u/TheDarkMaster2021

أنا يا جماعة الخير زي ما حكيت قبل زلمة تبع هندسة والمهندس ما هو خبير في الرياضيات ولا خبير في الفيزياء، هو بوخذ من هان ومن هان وبطبق على ارض الواقع ومش دايماً بكون بفهم هاي المواضيع بنفس العمق تبع اهل الاختصاص. والصراحة المهندس إذا لقى شغلة مفيدة ممكن تطبيقها مش راح يستنى الرياضياتي والفيزيائي إنهم يتأكدوا من صحتها بنسبة 100%، وكمثال على ذلك معدلات Navier-stokes اللي الكل سمع عنها آخر فترة لانه صار عليها ضجة بسبب OpenAi

بالنسبة للرياضياتي هذي المعادلة كابوس بس بالنسبة للمهندس الطيارة بتطير والمياه ماشية في الأنابيب والأمور كلها في اللوز، وخلي تبع الرياضيات يضل يثبت فيها لعشر سنين قدام.

بس بما اني إنسان فضولي وهلا عندي عطلة أسبوعين فا بدكو تتحملوا اني بحشر حالي في مواضيع المفروض ما الي دخل فيها….ندخل بالموضوع:

هلا القسمة على صفر المفروض بالنسبة الي تكون rule في الحسابات وخلصنا… بس لما تصفن فيها صح، الموضوع بجلط!

المهندس لما يحسب السرعة اللحظية لسيارة يعني في لحظة معينة بالزبط هو بقسم التغير في المسافة على التغير في الزمن. بس في لحظة زمنية مدتها صفر، انتا فعلياً بتقسم التغير في المسافة على "صفر زمن" يعني التطبيق العملي للفيزياء والهندسة قاطبة قائم على انك بتقسم على شي بيقترب من الصفر. طب ليش جماعة pure mathematics بتجيهم سكتة قلبية إذا شافوا x/0؟ لانو ببساطة لو سمحوا بالقسمة على صفر الرياضيات كلها بتتفركش وبيصير عادي يطلع معك في معادلة انه 1 يساوي 100 ويساوي ♾️

عشان هيك جماعة الرياضيات اخترعوا علم التفاضل ول limits …هم ما قسموا على الصفر، هم قربوا منه لدرجة متناهية في الصغر بس بدون ما يلمسوه فعلياً. الكلام هاد رياضياً شغال مية المية بس مع ذلك بحس حالي مش فاهم الصورة الكاملة…..هل السرعة في لحظة معينة هي إشي موجود بالفيزياء فعلاً؟ ولا الحركة في الواقع مستمرة واحنا بس دخلنا سالفة ال limits في الموضوع منشان تبعين الرياضيات يمشولنا إياها؟

أنا فاهم إن الفيزياء شغالة بال approximation ، بس برضو السؤال بضل اشمعنا الصفر بالذات هو الخط الأحمر اللي لو قربنا منه الدنيا كلها بتتخربط؟ بدي جواب من اصحاب الاختصاص قبل ما راسي ينفجر للمرة الثانية

أنا دارس هندسة و pi بالنسبة الي 3.14 وشوية فراطة وخلصنا. المهندسين معروف أنهم بعملوا شغلات تعتبر بالنسبة لجماعة الرياضيات غلط (strictly speaking)، وبتذكر أيام الجامعة كانوا الدكاترة يضلوا ينكتوا عالموضوع ويقولوا المهندسين اغتصبوا الرياضيات….دكتور ال thermodynamics كان يشطب ال dx من طرفين المعادلة ويقول لو يشوفني واحد mathematician رح تصيبه جلطة لانه هاي الحركة مستحيل يعملها قبل ما يثبت ال function انه static partially differential (صراحة ترجمة حرفية من الألماني ما بعرف إذا هيك بتنقال بالزبط بالإنجليزي). دكاترتنا كانوا يقولوا احنا المهندسين بهمنا التطبيق على ارض الواقع واتركوا هاي السوالف لاصحابها. مع ذلك الفضول المعرفي بخليني احيانا نفسي افهم ال mathematical concepts بطريقة أعمق. أنا pi محيريتني من زمان والمصيبة انها من ابسط الأمور اللي محيريتني. لا يجي حدا يقلي لانو لو قسمنا 22 على 7 رح نظل نقسم لمالانهاية ورح يضل في باقي. هذا مش جواب على سؤالي لانه pi و 22/7 مش متساويات. 22/7 هي مجرد تقريب لقيمة pi على صورة كسر وهي عدد rational بعكس pi. اقرب تفسير للموضوع سمعته انو ما بدك تفكر ب pi على انها عدد على خط الأعداد. فكر فيها على انها مساحة دائرة. لو بدك تحسب هاي المساحة بالطريقة التقليدية بدك ترسم أنصاف أقطار وتعمل منها مثلثات وتجمع مساحة هاي المثلثات، وهذا الحكي رح يستمر للمالانهاية لانه ما رح تصل لمرحلة يكون عندك عدد ثابت من المثلثات وتكون غطيت مساحة الدائرة بنسبة 100%…. الكلام هاد منطقي وعالعين والرأس وبقرب الفكرة اكثر بس مع ذلك مش حاسس حالي فاهم 100% والتفسير نفسه بطرح تساؤلات جديدة بمخي….. احنا بنقدر باستخدام ال calculus نحسب مساحة منحنيات معقدة ب 100% accuracy وبطلع معنا finite number …. مش الفكرة من ال integral انك بتجمع عدد لا متناهي من الجزيئات؟ طب اشمعنا الدائرة مش زابط معها الموضوع؟ أنا فاهم انه الدائرة بتنوصف بل periodic functions بس برضو السؤال بضل اشمعنا؟ لا حدا يجيبلي جواب من الذكاء الاصطناعي لانه سألته وبرضوا مش فاهم. بدي عبقري رياضيات يفهمني اياها بالبلدي لانه راسي رح ينفجر 🤯

حقه في أوروبا 1400€ يعني في الأردن يمكن يوصل 2000 دينار. هاظ الصغير ارخص واحد. أنا بقول نتزوج أوفرلنا

يا جماعة اقسم بالله ما بزل عليكو بحرف ، أنا بشتغل بشركة وفي زميل الي في الشغل من الجماعة هذولاك. عاد هو من قسم ثاني بس آخر ثلاث أسابيع أطريت اشتغل بالقسم تبعهم وتعاملت معاه كثير. الأسبوع هاظ قرر انه يترك الشغل وامبارح كان آخر يوم اله 😂😂😂😂😂

بس حبيت اقلكو.

مالكو علي يا ناس الحلال؟ وخصوصاً الضفاوية مالكو؟ بدكو اياني اطلع من الصب واتضلو انتو وهذولاك لحالكو؟ طب نفرض جدلاً انكو انبليتو فيا ، بس بضل بلا أهون من بلا. إذا اطّلعت رح تقولو كنا عايشين بنعمة ومش حاسين 🫢

موضوع مختلف شوي لكن الي اكمن يوم حابب اسولف عنه

أنا بشوف موضوع الحكم العشائري فعلاً من الآفات و الأمور ال fraudulent في مجتمعنا

كبايرة العشائر اللي بجبوهم في العطاوي يحلو بين مشاكل الناس بحس الناس معطيتهم قيمة كبيرة بدون اي سبب منطقي. الناس هذول في الغالب ما عندهم علم شرعي بحكمو بين الناس على أساس أمور عرفية

اللي بيصير في الواقع انه المعتدي/القوي بملص ومنها والمعتدى عليه والضعيف بجبروا خاطره بكلمتين وبروح حقه بفنجان قهوة.

أنا يا جماعة الخير صرت من اليوم نسوي وبآمن بحق المرأة يكون عندها حرية تختار تطبخ بسمنة او بزيت

والها الحق تختار دوا الغسيل يكون Ariel , Persil او اي براند بدها اياها

وازيدكو من الشعر البيت أنا بشوف انه المرأة من حقها تختار بدها تجلي على أيديها ولا عل جلاية

هاي كلها خياراتها وحرياتها الشخصية ولا حدا اله عندها ، وانا كرجل ما بدي أصلا أتدخل فيها او ابدي رأيي

صار كل يوم واحد بده يحس حاله مختلف يجي يقول عن حاله وبلده أنهم مش عرب

المغاربة كلهم صارو أمازيغ ومش عرب

اللبناني صار فينيقي

السوري صار آشوري

المصري صار قبطي

وهلا نزلت موجة جديدة من الفلسطينيين تبعت احنا كنعانيين مش عرب

وفي المقابل في الصف الثاني من بعض الجنسيات اللي بده يخلي العروبة حكر على بلده

كل هل هبل يخدم نعرات طائفية وتحيزات فكرية لا تسمن ولا تغني من جوع

في لهجة عند بعض الفلسطينيين على ما أظن من عرب الداخل ، مش عارف يعني إذا منتشرة بمناطق ثانية يا الله شو بكره هاي اللهجة

الجماعة هذول اجو على ضمائر الغائب تبع الجمع "هم"و "هن" وقالوا ليش يكون عندنا اثنين منهم؟ خلص بكفي واحد واختاروا "هن" …. ويا ريت خلو هن بحالها ، لا كمان راحو شالو منها حرف الهاء … فكل حكيهم ن ن ن ن

ولادن

سياراتن

حياتن

روحاتن

جياتن

عرفتوا اي لهجة بقصد؟ هذي اللي بتحط كيلو ملح عالطبخة عندها نفس اللهجة ، يا زلمة لهجة لا تطااااااااق 😭

البنت الروسية هاي اللي في الأردن بتعمل فيديوهات وبقولو عنها pick me هاي جد جد مش حلوة. اللي بقول عنها حلوة عمره ما هو شايف بنات. والحركة اللي بتعملها بثمها (الضرطة) بتخليها مش حلوة بزيادة. رغم انو يعني محتواها كوميدي و ragebait اكثر من انو محتوى جدي ، بس لا تستغربوا من كلامها ، ترا المجتمع الروسي مجتمع "ذكوري" على قولة هذولاك

أنا شردت من صبات الاردن وجيت على صبكو فكرتكو عاقلين بس طلع ال ratio بين هذولاك وبين الناس العادية هون لسه اكبر من الصبات الثانية

شو في فروقات جذرية بين اللهجتين؟

أنا مهتم كثير في موضوع اللهجات ، كيف نشأت وكيف اتطورت والخ وبحس حتى اللهجات في الها أصول و patterns معينة خاصة فيها. يعني مثلاً في الدارجة المغربية في طريقة معينة للفظ ال التعريف…. فا هي بنحكي انها pattern خاص باللهجة المغربية

أنا إذا اسمعت حدا بحكي بعرف إذا هو من الأردن او من فلسطين من نبرة الصوت او من طريقة الكلام . بس اللهجة نفسها ما اقدر احدد شو هو الاشي بالزبط فيها اللي خلاني اعرف. هل في حدا مطلع عالموضوع او دارس linguistics وبقدر يشرحلنا اكثر عن الفروقات بين جذور اللهجتين؟

مسيكو بالخير. قبل كم يوم قرأت منشور لشب بقول فيه انه في مرحلة بين الإيمان بالإسلام والكفر وأنو يميل للكفر وسأل عن تجارب وتوجيهات ، وهو فعلاً مبين انه يميل للكفر كون انه سأل في صب تبع ملحدين والتوجيهات اللي أجته كانت من ملحدين. أنا كإنسان مسلم عندي كلمتين موجهات بالدرجة الأولى لهذا النوع من الناس قبل الملحد اللي قرر بينه وبين نفسه انه ملحد. أنا مش جاي اقنع الملحد بالإسلام ولا جاي أناقش اشكالية معينة عند ملحد ، لأني الصراحة ما بشوف حالي الشخص المناسب. أنا لاني شيخ ولاني عالم ويا دوبني حافظ جزء عم. ورحم الله امرىء عرف قدره ووقف عنده. هاظ البوست بتقدروا تعتبروه مجرد food for thought اكثر من انو نقاش

بسم الله نبدأ:

الإلحاد او الكفر بشكل عام له أسباب كثيرة ، ممكن بسبب الجهل ممكن بسبب الإعراض وعدم الإكتراث وممكن وممكن وممكن. لكن في سبب واحد أنا في وجهة نظري هو الأكثر شيوعاً في وقتنا الحالي وخصوصاً في مجتمعنا ، وهو الإشكاليات الموجودة عند الشخص المتعلقة في بعض التشريعات الإسلامية.

وهذه الإشكاليات برضو الها اكثر من سبب

السبب الأول: انه الانسان ركز على الجانب التشريعي اكثر من الجانب العقدي. لو ان الانسان يفهم الإسلام كعقيدة قبل ما يفهمه كشريعة ، رح يصل ليقين يخليه يسلم لأمر ربنا حتى لو ما قدر دائماً يفهم الحكمة الربانية وراء كل تشريع

السبب الثاني: انو فهم الأحكام الشرعية احيانا بكون مرتبط بمرور الشخص بتجارب معينة في حياته وإذا لسه ما مرق فيها ، قد يصعب عليه الفهم

السبب الثالث والاهم واللي هو محور تركيزي في هذا المنشور: اللي بيصير في كثير من الأحيان انه الشخص قبل ما أصلاً يتعرف على بعض الأحكام الشرعية ، هو كان متبني مفاهيم وأيديولوجيات مختلفة ومسلّم الها بدون نقاش ومخليها المنطلق تبعه اللي يحكم فيه على الدين ، بدل ما يكون الدين هو الأساس والمنطلق اللي يحكم فيه الشخص على هاي المعتقدات. طب ليش هاظ الاشي بيصير؟ ممكن يخطر ببالك موضوع التربية وأنو الإنسان متعلمش الدين بطريقة ممنهجة والخ وهذا اكيد طرف من المعادلة ، لكن في سبب ثاني اكبر منه. الحقيقة يا جماعة الخير انه على مر التاريخ في الغالب بيكون في منظومة اجتماعية هي اللي بتحدد لو بتأثر على فهم الإنسان وخصوصا الإنسان العامي للنصوص الشرعية ، وهاي المنظومة بتختلف من زمان لزمان ، اما الدين الإسلامي نفسه فهو ثابت لا يتغير.

على سبيل المثال: قبل 700 او 800 سنة الفتنة اللي كانت موجودة عند المسلمين كانت في الجانب العقائدي اكثر ، لانه المنظومة الاجتماعية في هذاك الوقت فرضت حشر الفلسفات وعلم المنطق في الأمور العقدية والغيبيات ، فاخترعوا قانون ضرورة تقديم العقل على النقل وحكّموا فهمهم للنصوص لهذا القانون ودخّلوا نفسهم في اشكاليات وتناقضات ما طلعوا منها. طب انتا بدل ما يكون مخرجك انو يا تفوض النصوص يا تأوّلها ، ليش ما تشك في التأصيل تبعك من أساسه؟ هم ما كان عندهم اشكاليات في الجانب التشريعي بعكس الزمن اللي احنا فيه. المنظومة الاجتماعية تبعتنا خلتنا على سبيل المثال نتبنى مبدأ الحريات المطلقة للأفراد ، فا بيجي شخص مثلا على آية "لا اكراه في الدين" وبفهمها من هذا المنطلق وأنو المقصود فيها كمان المسلمين ، بعدين بروح على تشريعات كثير في الإسلام بتتعارض مع مفهومه الخاطىء ، فا بيصير المخرج تبعه انه يا يأول النصوص ، او انه يختزل الإسلام في تشريع او تشريعين عنده فيهم إشكال ويلحد. طب ما فيه خيار ثالث لازم يخطر في بالك. انتا ليش قبل ما تشكل في الاسلام ، تشك في الأساس اللي انتا منطلق منه؟ ما يمكن الحريات المطلقة مش اشي منيح؟ طب ما يمكن لازم نفصل في مفهومنا للحريات؟ طب ما يمكن المبدأ تبعك اللي انتا بتعامله على انه من البديهيات هو لسه تبع أول امبارح وحتى الناس اللي ألحدت في القرون الماضي ما كان عندها اعتراضاتك؟ هذول كانوا بس مثالين عالسريع ولا هو النقطة هاي لو بدنا نتعمق فيها ، البوست ما رح يخلص. وفي الختام بحب أقول اللهم أرنا الحق حقا وارزقنا اتباعه وأرنا الباطل باطلاً وارزقنا اجتنابه

أنا الصراحة كنت مقرر اني ابطل اعلق على منشورات هذا الشخص. هذا الشخص اتخذت النسوية إله يعبد من دون الله وفي محاولة واضحة وضوح الشمس لتمرير الأجندة النسوية في الجيل الجديد. لكن اللي بشوفه دايماً بالتعليقات ، انه المحاولة فشلت فشل ذريع. من شان هيك شفت انو ما في عادي أعطى منشوراتها اي اهتمام

لانو Sorry to disappoint you ya Daktora, but clearly، no one is buying it

بس بما انها الآن دخلت الرسول صلى الله عليه وسلم بالنص ، فالشغلة كبرت ولازم ارد.

بسم الله نبدأ:

النسوية لا تمت للإسلام بصلة ، لا من قريب ولا من بعيد. بل إن النسوية في جوهرها ضد الإسلام وضد الدين بشكل عام وضد كل منظومة أخلاقية ، ضد منظومة الزواج والكيان الأسري

والرسول صلى الله عليه وسلم عمره ما كان نسوي حاشاه. خلينا نذكر بعض مغالطات صاحبة المنشور اللي فعلاً لا تعد ولا تحصى واللي بتخليها تصل لهيك استنتاج ساذج

المغالطة الأولى: انها جعلت الحقوق اللي أعطاها الإسلام للمرأة حكر على النسوية. فا انا على سبيل المثال إذا أعطيت اختي حقها في الميراث ، صار اسمي نسوي بدل ما يكون اسمي مسلم بعرف شرع ربنا. دكتورتنا خلت النسوية هي الأصل ، والدين هو الفرع ، وهذا فعلاً من المضحكات انه تنسب شرع ربنا اللي نزل قبل ١٤٠٠ سنة لأيديولوجيا تبعت أول امبارح. زد على ذلك انه الاسلام أعطى المرأة هاي الحقوق مش بالمفهوم النسوي ولا بالشروط النسوية

المغالطة الثانية: انو الدكتورة حصرت مفهوم النسوية في هاي الأمور المذكورة. طب شو بالنسبة للمية ألف شغلة في دينا الإسلامي اللي مزعلة النسويات؟ شو بالنسبة للقوامة والطاعة؟ شو بالنسبة للولاية؟ شو بالنسبة للحجاب؟ ربنا قال الرجال قوامون على النساء وانتي بتقولي المرأة مستقلة. محمد صلى الله عليه وسلم اللي بتدعي عليه انه كان نسوي قال لو كنت آمراً أحداً ان يسجد لاحد لأمرت المرأة ان تسجد لزوجها. وين الاستقلالية اللي انتي بدك اياها؟ وين الحرية التامة انو المرأة تعمل شو ما بدها وما حدا إلو كلمة عليها؟ صح هاي الأمور لازم تنفهم بنظرة شمولية لباقي النصوص والتشريعات ، وصح انه الدين قد يتم توظيفه بشكل خاطئ، لكن هذا مش معناه انه المفهوم النسوي هو الصح وهو اللي متوافق مع الإسلام ، وهون بنيجي لآخر مغالطة رح اذكرها

المغالطة الثالثة: انه الدكتورة اخترعت اشي سمته "النظام الأبوي الذكوري النجس" وادعت انه الدين نابع منه وأنه هو يستخدم الدين لمصلحته للسيطرة على المرأة. مبدياً أنا غير متفق انه في هيك نظام بهذه الصورة المذكورة ، لكن مما لا شك فيه انه الدين يتم استغلاله وتسييسه سواء من قبل الأفراد العاديين او من اصحاب السلطات وهذا الشي احنا قاعدين منشوفه حرفيا كل يوم قدام عينينا. بس اللي غاب عن ذهن الدكتورة انو حتى الحركات الفكرية الثورية وعلى رأسها النسوية هي ايضاً تستغل الدين للتأثير على الأفراد ، وهذا الاشي اللي انتي حرفيا قاعدة بتعمليه. الدكتورة عارفة انه الدين غالي عليك ولو حاولت تمررلك النسوية زي ما هي كان ما رح تنطلي الحيلة عليك. هي عالقليلة صرحت انها ملحدة بس في غيرها من النسويات المنتسبات للإسلام بتلبس قناع الدين وبتتسلح فيه اكثر من اكبر "اب ذكوري نجس".

احس إن المجتمع الفلسطيني من اقل المجتمعات تأثراً بالنسوية. طبعاً هو تأثر وخلص زيه زي باقي المجتمعات بس بشكل عام نسبة التأثر مقارنة مع غيره قليلة. ومن وجهة نظري في سببين للموضوع: السبب الاول انه العقلية الفلسطينية بطبيعتها مقاومة للأفكار النسوية بدون ان تشعر وبدون ما تعرف أصلا شو يعني نسوية. اغلب الناس بمختلف أعمارهم وجنسهم ودرجة تدينهم ما يتقبل الأفكار النسوية بالفطرة. والسبب الثاني انه التأثر بالنسوية في الغالب بيجي من الفضاوة ، لانه الفضاوة تخلق الملل والملل يجعل الانسان يخلق مشاكل غير موجودة أصلا ثم يبحث عن حلول لها في قعر الوادي. اما بالنسبة للشعب الفلسطيني فهو فيه اللي مكفيه فا قصة الفضاوة هاي برا المعادلة أصلا

حدا بعرف صب متخصص بالأسئلة الطبية؟ عندي سؤال عن shock waves therapy

أنا شايف صبكو هاظ كثير هادي ويا دوب حدا بنزل فيه اشي. أنا واحد من الناس اللي بشارك خواطري في صبات ثانية وكثير بنحظر من صبات لانه آرائي controversial … هم بصراحة controversial بس للمجتمع الريديتي، اما للناس العادية لا. المهم شو بدكو في طولة السيرة إذا حابين آجي ارمي بلاي عليكو واصير انزل هون قولولي

او بالأحرى it’s not as subjective as you like to believe

مبدياً انا رح اعترف انه الموضوع ملش فايدة كثيرة ، بس أنا عندي quirk انه لازم دايماً اصلح المفاهيم الخاطئة.

هلا أكيد النسبية موجودة ، لكن يمكن لا تتعدى ال 30% …. أما انو الجمال نسبي 100% زي ما جماعة ال Body positivity ببالغوا فهذا الصراحة ضرب من الخيال.

ال beauty standards اشي حقيقي و مش myth