u/xvs_q1

يوم تسوي شي واو بنظرك وتتحمس انك توريه احد وتنصدم من ردة فعل بعض الناس البارده عليه

بنات ايش افضل نوع فونديشن استخدمتوه ؟ كنت استخدم نارس وما ناسبني ابد وقلب لونه مو مثل ما شريته

بخصوص الاحداث الي قاعده تصير الحين الامان الي حنا فيه وقوة الدولة بتصّدي كلها بفضل الله سبحانه وتعالى فيه فئه اذا جاها الانذار تصور الشاشه ويقعدون يطقطقون كأن نعمة الامان هذي مستحيل تزول ! ومن كثر مايخذون الامور الجديه بطقطقه صاروا يطقطقون حتى على اقوى المصايب بدال مايجي الانذار وتحمد ربك انه اعطاك نعمة الامان ونعمة انك والي حولك بخير تعاملها بهالطريقه !!

زواج اختي قريب وافكر اسوي مكياجي بنفسي لاني الحمدلله متمكنه لدرجة كبيره واخاف الميكب ارتست بعد ماتعرف لملامحي تدعموني اجزم على قراري ولا استخير

الي سبق دخل سيرفرات هناك وعنده خبره ايش رايكم فيهم ووش الاشياء الي واجهتوها هناك وهل تنصحون احد يجرب ويدخلها

اخر السنوات قررت اقوي علاقتي بأقاربي وكان اسوء قرار اتخذته
شفت منهم الي يدعي المظلوميه ومنهم الي ينقل العلوم ويبهر فيها
والي يتهم ناس باشياء ماسووها والان ابغى اخففها
ايش الطريقه الي ممكن اتبعها عشان اخفف العلاقه جدًا و ماتثير المشاكل

عندي خالة شخصيتها غريبة جدًا اقرب للاعتلالات النفسيه ، قبل سنوات زوجة خالي توفت وتركت وراها ثلاث اطفال بنات توأم وطفل اصغر منهم راحت خالتي هذي وقالت لخالي انها بتتكفل بتربيتهم وسمع لها خالي وفعلًا استقبلتهم ببيتها وورتهم الويل عيشتهم عيشه صعبه ما بين صراخ وتهديد وتلفيق تهم وتشويه سمعه كانت تروح عند زوجات خوالي وتتهم التؤام بالسحر واشياء شيطانيه مايستوعبها احد اتهمتها اطفال ، من سنوات الى وقتنا الحالي وهي تكرر هالاتهامات السبب الي خلاني اطرح هالموضوع انها تحاول تستخدمني سلاح عشان تضر هالبنات وتكيد لهم انا قريبه لاعمارهم وكلنا بفترة جامعيه الحين وقريبات من بعض ف صارت تسوي اشياء عشان تخرب بينا من ضمن هالاشياء كانت تمسكني وتحرضني عليهم وتحاول تقنعني انهم ضروها وسحروها الي قاهرني انها تحاول تدخلني بمشاكل انا اعرف ان مالها نهايه وتحاول تستخدمني لمصالحها الشخصية وخالتي هذي شخصيتها صعبه لو احاول اوقفها عند حدها بتقلب علي ومصيري بيكون مثل مصيرهم تشويه سمعه واتهامات مالها نهايه.

قبل كم سنه توفت ام احد المشاهير الي اتابعهم واتذكر كانوا يترحمون عليها بكل مكان المهم كان لها رابط صدقه باحسان وعدا المبلغ المطلوب بثلاث ايام ومن وقتها وانا بين فتره وفتره ادخل الرابط الى وقت قريب الي مبهرني ان الصدقه عنها ما وقفت مع ان وصل المبلغ المطلوب جاء ببالي كيف هالمشهور زرع محبته بقلوب الناس لدرجة ان فيه ناس مانسوا امه للان

بسوشل ميديا عامتًا يمرون علي ناس اكثر الكلام الي يقولونه قذر حتى ابسط الكلام يدخلون فيه الفاظهم هذي وش يخليهم يوصلون هالمرحله وهل هم بحياتهم الواقعيه عادي عندهم يتكلمون بالالفاظ هذي؟

عندي مسام بوجهي مضايقتني ولاحظت ان بشرتي تتقشر بشكل فضيع للي عانوا من نفس مشكلتي ايش المنتجات الي فادتكم ؟

بأحد الأيام بالجامعة كنت جالسه بزاويه اذاكر الآ وفجاة تطلع بنت من العدم جايتني تبتسم واول مره اشوفها جتني وقامت تسولف سوالف عشوائيه ونوعية السوالف الي تسولفها جدًا غريبه مو طبيعيه قامت تسولف عن خدامتهم انها هربت وانها كسرت مواعينهم قبل تهرب وبعدين دخلت بسالفه ثانيه انها تهاوشت مع صديقتها وبلكتها وبعدها دخلت بسالفه ثالثه ان امها دقت عليها وهي بالمحاضره تهاوشها كل هذا صار بدقيقه عقلي مو راضي يستوعب هي من وين جت وليش فجأة جت تسولف معي وايش السوالف الي تسولفها هذي وقمت من مكاني واسلك لها وهي مو راضيه تسكت سوالف عشوائيه وراء بعض لين سرعت مشيتي واختفيت عنها ومر اسبوع بعدها لقيتها بالمصعد وابتلشت فيها مره ثانيه سوالف عشوائيه لين فتح المصعد وهربت مره ثانيه حرفيًا كأننا توم وجيري والمره الثالثة قابلتها بالكفتيريا وترجع تسولف نفس السوالف انا انجنيت لين امسكتني بنت ثانيه قالت هذي مو صاحيه تمسك اي بنت وتقعد تسولف معها سوالف غريبه وقالت لي كل ماجتك طنشيها تطفش وتروح تدور غيرك فعلا كل ماجتني طنشتها ولا كأني اسمعها لين طفشت مني وماعاد تجيني

يوم كنت طفله تعرضت لصدمه نفسيه اعاني منها لليوم فيه فترات من حياتي يكون وضعي احسن لكن مرات تجيني انتكاسات اكون لمّا تمر علي الذكرى تجيني كتمه ما اقدر اتنفس كويس ومرات اذا شفت الاشخاص الي سببوا لي الصدمه هذي انكتم بعد الي ابغى استفسر عنه الاشخاص الي قد كلموا طبيب نفسي هل فعلًا انحلت العقد النفسيه الي عندكم ؟ خصوصًا الي لها سنوات طويله ؟ كل ماقررت احجز جلسه يجيني شعور ان مافيه شي يفيد واكنسلها