اتخنقت من تحكمات أهلي والمجتمع
قلتلهم هقص شعري (باخد فلوس منهم) ووريتهم صورة عشان أغلس عليهم بما أنه قصير اوي وهم مش بيحبوا كدة وعشان أهيأهم نفسيا وكنت عارفة أن هيبقى فيه تعليقات أني هبقى شبه الولاد لكن الموضوع كبر ولقيتهم بيقولوا تشبه بالرجال وحرام ودي آخر مرة هيسيبوني أقص شعري قصير كدة ولما قلت أني اخترت قصة طولها معدي آخر ودني وملامحي باين عليها اني بنت فكدة مش بعمل حاجة حرام قامت أمي قايلة أن هيبقى شكلها وحش وأنها أمي وعارفة أنها مش هتعجبني عشان هي دائما صح وأنها مش راضية وكدة ولما قلت أن ده شكلي وأنا حرة فيه طالما مش بعمل حاجة حرام وهعمل اللي أنا عايزاه بفلوسي بعد كدة قامت مهدداني تلطشني بالقلم عشان قلت كدة وواحدة قريبتي قاعدة معانا تفكيرها برضو ضد عادات المجتمع فأنا كدة بأثر عليها (مكانتش مركزة معانا أصلا). بجد أنا كرهت المجتمع ده وتفكيره المتخلف اللي فاكر أنه بيحكم بالدين وهو مش فاهم فيه أصلا وكل واحد ماشي بمزاجه فاكر مكانته في المجتمع أو دوره في الأسرة تديله حق يدوس على اللي تحته ويتحكم فيه بأي طريقة حتى لو باستغلال حاجة بشكل خاطئ. الواحد مش عارف يحب اللي هو عايزه ولا يلبس اللي هو عايزه ولا حتى يبقى شكله زي ما هو عايز حتى في حدود الحلال دون تجاوزات بسبب الانتقاد والتحكم