r/IraqiBaddies

في حال عندج شي تستحين تشاركينه على العام, صبنا كله بنات وخاص. او سالفة تريدين تاخذين رأي بنات بيها, او حتى لو تريدين اي مكان ما بيه اولاد. حيكون صبنا موجود🤍

الموقف صار بسادس ابتدائي..

جنت رايحة المدرسة مشي ويا اخوي الصغير, حتى اوصله لمدرسته ايضًا لأنّها جانت قريبة على مدرستي. وجان شتاء لذلك الشمس لسة ما اشرقت بالكامل. وتكدرون تشوفون الليل بالافق

جان اكو طريقين, الاول الي نكدر نتخذه هو طريق الكلاب المسعورة, بس يقلن صباحًا لانو هواي طلاب يكونون بيه

والثاني هو الطريق العام الي بيه هواي سيارات. ماما ما جانت تخلينا نتخذه لانو عادي يعضكم جلب بس مو عادي تندعمون بسيارة😭

عموما يومها طريق الكلاب جان فاضي ما بيه احد, وبس تسمع نباح من بعيد. وانه واخوي كملنا مشي لنص الطريق والا يجي ولد, على البايسكل يمشي بيه عكس طريقنا. وحذرنا وكال: لا تروحون من هالدرب بيه جلاب

بس احنه غير مخولين بسلك الطريق الثاني فـضلينا نمشي

ما مرت عدة دقايق والا تطلع من احد ممرات الشارع عشيرة كلاب ضخمة, حوالي الـ5 كلاب مرة وحدة! وانه واخوي بدينا نستشهد ثابتين باماكننا

بس ما شافونا الحمد لله, الا واحد🥀🥀

اجى صوبنا واخوي ركض يستخبي ورة احد السيارات, وانه رحت الحك اخوي ولاحظت ان الجلب ناوي عليّ لانة لحكني انه ومالحك اخوي

وانه بهاللحظة كل غرائز الاخت الكبيرة تفعلت عندي😭, لاني ماكدرت اروح اتخبى ويا اخوي واقضي على اثنينا. وولا كدرت اهرب

والله وكيلكم ضليت ثابته بمكاني ما اتحرك والجرب لسة جاي صوبي, ماعرف شلون وكتها ما سويتها على حالي بس الحمد لله

والجلب ما هجم عليّ بل ضل واكف كبالي, اخوان بعدي عنه جان اقل من متر اقسم بالله شوي وينام بحضني. وضلينه انه والجلب نسوي اي كونتاكت وعيني بعينك خل نتغازل بالنظرات. والوقت ما اكدر اجزملكم بيه لانو جان حييلل طويل بالنسبة الي. والجلب ما جان هادي وكله ينبح عليّ وانه حتى اخاف ارمش عيني

وآخرتها راح! يا اخوان بلاخير تجاهلني وكمل طريقه واستلمت حريتي مرة آخرى الحمد لله

وهالقصة حيل عظيمة بالنسبة الي, بحيث يومًا ما راح احجيها لأحفادي... والحمد لله انو اخوي موجود وهو شاهد!

قررت ارفع عليك دعوة قضائية بسبب الاستغلال للوصول الى السلطة (سلطة فواكه هخخخ) فضلًا عن التشهير وعدم احترام برستيجي الالكتروني, ونشر المغالطات لدعم حملتك الانتخابية

القضية الآن خرجت من يدي وصارت بالكامل بيد المحكمة الكبرى لـ reddit والمكتب القانوني الخاص بي. لا توجد أي شروط للصلح، ولا نقبل بالاعتذارات؛ الكلمة الفصل ستكون للقضاء الرديتي

نلتقي في الجلسة القادمة بأذن الله...

أغلب البيوت المستقرة في مجتمعنا مستقرة بس علمودن 'الخوف من الفضيحة' والأولاد، مو لأن الزوجين يحبون بعضهم

فكرة إنو البنت لازم تتزوج بس عشان 'الستر' هي حرفيا أكبر إهانة للمرأة وعقلها

بر الوالدين صار يُستخدم كأداة ابتزاز عاطفي لإجبار الأبناء على تخصصات وزيجات ما يريدونها

مجتمعنا يقدس الموتى ويمدحهم، بس لو يرجعون للحياة راح يرجعون يكرهوهم ويحاربوهم نفس الحرب

[ البقرة: 286]

ابحث عن قنوات (سواء على يوتيوب, تلغرام, التلفزيون, او ايّ منصة آخرى) تقدم الاخبار السياسية بتحليل منصف وموضوعي, بحيث أنّها ما تكون ممولة من حزب او طرف معين

فـ اذا عندكم ياريت تشاركوني اياها وشكرا!

(على فكرة عندي فقط لابتوب, لاني ماكدر استغني عنه للدراسة وهو الي جاي اكتب الكم التجربة من خلاله)

حصلت اول (وآخر ان شاء الله) هاتف نقال الي كهدية بمناسبة نجاحي من احد الصفوف, وجان استخدامي اله جدا هواي, يعني بأختصار مدمنه تلفون, جنت مدمنه يوتيوب وتيك توك بالذات. وبعد فترة مو طويلة على هدية الهاتف هذا, طاح بالماي وخرب

وبسبب ان عائلتي جانت تمر بفترة ماليه ما تسمح الهم يجيبولي تلفون كالولي انو الشهر الجاي نجيبلج واحد. وحتى مع مرور هذيج الفترة على خير الحمد لله ولكني استحيت ارجع اسأل اهلي عن تلفون, لأني بالفعل سألت مرة. بحيث جان يرتادني شعور بأني ماريد اثقل على اهلي..

وبعد سنتين من محاربة هالشعور! استوعبت اني ما احتاج تلفون اصلا!

يا اخوان حرفيا ممكن احسن شي حصلّي هو خراب تلفوني, ففترة النقاهة الي حصلتها جانت ولا بالاحلام

استيعابي هو ان التلفون اكثر شي ماله داعي بهالدنيا هو اكبر هدية ممكن اقدمها لنفسي

ضليت اوثق لحظاتي السعيدة والحزينة بالكاميرا بدل الهاتف مالتي (اشتريت sony cyber shot w210 وانصح بيها لمحبين ثقافة الـY2K)

اما عن التواصل فـ ما جنت احتاجة برى البيت, وداخل البيت اتواصل ويا اهلي وصديقاتي عبر واتساب على اللابتوب

وما جان عندي تلفون حتى اشوف الخرايط من اضيع, او حتى اشوف الساعة شكد. وجنت دوم اسأل الناس الي بالشارع وما جنت انزع ساعتي اليدوية من ايدي

رجعت لالعاب اللابتوب الكلاسيكية, ولهواياتي اليدوية.

والاهم اني صرت اعيش اللحظة 100% واركز مع الناس, ملامحهم, سوالفهم, والواقع نفسه. ومو الشاشات

فضلًا عن كمية الوقت الفضيعة الي رجعت الي بعد ما كانت مسروقة مني بواسطة النقال, فعلا هدية عظيمة

ويمكن اكثر شي حبيت تعلمه من خلال هالتجربة هي تقدير ابسط التفاصيل, النظر للسماء صباحًا, او مساءًا, المشي, الاشجار, اصوات الضحكات, ولطافة بعض البشر. تقليب صفحات كتاب حقيقي، أو حتى تنظيف وترتيب غرفتي.. كلها صارت نشاطات أحس بمتعتها وبإنجازها, كعدة الصبح والريوك صرت أستطعم بيها كل لكمة، بدون ما يكون همي أصور الكوب أو أتصفح التيك توك وأنا آكل! صرت ألاحظ البنايات القديمة، نقوش الأبواب، والمحلات الصغيرة بالشارع الي جنت أمر من يمها يومية وأنا مدنكة راسي على الشاشة ممتنه جدا لملاحظتي اشياء ما جنت الحظها من قبل

واخيرًا وليس اخرًا, ما ناوية اشتري هاتف نقال حتى بالمستقبل. وأليّ يكدر يسوي هالشي, لا يتردد!

وشكرا لقراءتكم🤍

اتمنى بوستي ما ينحذف, انه هنا بس حتى اوعّي كم بنت تعتقد هالشي

بدون لف ودوران، وبعيدًا عن وهم ومثالية السوشيال ميديا اللي جاي تضيع بعض البنات

أنا أعرف وأفهم بالملي إنو هواية من عدنا عايشات ببيئة سامة وتخنگ، ويمرون بمعاناة حقيقية تمنعهم حتى من التنفس. ما جاي أستهزئ بوجع أي بنية، ولا أقلل من حجم الضغط اللي يخليها تفكر تنهي كلشي وتطلع. بس الحقيقة المرة اللي لازم تنصدمون بيها وتوعون عليها قبل ما يفوت الأوان هي: الهروب بالعراق مو مخرج.. الهروب هو الباب الأول للجحيم.

لا تقارنون وضعنا بأي دولة ثانية، ولا تنخدعون بالقصص الوردية مال التيك توك والإنستا. إحنا ببلد لسه ما بيه قانون صارم ومستقل يحمي المرأة من العنف الأسري، وبالمقابل بيه أنظمة عشائرية واجتماعية متجذرة، مستعدة تنهي حياة البنية جسديًا بلمحة بصر إذا لگوها.. وأبسط شي ممكن يصير هو إنو تترجع وتواجه مصير مرعب ومأساوي.

والأقسى من هذا كله؟ الشارع العراقي ما يرحم البنية اللي تطلع بلا ظهر وبلا حماية. واقعنا متجذر بيه شبكات فساد، استغلال، وتجارة بشر وأعضاء. البنية اللي تطلع متهورة، بدون ما مكملة دراستها، بدون سكن آمن، وبدون فلس واحد بـجيبها.. راح تتحول بلمحة بصر من ضحية عنف أسري إلى صيد سهل وبلاش لـ شر وبلاوي الشارع.

المعاناة حقيقية؟ أي نعم، ومليون نعم. بس الحل عمره ما چان الهروب العاطفي اللي يضيع مستقيلچ ويحط حياتچ بخطر التصفية والاستغلال.

الحل الوحيد، الذكي، واللي يحتاج قوة حقيقية.. هو إنچ تقاومين وتتحملين لحد ما توگفين على رجلچ. تتعبين على نفسچ، تدرسين، تطلعين شهادة، وتشتغلين وتسوين لـنفسچ مصدر دخل مستقل وثابت. لما تصيرين مستقلة مادياً وفلوسچ بـجيبچ ومأمنة نفسچ، هنا تگدرين تفكرين بـ الانفصال القانوني والآمن، مو الهروب العشوائي اللي يرميچ بحلق الموت.

سلاحچ الوحيد والفعال بـهذا الواقع القاسي هو وعيچ، شهادتچ، وقوتچ المادية.. غير هذا، إنتِ دا تطلعين من نار أهلچ لنار الشارع اللي راح تاكلچ بـدون رحمة.

edit: أعرف راح يطلعن بنات ويكولن: "زين وإحنا؟ أهلنا ما يخلونا لَا ندرس ولَا نشتغل، شنو الحل؟ نموت؟"

إذا أهلچ مانعيچ من الدراسة والشغل، فالهروب للشارع برضه مو حل، لأن بالشارع راح تخسرين حتى حقچ بالحياة. الحل هنا مو الاستسلام ولا الهروب، بل انو الحل هو "الشغل السكتاوي والتأسيس من جوة ليجوة".

إحنا بـ سنة 2026، الموبايل والإنترنت اللي بـ إيدچ وتشوفين منه هذا البوست هو أكبر سلاح تكدرين تكسرين بيه هذا الحصار وأنتِ بـ غرفتچ وبدون ما أحد يدري بـيچ:

شغل الأونلاين : هواية بنات ببيوتهن وأهلهن ما يدرون بـيهن، يشتغلون بـ مجالات الأونلاين اللي ما تحتاج تطلعين خطوة برة البيت. (صناعة محتوى، إدارة صفحات بيجّات ومتاجر، خدمة عملاء أونلاين، كتابة مقالات، تفريغ صوتي، أو أعمال يدوية وتصاميم تنباع عن طريق وسيط أو بيج).

تعلمي مهارة بـ بلاش: اليوتيوب والمنصات المجانية تترس الإنترنت بـ كورسات (برمجة، تصميم جرافيك، مونتاج فيديو، تسويق رقمي، لغات). المهارة هي اللي تجيب الفلوس، والفلوس هي اللي راح تسوي لـچ ظهر مادي.

جمّعي فلوسچ بـ ذكاء: أي فلس يصح الج من مصرووف، عيديات، أو شغل أونلاين، خبي بـ مكان آمن وما يشك بيه أحد، أو سوي الـچ محفظة إلكترونية (زين كاش أو آسيا حوالة) بـ اسم صديقة ثقة أو قريبة تلجأين إلها، ولا تصرفين منه فلس واحد. هذا الـجيس هو صندوق نجاتج انتي

المطلوب منچ مو العناد اللي يجيب الـچ أذية وضرب وحصار أزيد. المطلوب منچ الذكاء والمطاولة. عيشي وياهم بـ ظاهر هادئ، بس بـ الخفاء ابني نفسچ، تعلّمي، واشتغلي على الموبايل وجمّعي فلوسچ بـ السكتة!

لمن يصير عندچ مهارة حقيقية ومبلغ مادي محترم يأمن لـچ سكن وحياة لـ مدة سنة كاملة بـ مكان آمن، وبدون منة أحد، ذيچ الساعة تكدرين تاخذين خطوتچ القانونية والآمنة بـ الانفصال.. مو تطلعين حافية بـدون فلس والشارع ياكلچ.

تصبحون على خير