسيت شلون استخدم ايدي

انتوا منو و اني بشنو جاي اكتب شديصير ساعدوني

يمكن هذا اكثر شي ممتع مو الكتروني اشتري بحياتي كلها ولو بعدني مبتدئ بس شوفوا الحركه شگد بيها اورا

+ معليكم بالچرچف ابو الورود

+ هوه هذا المفروض سچينه بس اني جايب ابو المشط حته اتعلم 🙏😭😭😭😭

اليوم المعلومه حتكون عن اذكى الكائنات بالبحر و الي هوه الاخطبوط و راح نقارنه بالحبار لان اكو ناس عبالهم نفس الشي

اصول الاخطبوط و الحبار

الاخطبوط و الحبار ثنينهم رخويات و ثنينهم من نفس العائله و ثنينهم يرجع اصلها لنفس الصنف قبل 330 مليون سنه

هاي المجموعه چانت تشبه الاخطبوط و الحبار لان عدها هواي اذرع بس الفرق چان عدها صدفه

و بمرور الزمن اختفت الصدفه من الحبار و الاخطبوط حته يسهل عليهم الحركه

و العجيب بالموضوع انو احد انواع هذا الصنف من قبل 330 مليون سنه ما تغير لحد الان !!! و بعده يسبح باعماق المحيط هوه و صدفته

(ما راح اتعمق بي لان بي هواي محتوى راح اشرح عنه احتمال باليوم الثامن)

×××××××××××××××××××××××××××××××××

الفروقات بين الحبار

الاذرع

الاخطبوط عنده 8 ايادي مليانه شفاطات صغيره تشفط الشي الي تلزمه حته تثبته

الحبار عنده 8 ايادي و خطافين يعني مجموع 10 اطراف و مليانات نتوئات حاده حته يلزم الفريسه يعني ما عنده شفاطات

الجسم

الاخطلوت جسمه خالي من اي جزء صلب الجزء الصلب الوحيد الي عنده هوه منقاره و حته يگدر يدخل بالامائن الضيقه ، حرفيا اي فتحه اكبر من منقاره بشويه يگدر يدخل منها

الحبار من الناحيه اللخ جسمه اصلب لان عنده عضام شفافه موجوده بالجزء الاكبر من جسمه

المعيشه

الاخطبوط يعيش اغلب وقته بقاع البحر و يعيش منفرد وحده مو ويه مجموعه و يختل بين الصخور

الحبار يعيش باسراب و يسبح بالمحيط مو بالارض

الحجم

احجامهم مختلفه جدا ممكن تلگه حبار اكبر من اخطبوط ممكن تلگه اخطبوط اكبر من الحبار بس اكبر احجام مكتشفه الهم هنه :

الاخطبوط : الاسم العلمي Enteroctopus dofleini

هذا نوع من الاخطبوطات طول البالغ منه يوصل لحد 9 متر من راسه لطرف رجله وزنه يوصل 270 كيلو يعيش بشمال المحيط الهادئ

ذكي كلش يگدر يغير لونه حسب الشي الي واگف علي و فوگاها يغير الملمس مال جلده حته يصير نفس ملمس الاشياء المجاوره !!!

الحبار : (giant squid)

كتلته مو چبيره بس طوله يوصل 13 متر بسبب ايادي الطويله

ال (colossal squid)

طوله يوصل 10 متر بس كتلته كلش چبيره وزنه يوصل 500 كيلو

×××××××××××××××××××××××××××××××××

الاخطبوط بي هواي انواع مميزه و اكثر 3 مميزات هنه :

Blue ring octopus

من اكثر الكائنات الخطره باعماق البحر يگدر يغير لونه و جسمه علي حلقات فسفوريه لونها ازرق السم مالته قاتل جدا و حجمه يعبر صغير مقارنه بالباقين

Mimic octopus

اخطبوط مميز جدا عدى مقدرته على تغيير لونه و ملمس جلده يگدر يقلد اكثر من 15 كائن بالبحر

يغير شكل جسمه حته من بعيد يبين يشبه الكائن الي يقلده و يتحرك نفس تحركاته و هذا اكثر كائن غريب و ذكي و مميز بالبحر

Dumbo octopus

اخطبوط صغير و خيوت يعيش بعمق 4000 الى 7000 متر اسمه Dumbo على اسم الفيل الكارتوني الشهير دامبو لان عنده زعانف براسه تشبه اذان الفيل و يستخدمها للسباحه

×××××××××××××××××××××××××××××××××××××

معلومة اليوم مو كلش قويه لان انشغلت اليوم و اريد انزل البوست من وكت (ساعدت امي بالكبه) ف طولت

عموما شكرا عالتفاعل بالبوست الي فات وصلتوا 30 ابفوت خلنحاول نكسر هالرقم اليوم و شكرا لدعمكم مره ثانيه

اكتبولي عن يا كائن تريدون تسمعون معلومات بشرط يكون مميز

(اول صوره بيها كل انواع الاخطبوط

الثانيه بيها اخطبوط الblue ring

الثالثه اخطبوط Dumbo

الرابعه اخطبوط الmimic هوه و تقليده للكائنات (الي بالصوره الرابعه عاليمين الكائنات الحيه و عاليسار تقليد الاخطبوط الها ) )

محتاج مساعده لان بطني گامت توجعني

​

اليوم الموضوع عن الحرباء لان هيه اكثر نوع سحالي مميز من ناحية الشكل و القدرات الي عندها

الحرباء موجوده عالارض قبلنها بهواي اقدم حفريه لگوها للحرباء قبل 26 مليون سنه و يگلك انو اسلافها بدوا بالتطور قبل 65 مليون سنه ،

الحرباء معروف عنها تتحول للون الشي الي واگفه علي علمود تتخفه بس هاي اكبر غلط متداول بين الناس

هيه عدها الوان محدده لكل حاله تحس بيها مثلا خطر او غضب او للتزاوج او من تكون هادئه كل وحده من ذني الها لون

بشرتها مليانه خلايه بلوريه مرتصه وحده فوگ اللخ بالجلد

من تحس بالراحه هذني يرتصن و يعكسن اللون الازرق بطبيعتهن و من يندمج الازرق ويه اللون الاصفر مال جلدها راح يطلع لون اخضر الي هوه لون الحرباء المعروف

من تعصب و تتوتر هاي البلورات راح تتبياعد ف يصير لونها برتقالي او احمر

من تخاف لونها يصير غامق

الكائن الوحيد الي يگدر يعكس الوان الاشياء الي واگف عليها هوه صنف من الاخطبوطات و هوه فنان كلش بالتخفي

×××××××××××××××××××××××××××××××××

عيون الحرباء : مستقله يعني تكدر تتحكم بكل عين وحدها تگدر تباوع بعين گدام و بعين وره و زاوية رؤيتها 360 درجه

اصابعها : صايره مثل الكماشه عدها بايدها اصبعين بش واحد معاكس للثاني

ذيل الحرباء : يعتبر ايدها الخامسه لان بي عضلات قابضه يگدر يستخدمها حته يعلگ روحه عالشجره او يثبت نفسه

لسانها : اكثر شي مميز بيها بحيث طوله يكون اطول منها بمرتين و تگدر تطلقه عالفريسه بسرعه خياليه بحيث عين الانسان بالگوه تلحگ تلمحه

يگدر يسوي هيج بسبب عظمه محوطه بعضله تحت اللسان و هاي العضله تتقلص و تخزن طاقه و من تريد تصيد الفريسه ترخي العضله و تنطلقه العظمه و ترمي اللسان بسرعه خارج حلگها عالفريسه

نهاية لسانها بي ماده لزجه و شفاطه حته تجلب بالشي الي يطخها و ما تهده

×××××××××××××××××××××××××××××××××

Fun fact : الحرباء عالشجره تمشي ببطئ شديد و تقلد حركة اوراق الشجر ويه الهوه حته المفترسين ما يميزوها بالشجره

×××××××××××××××××××××××××××××××××

هاي معلوة اليوم الخامس و راح استمر لحد ما تجي الوطني 12 ساعه متواصله

البوست الي فات جاب 20 ابفوت و لازم نكسر هالرقم اليوم ولو المعلومه مال يوم مو بقوة مال بارحه

الحرباء جانت طلب من احد الاعضاء اكتبولي عن يا كائن احجي المره الجايه و شرط يكون بي شي مميز و نادر

اليوم حيكون الموضوع عن اسماك القرش لا هيه من اكثر الكائنات المميزه الي عاشت بالبحار

و هيه هلگد مميزه لان هيه من اقدم الكائنات الي عاشت بالبحار حيث انو اول اسلاف الها عاشوا قبل 450 مليون سنه!!!!!!

القروش واجهت 4 انقراضات مختلفه و نجت منهن كلهن و من هذن الانقراضات چان انقراض (الموت العظيم) حيث قضى على 96% من الحياة البحريه و 70% من الحياة البريه

××××××××××××××××××××××××××××

اكثر 3 انواع قروش مميزه

القرش الابيض العظيم : من اشهر و اكبر المفترسين الي عاشين بالبحر ، عنده حواس مرعبه منها حاسة الشم القويه جدا عنده يگدر يشم ريحة الدم من بعيد

و عنده مستشعرات بمقدمة راسيه يشعر بيهن بالموجات الكهرومغناطيسيه للكائنات الحيه

غذائع يتمد عالثديات البحريه مثل ةلاب البحر و الفقم

_____________

قرش المطرقة : من اكثر الكائنات البحريه المميزه بسبب شكل راسه الي يشبه المطرقه

عيونه صايره باطراف راسه بحيث تسمحله يشوف 360 درجه حوله يعني يشوفك حته لو ورا

و شكل راسه يسمحله بانوا يكون عنده مستشعرات اكثر على مساحه اوسع تسمعله يستشعر الموجات الكهرومغناطيسيه للكائنات اكو من القرش الابيض العظيم

_____________

قرش الحوت : اكبر نوع سمك عايش بالبحر طوله يوصل 15 متر

(هسه حتگولون ليش الحوت مو اكبر سمكه؟ راح اگلك لا لان گلنه قبل انو الحوت مو سمك الحوت ثديات ما عنده الشروط الي تخلي سمچه)

بس العجيب بالموضوع انو هذا القرش ما يشكل خطر على البشر لان ما ياكل كائنات چبيره،

يعتبر من نوع القرش الفلتري يعني يفتح حلگه و يسبح بالبحر و يخلي العوالق تطب بحلگه و ياكلهم ، العوالق كائنات كلش صغيره بحيث ما تبين تفاصيلها بالعين المجرده بس البحر مليان ملي منها لهذا السبب القرش الحوت يعتبرها غذائه الوحيد

شكله مميز لان لونه يجي رمادي او ازرق غامق و منقط باللون الابيض

×××××××××××××××××

اكبر قرش عاش عالارض هوه قرش الميغالودون و اسمه يعني السن الكبير

انقرض قبل 3 مليون سنه تقريبا و يعتبر اكبر قرش سبح بالبحر بتاريخ الارض طوله چان 18 متر و چان شرس جدا بحيث غذائه الرأيسي چان الحيتان !!!

سبب انقراضه وره ما صار العصر الجليدي تغيرت اقطاب البحار و غذائه الرأيسي الي هوه الحيتان گاموا يهاجرون للاماكن البارده و بعد ما عنده اكل ولا مكان يخلي بي بيوضه

+ اي القروش جزء منها يبيض بالمي و يفقس البيض خارج الجسم

و بعضها يبقه البيض بداخلها و من يفقس تطلع القروش الصغيره

و بعضها تولد ولاده طبيعيه حالها حال البشر

×××××××××××××××××××××××××××××××

الصوره الثانيه فك الميغالودون مقارنه بالقرش الابيض العظيم

×××××××××××××××××××××××××××××××

هاي چانت معلومة اليوم الرابع و راح استمر لحد ما تجي الوطني 12 ساعه متواصله

اقوه عدد ابفوت وصلته هاي السلسله 15 ابفوت فخلونه نكسر هالرقم اليوم