ليه ماينفعش نقابل شريك حياتنا بصدفة رتبها قدر ربنا ونكون متوافقين جداً زي قطع البازل.......
ومن غير بقي ما نقابل ناس مش شبهنا ولا نمر باي تجارب؟ ومن غير ما يكون في اي عائق مادي او نفسي وقلبنا محفوظ بس لبعض؟ نشيل هموم الدنيا سوا سوا ونكون زي المرهم بنخفف علي بعض وما بنزود حمل ولا ضغط علي بعض، نبقي زي التيم كدا في صف واحد وصفحة واحدة دايما وايد واحدة ضد اي عائق يقف قصدانا.
نعرف نتواصل كويس ونفهم بعض ونقتل غرورنا ونفهم بعض.
نفهم بعض من غير ما نتكلم.. ونتعاطف مع بعض وما نحكمش علي بعض. وما نسوء الظن ببعض ابدًا ونتخذ لبعض اعذار كتير...
ونسامح بعض كأن مفيش حاجة حصلت..
ندي مساحة شخصية لبعض وفترة راحة وكل حد فينا يمارس هواياته ويرجع يحكيها للتاني.
نحب الخير لبعض بجد
كأننا في عهد الاصدقاء.
وكل واحد يكون عارف ايه البيضايق التاني وما يعملوش ابدًا ابدًا.
نشيل الحمل عن بعض.
نتناقش نقاش بناء، الاحترام بيسود العلاقة.
مع الاهتمام بكل الجوانب الهتقوي من العلاقة علي جميع المستوايات.
نصلح مش نتجاهل، نواجه مش نهرب.
آه هنزعل هيكون في فترات صعبة، هنتعود علي بعض؟ هنزهق؟ عايزين جديد عايزين نغير ؟ البعده؟ ارمي ورا ظهرك؟
لا لا مش هتكون كدا لان علاقتكم هتكون مبنية علي ارض صلبة
ومش هتتأثر بعوامل التعرية ابداً ولا بالطوب البيترمي عليها ولا اي حاجة.
علاقة راسخة جدا ودايما بتصلح نفسها بنفسها، واهم حاجة فيها الحرية وانك تشوف شريك علي انه انسان تبص لروحه ولطفله الصغير وتحاول تحتضنه وتحتويه.
هل بتكلم علي علاقة مثالية ؟ ولا هل ده المفروض يكون طبيعي؟