u/Sergio_Zahavi

مساء الخير على الجميع، أول مرة أكتب هنا.

والدي كان صاحب مكان هو مصدر رزق العيلة، وبعد وفاته من فترة بقيت أنا المسؤول عن إدارته. بيشتغل معايا فريق من الشباب، وطبيعي إن جو الشغل بيخلينا نتكلم ونتناقش في حاجات كتير زي السياسة والرياضة والدين، وبنعتبر بعض شبه إخوات في المكان. (وطبعاً محدش فيهم عارف إني إكس ).

المشكلة إن واحد من الشباب اللي بيشتغلوا معايا، كل ما موضوع الدين يتفتح، بيتكلم بأسلوب فيه عدوانية زايدة، ومش بيقبل أي نقاش هادئ، وبيوصل لحد السب لو الكلام جه على أي حد مسيحي. من كتر التكرار بقيت فاهم طبيعة تفكيره.

من كام يوم كنا بنتكلم عن موضوع اللادينيين، فطبعاً هو راح يشتم ويقول إن دول بس بيتركوا الدين عشان يعملوا حاجات كانت حرام عليهم وهما متدينين. وفي وسط الكلام قال جملة صعبة إن اللي بيترك دينه لازم يتقتل وإن حد الردة لازم يتطبق عليه.

بعد الموقف ده حسيت إني مش هقدر أستحمل الأسلوب ده جوه في المكان ده خصوصاً إن الكلام وصل لدرجة القتل بسبب رأيه أو معتقده. قعدت معاه على انفراد وقولتله إن اللي بيحصل ده مش مناسب خالص لجو الشغل، وإن أسلوبه في الحوار فيه عنف زايد عن اللزوم، وإني مش قادر أسيبه يكمل معانا في المكان بعد كده خصوصا بقا ان المكان ده بيبجي في ناس اعتقد مش نفس طريقته البضان دي عشان ساعات بيجي بنات وطبعا واحد زي الارهابي ده لو شاف واحد لبسها مش كويس هيفضح ميتين ابوها ويعملي انا مشاكل وفعلاً أنهيت شغله معانا من ساعتها.

اي رأيكم سالت واحد صاحبي قالي انت قطعت رزقه وبتاع ف مش عارف مع اني شايف ان ده انسب حل اللي انا عملته ، عايز رأي اخواتي

وأسف ع الاطاله