u/elgayar69

بما ان منتخبنا الوطنى حقق انجازات والفترة الي فاتت كلنا كنا بنقول يا مصر بتعمليها ازاي ، انا برضو كنت بسأل نفسي يا مصر فعلا بتعمليها ازاي

الموضوع كالتالي من فتره قبل العيد بيومين كنت مع صحبي في مشوار وراكب معاه علي الموتسيكل بتاعه و خلصنا المشوار بتاعنا وراجعين و ماشيين علي طريق ( الطريقين متقسم رايح و راجع ) و طريق سريع مفيش مطبات الخ

كان قدامنا عربية سواقها قرر انه يغير اتجاهه ويلف ويرجع لكن بدل ما يروح لل U turn السواق الغبي لف علي نفس الطريق بشكل غبي وبما ان صحبي انا ماشي بسرعه لان الطريق مفتوح مقدرش يتفاداه و لبسنا فيه وعملنا حادثه شنيعه بكل ما توصفه الكلمه من معنى

الاسعاف جت و نقلتنا للمستشفي و اهلي و اصحابي وصلوا المستشفي

ابويا اول ما وصل المستشفي حكومى امين الشرطه وقف معاه وقاله لازم تعمل محضر وبالفعل عمل محضر في السواق

و السواق علي الجانب الاخر كان اتقبض عليه في نفس اللحظة و راح القسم . الغريب بقا ان قانونا الجميل بيديله الحق انه كمان يعمل فينا محضر وقد كان السواق عمل فينا محضر ويبقي انا في الوضع دا ( جاني و مجني عليه )

انا سيبت المستشفي الحكومى و روحت مستشفي خاصه لقيت عسكري جاي واقف علي باب اوضتي في المستشفي وكان عايز يكلبشني في السرير لانى متهم ولازم اتكلبش عشان مطلعش اجري واهرب ( انا عندى كسرين في رجلي و كسر في كتفي و كسر في الجمجمه ) ولكن عسكري الداخليه معاه اوامر انه يكلبشني ولان ابويا اعترض والعسكري في قلبه من الرحمه مرضيش يكلبشني

المهم خلصت عملياتى ونزلونى ف عربيه عشان اروح البيت لكن العسكري قال ممنوع لازم نروح القسم الاول

روحنا القسم ، المأمور قال انى لازم ادخل الحجز لانى متهم!!!

انا متكسر مليون حته والمأمور عايزنى ادخل الحجز وعلفكره بيتكلم بجد مش بيهزر

طب الحل ايه ؟ اننا نروح النيبابه ونستاذن اننا نمشي

ابويا اخد معاه محامي وحاول يوصل لوكيل النيبابه لكن موصلش لحاجه

ساعات بتعدي وفيه اتنين متكسرين واقفين في الشارع في اشد الحاجه للرعايه والراحه واقفين قدام القسم وكمان المأمور بيقول هدخلهم الحجز لحد ما يتعرضو ع النيابه !!

لحد ما صحبي واسطه قدر يوصل لرقم وكيل النيابه و دخل اتكلم مع المأمور وفلحظة لقينا المأمور بيمضينا علي ورقه و مشينا

الحمدلله علي كل حال

ولكن السؤال هنا : يا مصر بتعمليها ازاي؟

تعرف ايه عن الجيار

الاصعب من قرأة التحول لكافكا وتخيل نفسك في موضع جريجور سامسا وتحولت الي كائن غريب لا يقدر علي النهوض من الفراش هو ان تقرأ التحول لكافكا وانت حقا لا تقدر علي النهوض من الفراش بمفردك :(

رسالة للادمن : ضيفو فلاير جديد اسمه استر يدولى