u/ABDOOUU99

كنا ماشيين في الشارع فا لقينا عريس جنه شمحط قد الدنيا ماسك بنت في اعدادي كده من كتفها وعمال يزق فيها ويكلمها بطريقه غشيمه والبت واقفه سايبه نفسها خالص

فا ابويا وهو معدي قاله ميصحش كده انتوا ايه لبعض ؟ الواد اتوتر شويه وقاله احنا اخوات اخوات ابويا قاله اكيد ولا ايه وقام باصص للبنت قالها ها يبنتي ده اخوكي بجد ولا في حاجه قولي فا البنت بصت للواد والواد بصلها وقالت اه اه اخوات اه قالها اكيد ولا ايه الواد قاله اه اخوات اكيد مش هعمل فيها كده وهي غريبه عني دي اختي وكان في كذا حد معدي لاحظ الموقف وكانوا واقفين يشوفوا اخر الحوار ايه

فا قولت لابويا مكنش ليه لازمه اللي انت عملته ده انت مالك قالي انا مالي ازاي قولتله اه انت مالك لو ولعوا في بعض انا وانت يخصنا في ايه قالي لا ومينفعش وغلط قولتله ياعم هو من اهلنا ولا ايه ما يعملوا اللي يعملوه براحتهم ملناش دعوه قالي لا وخلي عندك نخوه وكلام من ده

فا مش عارف بصراحه مين الصح انا ولا هو

لو مش قادر تصرف متخلفش

قاعد امبارح مع شخص بيشتكي من غلاء المعيشه والمصاريف وإن الدنيا جايه عليه والحياه معاه صعبه واللي داخل علي قد اللي خارج

فا فجأه لقيته بيقول انا مخلف ١٤ عيل !

فا استوقفني الرقم جدا بعيدا عن انك يا حاج طبقت المعني الحرفي لكلمة فحل ومراتك الارنبه بس انت مخلف ١٤ عيل هل الدوله مطالبه انها تصرف عليك وعلي الكتيبه اللي انت مخلفها دي ؟؟

وهنا نيجي لنقطه ان انت تخلف ده مش حق مستحق ليك انك ممعكش فلوس كفايه انك تجيب عيل للدنيا وتصرف عليه وتعلمه كويس وتأكله كويس وتلبسه كويس طالما مش هتقدر علي كل ده متخلفش لأن هو هيكون ملوش ذنب انه يجي في ظروف وفتره ملوش ذنب فيها يحارب معاك الفقر وصعوبه المعيشه

انت مش قادر علي مصاريف عيل او اتنين تقوم مخلف ١٤

طب نفترض انك قادر تخلف وتصرف علي عيل واتنين وتلاته واربعه خلاص اكتفي بكده ما احنا مش في مسابقه اللي يخلف أكتر يكسب يعني

العيل اللي انت بتجيبه الدنيا ده مش ملكك مش من حقك تضربه او تزعقله او تقل منه بحجه انا بربيه كده عشان اطلعه راجل

ومش من حقك تخلف بنت تخنقها في عيشتها وتضيق عليها في كل حاجه وتراقبها دايما بحجه بربيها عشان تطلع بنت ناس ومتربيه

كل ده انت مش من حقك تعمله لان التربيه عمرها ما كانت بالشده لكن الكلام الاساسي هو انك متخلفش زياده عن طاقتك ولو مش هتقدر تصرف علي عيل واحد حتي متجبهوش لحد لما ربنا يوسع عليك وتكون مقتدر ساعتها خلف

لكن متجيش تخلف ١٤ وتقول ده البلد حالها ومحتالها اه البلد حالها فعلا مش حلو لكن انت برضو غلطان الدوله مش مُلزمه تتكفل بمصاريف ١٤ عيل يعني ياعم الحاج