u/WIZE_XI

أفكر أسوي إجتماع أونلاين أسبوعي أو شهري عشان نتعرف على المتقدمين عشان ناخذ فكره أدق عنكم و ممكن نفيدكم أكثر باختيار الشخص المناسب، طبعا بتكون مقسمه للرياييل و الحريم.

ممكن نسوي فيها فعاليات:

نقاش

أو ممكن نييب مختص زواج يقدم لنا ورشة و يصير فيه سؤال و جواب

أو ممكن نسوي أنشطه ترفييهيه أو تعليمية بشي غير الزواج مثل الطبخ أو تعليم حرفه يدويه أو تمارين معينه

أو ممكن نخليه مثل ستايل البثوث التيكتوك أو بثوث القيمنق، أو فعاليات قيمنق ممكن البعض يشارك فيها

خبروني شو من الفعاليات تبون تشوفون و كم الفترات اللي تبونها بين الإجتماعات؟

أنا الصراحة أبغي أسوي شي ممكن يناسب بعدين يكون من ضمن خدمة حكومية تنظمها الدولة عشان نساعد الناس بالزواج

طبعا ما في شي أكيد، هذا بس جرد أفكار، خبروني رايكم

مثلا لو يبنا شخص مثل فهد سال للمنصة هل في حد بيكون مهتم يتواصل وياه 👀😂

أو لو يبنا بنت مشهوره بمقام مشابه، هل بتكونون مهتمين بالتواصل وياها للزواج؟

البوست اللي فات خلاني أفكر بالموضوع

أحس هاذي النقطة مهمه في الزواج بس كيف الواحد يعرف عنها؟ ما أحس في طريقة مناسبه الصدق لأن الموضوع جدا حساس. أنتوا شو رايكم؟

أنا عندي صديق ما يهتم بالعلاقة الحميمية و غير مهتم بالزواج أصلاً إلا لأسباب إجتماعية، يعني بس بيتزوج عشان ضغط الأهل و العادات و التقاليد. هو ما عنده مشكلة بفكرة الزواج من ناحية أنه يعيش مع بنت و يصرف عليها و ييب منها عيال، لكن متخوف من موضوع العلاقة الحميمية، يعني يفكر شو لو كانت زوجتي رغبتها أكثر مني؟ هو ما يحب موضوع العلاقة الحميمية أصلاً و يفضل يتجنبها كثر ما يقدر لأنه يشوفها شي مقزز و يتحسس من الموضوع بشكل عام و لو في مجال يفضل يكون عنده أطفال عن طريق الأنابيب ولا أنه يسوي الشي الطبيعي، فشو المفروض الواحد يسوي في حالته؟ (للمعلوميه أهله ربوه على هذا الشي عشان يحمونه من الحرام لكن أشوف أسلوبهم ضره أكثر من ما نفعه، خلوه يكره العلاقة الفطرية بين الزوجين)

أو مثلا لو قلنا العكس، رغبته شديده و متخوف يتزوج وحده بارده ما تشاركه نفس الحماس في هذا الجانب أو تكره العلاقة الحميمية. هل في طريقة الواحد يتبين من هذا الشي قبل الزواج؟

أنا أتكلم عن الميزانية بس مو عن كيف بتكون الحفله

مثلا لو البنت تمكيجت ب١٠ ألاف درهم هذا الشي ممكن يكون مبالغ للبعض أو الإختلاف في الصرفية على أي شي ثاني في الحفلة، فهل يحق للريال التدخل في الميزانية في مثل هاذي الحالات؟

يعني مثلاً لو اخترب شي بسيط مثل مقبض باب، تسريب خفيف، تركيب رف، تغيير قطعة كهربائية بسيطة أو مشكلة ممكن تنحل بأدوات عادية، هل الأفضل إنه يعرف يتعامل معها بنفسه بدال ما يحتاج فني مباشرة لكل شي؟

مو قصدي الإصلاحات الخطيرة أو المعقدة اللي تحتاج مختص، لكن المهارات المنزلية الأساسية بشكل عام.

هل تعتبرونها مهارة مهمة للرجل؟ وهل تأثر على نظرتكم له كزوج أو رب أسرة؟

مثلا شي مهم بالنسبه لكم لكن ما تشوفونه وايد مذكور

أنا الصراحة شي لا حظته أن صعب الواحد يحكم على الشخص من بروفايل زواج

مثلا لو شخص في الواقع أسلوبه حلو بالكلام و محترم و مثلا لو عنده حسابات في السوشل ميديا يتفاعل فيها على طبيعته أو هو بالحياة الواقعية شخص مريحه اليلسه وياه و السوالف وياه أو غيرها من الصفات الإيجابيه، ما أعتقد الناس بتنجذب له لو ما عرفت عن باقي صفاته اللي ما توضحت أو صعب إستيعابها في بروفايل الزواج.

فأفكر شو الشي اللي بيوضح الشخص على حقيقته بطريقة جذابه و مميزه؟ هل مثلا يسوي فيديو مقدمه بسيطه عن نفسه؟ أو ممكن يشارك بعض فعالياته و نقاشاته في السوشل ميديا؟ أو ممكن تتم مشاركةصور و فيديوهات عن هواياته أو شغله؟

خبروني شو رايكم؟