ظاهرة التسوّل
صراحة انا انسانة عاطفية احس ينكسر خاطري و ينقص علي بسهولة ههههه ماعرف اتصرف في هالمواقف بصرامة واقولهم لا او اسحب عليهم. و صراحة هم فيهم جرأة غير طبيعية. كيف الواحد يتصرف في هالمواقف؟؟
بس ليش جي، احس الدولة مش مقصرة في مدن انسانية و مبادرات و جهات حكومية نفس الهلال الاحمر تدعم المحتاجين و توفر لهم احتياجاتهم وما اتوقع يرفضون حد.
بعض الامثلة:
مرة كنت في كارفور ويا ريلي و خلاص خلصنا نتبضع يت وحدة تمت تقول زوجي مسجون و عندي عيال وماقدر اشتريلهم اغراض البيت و و و و
ريلي قال لها دوري خذي اغراض ب٢٠٠ درهم و بنحاسبلج. و طلع الحساب اكثر عن ميتين بشوي قلنا يلا ما عليه خصوصا انه الاغراض كانت اساسيات صراحة و غمضتني.
مرة ثانية كنا في جمعية تعاونية و كنا عند الحساب خلاص، يت وحدة من نفس الجنسية، تمت تقول عيالي مرضى و مابا اطلب منكم شي و و و و نفس الفلم، ريلي قالها نفس الكلام ٢٠٠ و بنحاسبلج. تخيلوا خمت الاخضر واليابس والحساب طلع ب٧٠٠! وتمت تقول لو ما عندكم برجع الاغراض قدام الناس تحرجنا فاضطرينا ندفع. وفوق هذا تمت تقول تبا تروح الصيدلية تبا ادوية مادري شو عاد وقتها سوينا اعمارنا ما نسمع و روحنا.
مرة تمت وحدة تمنع اختي انها تطلع من باركن، اختي شبهت عليها وحدة حرمة من المسجد و فتحت دريشة السيارة وهذيك دخلت نص جسمها في السيارة. عقب قالتلها تبا فلوس تاخذ فيها الاغراض، اختي قالت ما عندها كاش، تمت تدور في سيارتها حصلت عشر و عطتها، راحت تعصب تقول شو هذا شو بييب العشر، استسمحت منها اختي و قالتلها ما عندها كاش، تخيلوو قالت اونه اوك ترييني بتبضع بعدين انزلي ادفعيلي بالبطاقة 😭 اختي عقب سحبت عليها وروحت.
هل صارلكم قصص مشابهة؟ كيف ب/تتصرفون في هالمواقف؟ 🥺🌞
وطبعا لا ننسى نحمد ربنا على النعم الي نحن فيها كل يوم ، الله اعلم بحالهم واوضاعهم صراحة ،،
اللهم إني أعوذ بك من زوال نعمتك، وتحول عافيتك، وفجاءة نقمتك، وجميع سخطك.