u/urrfavnightmare

زمان وقت كان فيه شاتات في ريديت كنت داخله واحد منهم اتناقش مع اجانب اشياء بمواضيع متعددة زي الشغل برا والطبخ وأشياء عشوائية.. وواحد من الموجودين من الجنسية الكندية دخل على حسابي وتلقف على بوستاتي ولاحظ اني من السعودية وبدأ يشغل موالهم المعروف المتكرر اللي طفشونا فيه، زي انه انا شخص ثري لاني من السعودية وكلام عنصري كلنا نعرفه.. ولما كنت اسلك له قال اسخف شي بالحياة انه انتم العرب والسعوديين ما تعرفون طعم تيم هورتنز لانكم تعيشون في خيم
وصراحة ضحكت لإن مستوانا بالقهوة اعلى بواجد من محل بسيط زي كذا
فصار بيننا نقاش مره ضحكني يومها لاني كنت فاضيه وهو كان واضح يبغى يهايط فقلت له بكل بساطة انه تيم هورتنز عندنا هو الخيار الأخير لما نكون مطفرين ومستعجلين بس - وهو فصل وقالي اسم الطلب حقه (اللي على اساس انه كشخه ومفروض اني الحين اقتنع ان ذوقه حلو)، قلت له طلبك عبارة عن سلاشي سكر مدري على ايش فرحان فيه
هنا فصل وبدأ يقول معلومات مغلوطه زي انه لو مو هم قاعدين يكررون النفط حقنا كان صرنا فقراء الحين، (وهالشي أصلًا مو صحيح على فكرة دولتنا تكرر نفطها بنفسها) لكن ما تعبت نفسي إني أقول هالمعلومة لشخص ما يفهم شي بالحياة
فقلت له لو مو دولتكم تكرر نفطنا الحين على قولتك كان تجمدتوا من البرد والثلج
صار يقول بعدها اشياء زي "فيه طيارة مرت من فوقي شكلها انتي بتفجرينا" قلت له صحيح هذي انا وبسوي فيكم خير وافجر كل فروع تيم هورتنز

وفي الأخير ما كمل النقاش وقال يلا يلا انقلعي يا كومة الصحراء "Desert Pile”.. وانا سكتت شوي وحسيت واو؟ كومة الصحراء؟ اكثر نكنيم ايقوني في الحياة مدري ليش تخيلته بطل خارق من أصول عربية يرمي رمال ويشتت الأعداء.. خيالي واسع لكن الأسم بحد ذاته عجبني أحسه مميز بالذات انه له قصة تضحك صارت بيوم عشوائي..

طبعًا في الختام نسيت أذكر نقطة انه أعتذر مني بسبب أنه كان سكران وقتها وإنه عنده مشاكل بالشرب والخ.. حتى بعد ما اعتذر رجع لنفس الحركات ذي مع ناس غيري وكل ما تورط قال اووه معليش بس عندي مشاكل بالشرب، فما أهتميت للأمانة لإعتذاره ولا شي

اخذت خواتم فضة من مكان فضة دايم اخذ منه (يعني ما في مجال انه يكون نحاس او مغشوش)
وكل الفضة اللي اخذها من عنده اصلية وعادي كويسه بس اخر مره شريت من عنده خاتم هو عريض شوي يعتبر كبير هو الوحيد اللي لما البسه واشيله يطبع لونه على اصبعي لون رمادي مو اخضر ولا نحاسي لا لا رمادي والغريب انه ما يروح اللون اول ما اغسله لا يبقى على اصبعي اللون ما يروح الا بعد كذا غسله

توقعته مثلًا مو نظيف او شي وغسلته ومسحته مره كويس ورجعت لبسته تجربة وللحين يطلع لون.. للعلم انه تأكدت انه فضة مو انلعب علي ولا حاجة - وش تتوقعون السبب ووش افضل شي اسويه الحين؟

زي ما مكتوب بالعنوان.. عندي قطو قعد عندي ست سنوات ربيته من عمره 3 سنوات من يوم كنت صغيرة وكبرت ودخلت الجامعة وهو لسا معايا وانتبه له وأهتم له واحبه واسوي اكلاته والعب معاه طول الوقت.

طلعني من انطوائية وساعدني نفسيًا بمراحل حياتية كثير كنت احتاج فيها شي يعدل من مزاجي وحرفيًا بكل إختصار هذا الحيوان الأليف كان الطف شي على قلبي.

فلما جا اليوم هذاك اللي اهلي تخلوا فيه عن هذا القطو، اخذوه مني بالقوة (تخلصوا منه وحطوه في عيادة عشوائية)
تأزمت نفسيًا كثير واكتئبت وبكيت لين شبعت واختي بعد ما راح القطو بكم ساعة في هذاك اليوم ورتني صوره له وهو في العيادة اللي حطوه فيها وتقول شوفي كيف مبسوط وانتي تبكين عليه - طبعًا هي سوت كذا بتفكر اني بتطمن عليه كذا وبنسى

مع اني ما شفت الصورة الا لثواني معدودة إلا انه في الصورة كمية بؤس، القفص اصغر من الليتر بوكس اللي كان قاعد فيه ببيتنا ويادوب محطوط فيه صحن اكل ومويا وجنبه لتربوكس مافيه اي مساحة ينام او يتحرك فيها ف كان جالس فوق الليتر بوكس حقه

الصورة هذي ما اكذب عليكم خلتني اتضايق زيادة على وضعه يعني وين كان ووين صار..
لكن تذكرت شي هو انه الصوره كانت بمكان الاضاءة فيه بيضاء والمكان الوانه رمادي على ازرق والقفص حدايده سوداء ونحيفة

اخذت كل هذي الرموز اللي شفتها وبدأت ابحث اقرب عيادات حيوانات قريبة من بيتنا وضاق نطاق البحث بسبب اني كنت ادور على اشياء معينة (الاضاءة، جو المكان، لون الاقفاص وسماكتها)
ووقع اختياري على ثلاث عيادات شكيت في وحده منها بقوووة لأن الشروط كانت تطبق عليها بشكل مو طبيعي فبدأت ادور متبرع في ريديت اقدر اخليه يتبناه او ياخذه، لأن اذا ما اقدر انا احتفظ في قطي الأليف ما ابغى شخص ثاني ما يخاف ربه ياخذه ويظلمه

وفعلًا يا جماعة الحين هو مع شخص يعامله ويهتم فيه ومعيشه افضل مما كان عندي صراحة وقلبي مرتاح ومتطمن عليه وصراحة كل مره اشكر واحمد ربي كيف تسهلت الأمور ولقيته بهالسهولة من كم ضغطة على جوالي

وفي الختام حابه اقول إني اكتشفت إن الواحد لما يكون تحت ضغط ونفسية سيئة بسبب شي متعلق فيه، عقله يلقط تفاصيل عمره ما كان بيتنبه لها بالوضع الطبيعي.. للحين مستغربة كيف قدرت أوصل له من مجرد صورة لكن الحمدلله إن النهاية كانت مطمنة وقلبي ارتاح عليه.