OA LANG BA AKO O SERYOSONG ABUSE OF POWER AT EXTORTION NA ANG GINAGAWA NG GRADE 12 ADVISER NAMIN?
Hello, gusto ko lang sana hingin ang perspective ng iba rito kasi litong-lito na ako kung OA lang ba ako o sadyang malala na talaga ang nangyayari sa classroom namin. Grade 12 student ako ngayon at three weeks pa lang simula nung nag-start ang school year, pero sobrang bigat na agad pumasok araw-araw. Ang adviser namin ngayong taon ay naging subject teacher na namin nung Grade 11, at simula noon hanggang ngayon, grabe na ang korapsyon, pananakot, at pambubully niya sa amin. Ang nakakatakot pa, hawak niya ang dalawang pinaka-critical na subjects namin na Research at Work Immersion. Ginagamit niya itong pananakot tuwing nagagalit siya, lagi niyang sinasabi na kayang-kaya niya kaming ibagsak at hindi kami makakapag-graduate kapag may ginawa kaming labag sa gusto niya. Mag f four years na rin sya sa school namin at marami na ding nagrereklamo sakanya hindi ko alam ang rason kung ano pero ang alam ko lang madami na ang nag report sakanya pero hindi padin sya napapatalsik.
Nagsimula ang "extortion" o pagpapabili niya ng mga personal na bagay kapalit ng academic favors noong Grade 11 kami sa Kompan subject niya. Noong ayaw naming mag-memorize ng mission at vision ng school (na nalaman namin sa ibang teachers na hindi naman pala talaga kasama sa curriculum), tinakot niya kami ng long quiz. Pero nung nabilhan namin siya ng cinnamon rolls, bigla niyang kinansela ang recitation pati sa ibang sections. Noong nagpa-project din siya ng 30-minute film making sa loob ng isang quarter na may kasabay pang reviews, exams, script, trailer, at posters, hindi namin kayang ipasa ang script on time sa dami ng schoolworks. Nagbigay siya ng kondisyon na i-aadjust niya ang deadline kung bibigyan siya ng cage ng hamster. May taga-ibang section na nakapagbigay kaya na-extend ang deadline. Pati phone organizer para sa desk niya, ipinabili niya rin sa amin noon.
Ngayong Grade 12, nagpabili naman siya ng first aid kit, floor wax, at mga basahan at iba pa. May isang classmate akong humingi ng pambili at pambayad ng multa sa nanay niya na nagkataong nasa school nung oras na 'yon, kaya nakarating ang isyu sa school admin pati na rin ang tungkol sa malalaking multa na ipinapatupad sa room (40 pesos kapag late). Nagalit ang admin kay Sir, kaya nung bumalik siya sa room namin, galit na galit siyang nagbanta. Binalik niya ang pera ng multa pero binantaan niya 'yung grupo nung classmate ko na ibabagsak niya raw sa Research at pinagbawal pa sa amin ang paggamit ng printer sa room, na ang alam namin ay ipinabili niya lang din pala iyon sa mga naging estudyante niya dati. (I believe marami pa at hindi lang yan lahat)
Bukod sa pananakot sa grades, sobrang out of bounds din ng mga pamamahiya at pambubully niya. Madalas siyang mangmura at mang-humiliate ng estudyante. May classmate akong kilalang body-conscious pero tahasan niya itong tinawag sa unahan na "dambuhala" at "mukhang nanay." 'Yung isa naman naming classmate na insecure sa mukha, pinuna niya rin na "mahaba ang baba." May kwento pa mula sa mga dating estudyante niya noong SY 2023-2024 na inutusan niya silang tapak-tapakan ang mga flyers na ginawa nilang project. Feeling ko nga takot siyang ma-video o ma-record kaya kinokolekta niya ang mga cellphone namin tuwing umaga sa desk niya at ibinabalik lang tuwing lunch break at uwian.
Ang nakakainis pa, may malalang favoritism na nangyayari dahil may isang circle of friends na classroom officers, kasama ang President at Secretary, na sobrang sipsip sa kanya. Kasabay niya silang kumain sa lunchbreak at malapit ang desk nila sa phone organizer. Kapag wala si Sir, ang Secretary ang kumukuha ng phone niya para mag-cellphone. Nung nahuli sila ni Sir na hawak ang phone nila, binalewala lang niya habang kaming mga regular students ay bawal na bawal. Sila ring mga officers ang pabor na lakihan ang multa ng mga late pero hindi naman nila nililista ang sarili nila kapag sila ang lumalabag. At nung nagbanta si Sir tungkol doon sa isyu na nakarating sa admin, ang mismong Class President pa namin (na kagrupo ko sa Research) ang nanguna sa pag-backstab doon sa classmate naming nakapagsabi sa magulang niya, imbis na protektahan ang kapwa estudyante.
Gusto ko na sanang i-report ito nang anonymous sa 8888 Citizens' Complaint Center o sa DepEd, pero sobrang hirap kumuha ng audio o video evidence dahil kinukuha ang mga phone namin at may mga spy siyang officers sa loob ng classroom na pwedeng magsumbong sa kanya kapag may nagplano sa room.
Mabilis ba silang umaksyon sa 8888? Baka kasi abutin ng graduation namin bago maayos, lalo na't hawak niya ang grades namin sa dalawang pinaka-importanteng subject. Ano pa po ba ang ibang effective at ligtas na paraan para mapatalsik o maaksyunan ang ganitong teacher nang hindi nadadamay ang grades at graduation namin? OA lang ba ako na masyadong dinidibdib at pinapalaki ang isyung ito dahil bago pa lang ang school year, o seryosong abuse of power at extortion na talaga ito? Ano po sa tingin niyo?