u/Madribs

انا اصلي من القصيم بس زياراتنا لها معدومه من كبرنا ولما احاول اقنع اهلي نروح مالهم خلق فشديت الرحال انا وامي لحالنا وجازتلي مره ابي الهدوء والناس السمحه والاسعار الزينه بس انا توني مستقيله من شغلي وافكر ببزنس لان جاني احتراق وظيفي وافكر استأجر شقه بالقصيم واعيش فيها فتره اشوف وش ناقص او يمشي بالسوق واجرب بزنس لعله يمشي وارتاح من غثا تدوير وظيفه جديده او الرجعه للرياض

هل تحسونها مخاطره لاني قلت لاختي الفكره مبدئيا وعززت لي بس عندي تخوف هل فيه اصلا وظايف لو توهقت وماعرفت وش اسوي بزنس لاني بعد ماعندي خبره بالموضوع بس جالسه اعيش حاليا وضعيه خاطري وش وراك الدنيا قصيره فمدري لو طلعت سبك بالبزنس وتوهقت هل بلاقي وظيفه بالقصيم لو رواتب بسيطه بس تمشيه حال الخبره العمليه عندي والسيره الذاتيه الحمدالله ممتازه

يعني بروح اخاطر وابدا من الصفر + عادي فكره بنت لحالها عايشه بالقصيم متقبله ولابينقدون علي؟ اهلي مايرضون بالنقاده وانا مارضاها لنفسي بس انا اعتبرني دبره وقد جلست لحالي بابوظبي للشغل فمايعوق بس تهمني نظره المحيط الي حولي لي

الي عنده رد على اي من هواجيسي اكون لكم شاكره

فيه بنتين اعرفهم من سنوات انا صايره مابلعهم ولاطيقهم بعيشه الله كل كلمه وشي يسونه يقرفني من حياتي المشكله اني لاحظت الموال الي اسويه اسلك للناس لما ابدا اكرههم واذا كرهت اخاف من نفسي لاني ابدا ادقق بتصرفاتهم بزياده واحس ودي اجلدهم ودي يدرون اني اكرههم

تخيلو احد كبر الحمار بكل كلمه والثانيه يقول انا تشيكن نقت حركات الي انا مافي مئلوم كلمات عربي زين وهي مولوده بحريملا يعنني انا امريكيه يخوفني العقل انه يحسون كشخه كذا بطرش من الكرنج!

يالله صباح خير بس بتحلطم وزاقه معي فببالغ بالنقد

اغرب شي يصير هنا كل فتره ادخل الاقي احد عشوائي مرسل خاص اهلا/ سلام/ كيفك/ طيب وبعدين؟ يعني هل مخكم فيه شي؟ يعني وشو هاي وتسكتين او تسكت الي عنده سالفه تعليق على بوست او شي يقولها مباشره حركات الي ماعندهم مهارات تواصل اجتماعي ذي ودي تتبطل لانها قمه اللوزره ومبزرة واذا مره وحيدين تدورون ناس عشوائية تسولف معكم سالفه بدايتها هاي كيفك روحو سولفو مع ai اصرف او حاولو تطلعون من غرفتكم للناس وتصيرون اوادم وتفكونا من حركاتكم

هل تعرفون طبيبات نفسيات كويسات ابيها طبيبة انثى ويفضل مب عيادة شي اونلاين لو اجنبيات شي غير حقين لبيه جربتهم خياس اقولها فيني ضيقه صدر تقول اقري قرآن الرجاء عدم فهمي غلط الدين جانب روحي مهم جدا لكن علم النفس والصدمات النفسية تحتاج علم لعلاجها فاذا تعرفون من عندهم سالفة دلوني الله يعافيكم

السلام عليكم

ابمسك خط من الرياض للقصيم وابي اعرف هل فيه شي يحتاج اسويه من تشييكات؟ انا اودي السياره كل فترة لبترومين صيانه دوريه وقلت من زمان ماوديتها فقبل الخط ان شاءالله بوديها لهم لكن والله اني مادري وش يسون غير تغيير الزيت يعني كل مره اقولهم باقه مازدا صيانه وخلاص مقد دققت اصلا وش تشمل الصيانه الدورية فهل الصيانه الدورية كافية اسويها قبل مسكه الخط؟ الكفرات مغيرين قبل سنه ونص تقريبا فوضعهم اتوقع سليم بس كيف اشيك عليهم للحرص انهم تمام لان بترومين ماعندهم الظاهر فحص كفرات

أول ماتوظفتو وصار عندكم فلوسكم الخاصة وش أول شي شريتوه يعني مب كوب قهوه شي كان بخاطركم وقدرتو تشترونه

شكرا على السؤال طال عمرك جوابي شريت سلسال ذهب مخيس كان وقتها عاجبني وحسيت اني غنيه اقدر اشتري اشيائي بعد مرمطه المكافئه

الله يرحمك ويغفر لك اعتذر عن اني ماقضيت كل دقيقة وثانية معاك واسمع سوالفك اعتذر اني فضلت اشوف القناص والهى بسخافه المراهقه اعتذر اني ماحبيت راسك كل يوم اعتذر اني ماقويت علاقتي فيك اعتذر اذا خيبت ضنك اعتذر اذا مارضيتك اعتذر اني مقهوره على ابتلاء ربي يوم كبرت واستوعبت كبر فقدتك اعتذر عن كل غلطه غلطتها ومستعده ابيع عمري وترجع

انا لي سنوات وماعمري طفيتها وانا أعبي لأني احس خرابيط وتو معي اختي وجلست تعطيني محاضرات زقت بجوي وطفيت السياره وقسم بالله فطيسه مب معقوله نطفيها بذا الجو

تحسون عندكم قوه خارقه تفهمون الحيوانات؟ احد يقول ايه على شان ماصير مهبوله لحالي

وصلت للسلام الداخلي ومرتاحه مع نفسي واحب شخصيتي ومحيطي بس اول ماجتمع مع اهلي ينزق على كل السلام الداخلي ويرجعون كل المشاعر الخايسه الي كانت تجيني من عدم ثقة بالنفس واشوف نفسي ابدا ابرر تصرفاتي وكلامي واتذكر انه دقيقه ستوب اطلعي من النقاش اصلا ماعرف شلون دخلت
اهلي احبهم بس فيهم تصرفات مزعجه وكل نقاش حلبه مصارعه وهجوم على شخصك اذا اختلفت واذا وافقتهم لو السالفه عن الطقاع قلبوها جد ونرفزه وتفلسف

للاسف طفشت منهم ودي يعقلون

خلاص جانا الحر الي مايرحم وبتلاحظون بالشارع بالظهر والعصر اقصى درجات الحر مناديب التوصيل بدباباتهم يلفحهم الحر وكلكم فيكم الخير بس لو ناسين خل نتذكر نحسن لهم اذا وصلو طلباتنا بأكراميه او بعلبه مويه بارده نهون عليهم غربتهم وشقاهم

استغربت ماقد انحذفلي بوست لاني اقرا تعليمات كل صب واحترم قوانينهم الغريب انه هنا حذفولي على طول بوست عادي جدا ومافهمت ليه رحت قريت تعليماتهم مره ثانيه وماعرفت وين الغلط ببوستي

فياليت المودريترز الي هنا يوضحونلي وش الغلط على شان استوعب ترا ماراح اقدر انام بالليل هيلب

وش الاشياء الغير منطقيه بس تخليكم تعصبون؟ يعني مثلا انا اطنقر اذا احد بيقول شي ويعنني سر فيقولونه باذني اصير مره معصبه واصير اكره الشخص فتره وصارت مع اختي ماقلت لها شي بس بتلت متقرفه منها كل اليوم 😭 ليه ليه يعني تحسين عادي نفسك يجي اذني!!!!!

تعرفون لما تكبرون وتتغير جوانب كثيره من اهتماماتكم وشخصيتكم انا معامله نفسي كمشروع تطوير واحب التغيير بالافكار طباع مشاعر احسه اكثر شي طبيعي بس اواجه فيه مشكله من فتره انه صداقاتي من سنوات طويله ماعاد احسهم صديقاتي يعني احترمهم واغليهم لكن لي اراء عن تصرفاتهم احتفظ فيها لنفسي لان مين انا اقول ماتعجبوني تغيرو فخلاص الحل انه ابتعد واحط حدود اشوفهم متى ماحسيت من زمان عنهم بس المشكله انهم عادي كل ويكند يشوفون بعض اكثر من مره حتى خلال الاسبوع فكيفهم المشكله انه كل مره يشوفوني يقولون شفيك مختفيه هل فيك شي والي يقهرني انه دايم ارد عليهم بالقروب بسناب اصور حياتي طبيعي يعني واضح مافيني شي واجي معهم ويكند ورا الثاني بس لايزال ذا التعليقات الي تطفش ومليت ابرر نفسي

الي زعلني انه مايجيني شعور انهم صديقاتي وماحبيت النفاق بمشاعري نحوهم احبهم بس ودي يكونو صفحه او جزء بحياتي وخلص

كيف الواحد لو يغلي ناس بس وده يتركهم بدون ماياخذون الموضوع بشكل شخصي لانه احس لو طولت بصير اكرههم حتى الحدود الي احاول احطها كل مره مايتم احترامها من دواعي الميانه

يالله صباح خير قرقي واحد لاتقرون اذا مالكم خلق جالسه اهبد

تعرفون لما تحسون بشي بس ماعندكم ادله؟

انا عندي احساس انه وحده من صحباتي الي مره قراب مني تعرف اكاونتي بريدت

هو عادي دايم اسولف لهم عن قصص am i the asshole لان ذا الصب خلاني بريديت من سنين تضحكني سوالفهم واحب الحش بالقصص حقتهم مع صحباتي

وذا اكاونتي له سنتين منب مره أكتڤ بس تجيني ايام ادخل واكتب وفترات اسحب عليه مده طويله

وقبل فتره كتبت بوست بصب سعودي على موضوع عام كانه احصائيه ماكان عن موقف بحياتي يعني فأنا اسولف معها على اساس اني قريت احد كاتبه بريدت، فأيش الي خلاني اشك حسيت انها عارفه الأجوبه الي جتني ومارتحت👀

هي ماقد جابت طاري انها تستخدم ريدت احس مب جوها اصلا

فما ادري هل انا ابالغ ادري اني انسانه موسوسه بطبيعتي بس والله منب مجنونه هههه بس احس اني اعرف اقرا رياكشنات الناس كويس شعور امعائي لايغلط ابدا 🤝

انا مايجيني أرق ومشاكل بالنوم بس امس الله لايعيد هاليوم عجزت انام واحس اني أنجنيت شلون كذا جسمي تعبان ابي انام بس ماقدرت الشعور مخيس وصارت الطامه الكبرى طلعت الشمس ولسى احاول انام فالوضع اكتئاب حاد

الصدق اني ماكنت اطق خبر لما احد يقول اوه عندي ارق او مقدر انام كويس بس من بعد امس بصير ارحم كل احد عنده أرق

تعالو يالمتأرقين انتم في مساحه امنه فضفضو وتحلطمو احبكم