افكار وأشياء مزعجة
مرحبا، بالبداية اعتذر اذا كان الموضوع مزعج أو غريب واعتذر لأن راح اطول بالسالفة، الموضوع بلش من وانا صغير جنت اروح ويا الوالد لمكان شغله ، طبعا الوالد عنده محل قصابة ( جزار يعني) فجنت دائما اشوف الحيوانات وهم يذ*بحوها، ما اعرف شنو الشعور الي جنت احس به بس كان شعور راحة ، بس ما جان عندي رغبة أن اني اسوي هالشي لا مجرد جنت اتفرج عليهم، هالكلام واني عمري صغير يعني اقل من ٧ سنوات ما اتذكر اشكد جان عمري وقتها، ف بقيت على هذا الوضع دائما الوالد ياخذني وياه بحكم اني الوحيد للعائلة واستمر نفس الشعور يجي الي أنه اني ارتاح لما اشوف منظر الد*م والع*نف بس ابدا ما جنت اشعر ان لازم اسوي هذا الفعل على الواقع,
استمر الوضع لحد ما وصلت لعمر المراهقة تقريبا ١٤ سنة هنا الوضع بدأ يتطور، صار تجيني مثل الفلاش باك براسي مو فلاش باك ايام لما كنت اروح ويا الوالد لا ، هيجي يعني ما اعرف اشلون اوصفه، مثل الومضة بالرأس أنه جاي اضرب أحد أو ماسك س*لاح واقت*ل واذب*ح بالناس , وكانت تجي بعض اللحظات وهاي جانت تتكرر أكثر شي أنه جنت ماسك سكينة واطع*ن الناس ، بالبداية ما انطيت الموضوع أهمية كلت لنفسي أن فترة مراهقة وتغيرات تصير بالجسم ف عادي الوضع، بس مع مرور الوقت صار الموضوع مزعج جدا، يعني صار تقريبا كل الاوقات باليوم تجي هاي الاشياء براسي واشتد، ومع مرور الوقت بديت انجذب لاي شي بيها د"م وع*نف مثل الافلام والمسلسلات الي بيها هيجي اشياء والرياضات القتالية مثل الملاكمة والفنون القتالية وغيرها، طبعا هذا الكلام تقريبا بعمر ال١٦ ، بوقتها صار وياي موقف لحد الان ما أنساه، جنت امشي بمكان عام واكو هواية ناس فجأة وبدون سابق انذار اجت هاي الاشياء براسي واني بنفس المكان والناس موجودة ، الشيء بوقتها كان اني شايل سلا*ح وارمي على الناس ، حرفيا كأنه صار عندي انفصال عن الواقع، وبعد كم ثانية رجعت للواقع وكملت مشي،
استمرت هاي الاشياء تصير وياي لحد عمر ال١٨ يعني بدايات لما صار عمري ١٨, لحد هاي الفترة بس جانت تجي هاي الاشياء براسي وجاي تزداد شوية شوية وصار الموقف الي حجيت عنه فوك، الموضوع بدأ يتطور بعد أكثر صرت لما انام احلم بهذه الأشياء واحلام الله لا يشوفكم إياها، اقل ما يقال عنها كلها عن*ف وفوضى, احلام جانت متنوعة من قت*ل وذب*ح الناس ، إلى ان اضرب الناس على وجوههم لحد ما تتشوه، واخر حلم ما يطلع من راسي تقريبا قبل اسبوع صار، حلمت أن ذ*بحت شخص وحرقت الج*ثة بالكامل, وباخر فترة كل احلامي هيجي صايرة ،
ما اعرف ليش هيجي يصير وياي رغم هواية متقرب من ربي ومحافظ على كل الفروض بس مجاي اسيطر على هذا الشي، بحيث وانا اقرا قران او اصلي تجي هاي الشغلات، وحتى اني ما مدمن على مشاهدة الاشياء الي بيها عنف بس لما جان عمري ١٦ بعدين ابتعدت عن هاي الشغلات ، خايف أن يتطور الموضوع اكثر واكثر وما اسيطر على نفسي، وبالنسبة أن اراجع طبيب أو اخصائي نفسي فما اكدر بسبب ظروف معينة، وهذا الموضوع ما متكلم عنه لاي احد لأن اصلا ما عندي أشخاص مقربين أو اصدقاء من واني صغير لحد الان، ما اعرف شنو اسوي شنو نصيحتكم الي واشلون اتصرف بخصوص هالشي لأن ما اعرف افكر بعد والموضوع مسبب أزمة عندي
اعتذر مرة ثانية لأن طولت بالكلام ولأن الموضوع مزعج جدا اعرف هالشي بس ما اكدر بعد اتحمل