u/Sobia_enjoyer

انا حاسس اني متضايق فشخ من الوضع الاقتصادي. مصر بقت صعبة اوي بصراحة. بابا باحث في مجال مهم قدم كثير للبلد و مع ذلك مرتبه قليل جداً و مش مكفي حاجة و مضطر يشتغل حاجات تانية جنبه. ماما بتشتغل و في مرة لقيتها بتقول انها بتفكر تشوف شغل اضافي علشان المصاريف مش كفاية بس الحمد لله من وقتها انا و اخويا الكبير اشتغلنا و بقت مجرد بتشتغل من البيت الحمد لله و مش بتحتاج تنزل. بابا رغم كل الي بيعمله الفلوس مش بتكفي المصاريف. انا بحاول قدر الإمكان أشيل مصاريفي علشان متقلش عليه لكن برضه مش كفاية. والدي 56 سنة و بيشتغل شغلانتين ثابتين و جنبهم بيدرس و صعبان عليا أنه بيعمل كل ده في السن ده بدل ما يرتاح. الوضع ساء لدرجة أنه في السن ده عايز يسافر اي مكان حتي لو مش هنبقي معاه لكن مفيش حل تاني قدامه. و المشكلة أن صحابه كثير في سنه او اكبر برضه بيفكروا يسافروا لسوء الوضع المادي. ليه كده يا مصر؟ انا بحبك و الله و كان نفسي اقدملك كثير و حياتي كلها خططتها علي اني احاول علشانك و ده ردك؟

انا عايش عمري كله بحب اساعد غيري. صحابي اخواتي قرايبي اي حد بيحتاج مساعدتي ببقي دائماً جنبه لكن مش ده الواقع ليا. تقريباً عمري ما حسيت ان حد جنبي و انا محتاج مساعدة من حد. مش بعرف احكي لحد من صحابي بحس الموضوع هيبقي تقيل عليهم و اخواتي و بابا و ماما بحس انهم مجرد بيجاروني في الكلام علشان اسكت. مكانش عندي مشكلة اعمل كل حاجة لوحدي لكن ابسط مثال اخر فترة كان فيه ايام تعبت فيها و اكتشفت أن حتي اخواتي مش بيحسوا ولا بيقدروا و بضطر اعمل كل حاجة محتاجها بنفسي رغم أن لما حد فيهم بيكون تعبان بشيله. فيه ايام كنت بقضيها نوم من التعب و بصحي مضطر اعمل اكلي بنفسي أو اجيب حاجات بنفسي و النهاردة مثلا اخواتي برة البيت و في وسط اليوم تعبت و حاسس ان بطني وجعاني و طلبت من ماما تعملي خضار سوتيه فقالتلي أنزل اجيب الخضار بنفسي علشان مفيش حد يجيب. موقف بسيط و عارف انها صدفة أنهم برة بس فكرة اني مش لاقي حد يقف جنبي في تعبي بتحسسني ان كل الي بعمله بيروح هباء و وقت ما محتاج مساعدة مش لاقي حد في ظهري فعلا.

بفكر اسافر لوحدي و حابب اطلع بشكل مختلف مش مع شركات علشان الزحمة أو حتي لو طلعت مع شركة اطلع الرحلات بمواعيد مختلفة عنهم علشان اتجنب الزحمة. حد عنده اقتراحات؟ كامبات؟ طريقة سفر؟ اماكن اروحها غير الاماكن التقليدية علشان روحتها قبل كده؟

انا من صغري الحمد لله كنت بحاول أتجنب الحاجات الحرام سواء ارتباط، ممنوعات، سجائر، أذي لغيري أو حتي معاكسة بنات. في مراهقتي كثير من صحابي راحوا في سكك مش كويسة و كذا حد جرب كذا حاجة من دي و منهم الي دخل في علاقات كثير اوي. الفكرة ان في الاخر كله بيتوب و بنتساوي تاني بس حاسس ان ده مش عدل. يعني أنا كنت محافظ علي نفسي كل ده و في الأخر غيري الي استمتع بشبابه بشتي الطرق و جرب كل حاجة ممتعة حتي لو حرام لو تاب هيبقي زيي؟ بالعكس فيه منهم مثلا الي عمل فلوس و استفاد من الموضوع و الي في الاخر عرف بنت كويسة و اتجوز و مرتاح و انا حاسس اني معملتش حاجة من دي و كان ممكن اعمل زيهم و اتوب في الاخر. مش ندمان علشان عارف ان كل ده حرام لكن برضه من جوايا حاسس اني مستمتعتش بمراهقتي للدرجة الكافية زي الباقي. غيري ملأ فراغه سواء العاطفي أو النفسي أو من جوانب مادية وانا قاعد بتفرج عليهم و خلاص. الموضوع بصراحة مؤلم و حاسس ان نفسي بتضعف و عايز اعمل زيهم بس خايف برضه اروح في السكك دي معرفش ارجع. عايز اجابة مرضية هل كان المفروض اعمل زيهم ولا فعلاً الي عملته صح و هستفيد بيه؟

I'm 160 cm (don't know what that is in freedom units) and from my experience I have no problem saying my actual height and that I'm short. However, it's always the guys in the 170s who lie about their heights and claim to be 180s or higher. And most heightism comes from them. I have lots of friends taller than 180 and they care about my feelings regarding the height more than shorter ones who are barely taller.

"معجب ببنت...." روح كلمها متصدعش ميتينا.

"ليه المجتمع...." مش هتغير الدنيا ببوست علي ريديت حضرتك مش السيسي.

"البنات بقت..." حضرتك شوفتهم كلهم؟

"الولاد كلهم...." حضرتك برضه شوفتيهم كلهم؟

"انا عندي مشكلة مع مراتي....." يا عم نص الي هنا عيال صغيرة فيرجنز محدش هيفيدك شوف حد كبير.

"احنا لازم نشيل ...." يسطا انت بتخاف تقول لابوك انك نازل هتودينا في داهية.

​

جماعة الجروب مش للاسئلة دي و ريديت عموماً مش مكان تاخد فيه قرارات حياتك بلاش عبط.

Not directly like post-nut clarity, but generally did you start seeing life different afterwards?

مش جاي طالب نصيحة بس لو عندك شكراً ليك. مجرد جي افضي علشان مليش صحاب احكيلهم.

انا حالياً عندي 21 سنة و قدامي سنة و نص و اتخرج بإذن الله من هندسة. زهقان من كل حاجة. من الروتين. من المذاكرة. من الضغط. من الفراغ العاطفي الي قارفني و مخليني طول الوقت افكر في بنت معرفش عنها حاجة غير اني بشوفها كل فين و برضه مخي بيقنعني اني معجب بيها و انا عارف أنه مجرد فراغ عاطفي و مش عارف اتغلب عليه. زهقان من شهوتي الي ملهاش اي مخرج و ماشي مش بعمل الي في بالكم الحمد لله لكن برضه الوضع كده مش طبيعي مفيش انسان طبيعي بيقعد كل ده منغير حتي ما يتحضن مش هقولك أكثر من كده حتي. قرفان من شعور الخوف من المستقبل و لغبطة القرارات و الخوف اني اخد قرار غلط. قرفان من وضع البلد سواء الاقتصادي أو الاجتماعي و خايف ملاقيش شغل عدل او معرفش اسافر و أو اتجوز واحدة متطلعش مناسبة ليا كشخصية أو تطلع بعد ما نتجوز علطول تطلب الطلاق و ابدأ من الصفر تاني. خايف أطلع بعد كل ده مش حابب تخصصي. و في نفس الوقت خايف لا قدر الله اخسر كل الي انا فيه حالياً من نعم. ايوة انا مريض قلق و يمكن اكون مأفور بس وضع الحياة حواليا مش مساعد.

مش بعرف اعيش زي باقي الي في سني و تقريباً مش نشيط علي السوشيال ميديا و حياتي أقرب لعادل أمام في مسرحية شاهد مشافش حاجة حاسس ان الدنيا بتلف حواليا و مش عارف ادخل. زهقان من فكرة اني برضه مضطر أخطط لكل حاجة و في نفس الوقت مش فاهم انا عايز ايه فعلاً. ولا عارف لحد دلوقتي عايز اشتغل ايه ولا البنت الي اتجوزها يكون ايه صفاتها ولا عايز اعيش بعمل ايه باقي حياتي ولا اروح فين. و كأن فيه اختيارات اصلا. قلقان من فكرة أن مفيش قرارات صح و كل حاجة بنتيجة مختلفة و متعرفش فعلاً ممكن توصل لأيه. الموضوع نوعا ما ممتع بس مخيف كشخص بيحب المجازفات الي ممكن تقتله.

لو وصلت لحد هنا شكراً انك ضيعت من وقتك علشان تقرأ الكلام ده. يمكن لا انا ولا انت نلاقي حلول بس علي الاقل قولت الي جوايا.